بىرلەسكەن كاسىپورىن بيىگى

ينتەگراتسيالىق ۇدەرىستەر استىقتى اقمولا وبلىسىندا ەرتەدەن قالىپتاسقانى بەلگىلى. بىراق, مۇنداي قادامدار كوپ رەتتە تۇتىنۋشىلىق سيپات الاتىن. تاۋەلسىز قازاقستان ەكونوميكاسىنىڭ ستراتەگيالىق مۇراتتارى, نارىقتىق قاتىناستاردىڭ اشىقتىعى بۇگىنگى كۇنى ءتيىمدى ىقپالداستىق اۋانىن ورنىقتىرىپ وتىر. وسىنداي ۇمتىلىستاردىڭ ناتيجەسىندە, وڭىردە بۇرىن بولماعان ءوندىرىس وشاقتارى اشىلىپ, الىستان تاسىمالداناتىن ونىمدەرگە كىرىپتارلىق جويىلىپ كەلەدى. ءبىز بۇل ورايدا كوكشەتاۋداعى «ۆەكتور» كومباين زاۋىتىنىڭ تابىستى جولدارىنان اڭگىمە قوزعاعىمىز كەلەدى. جەكە كاسىپكەر يۋري باشۋروۆتىڭ استىق كومباينىن قۇراستىرۋ جونىندەگى باتىل باستاماسى كوكشەتاۋ قالالىق اكىمدىگى تاراپىنان قولداۋ تاۋىپ, سول­تۇس­تىك وندىرىستىك ايماقتان 6,95 گەكتار جەر ۋاقىتشا پايدالانۋعا ءبولىندى. كوپ ۇزاماي وسىنداعى وندىرىستىك بازا دا اۋك­تسيون ارقىلى ساتىپ الىندى. مۇن­داي­دا ماسەلە قارجىعا, ەڭ باستىسى, سە­نىم­­گە كەلىپ تىرەلەتىنى بار. بۇل ورايدا يۋري ەفيموۆيچتىڭ جولى بولدى. ءتىپتى, ونىڭ بيزنەس-جوبالارىنا حالىقارالىق دەڭگەيدە قىزىعۋشىلىق تانىتىلۋىن ايتۋىمىز كەرەك. ءسويتىپ, بيزنەستى قامتاماسىز ەتۋگە قاجەتتى 4,3 ميلليارد تەڭگەنىڭ 2,1 ميللياردىن «قازاگروقارجى» اق, قالعان 2,2 ميلليارد تەڭگەسىن «روستسەلماش» ااق بولەتىن بولىپ, كەلىسىم جاسالدى. ونىڭ ۇستىنە, رەسەيلىك كومپانيانىڭ جوعارىداعى سومانى جابدىقتاۋشى جانە قوسالقى بولشەكتەر تۇرىندە, كونسيگ­ناتسيالىق تاسىلمەن ءبولۋى ءتيىمدى ءارى ءساتتى مامىلە دەپ بىلەمىز. كوكشە كاسىپورنى قاۋىرت جۇمىسقا كىرىستى. ونى 2012 جىلدىڭ سوڭعى ءۇش ايىندا عانا قازاقستاندىق ماركاداعى 18 دانا «Vector 410 RZ» كومباينىنىڭ شى­عارىلۋىمەن دالەلدەي الامىز. ال بىل­تىر 144 استىق جيناۋ تەحنيكاسى دايىن­دىق ساپىنا قويىلدى. بيىلعى مەجە – 200 دانا. زاۋىتتىڭ جوبالىق قۋاتى جىلىنا 300 «ۆەكتور» شىعارۋ ەكەندىگىن ەسكەرسەك, زاۋىتتىڭ ەل ەكونوميكاسىن دامىتۋداعى ۇلەس سالماعىن باعامداي بەرۋگە بولادى. تاعى ءبىر نازار سالارلىعى, وسىنشاما ءىستى روستوۆتا بىلىكتىلىگىن جەتىلدىرگەن جەر­گىلىكتى 18 ادامنىڭ قامتاماسىز ەتىپ وتىر­عاندىعى. ەندىگى جەردە, ءوندىرىستىڭ كەڭەيۋىنە بايلانىستى قوسىمشا 74 جۇ­مىس ورنىن اشۋ جوسپارلانۋدا. وتكەن جىلعى وراقتا اقمولالىق دي­قان­دار 5 ميلليون توننادان استام استىق جينادى. بۇل – رەكورد. سولتۇستىك ءوڭىردىڭ قۇبىلمالى اۋا رايىندا مۇنداي دەڭگەيگە جەتۋ قۋاتتى دا كەڭ الىمدى كومباينداردى ءتيىمدى پايدالانۋعا تىكەلەي بايلانىس­تى ەكەنى تۇسىنىكتى. بۇل ورايدا, جەرگىلىكتى ديقاندار «ۆەكتورلاردىڭ» ونىمدىلىگىنە كوڭىلى تولاتىنىن ايتادى. ماسەلەن, شورتاندى اۋدانىنداعى «بەكتاۋ» جشس ديرەكتورى, وبلىستىق ءماسليحاتتىڭ دەپۋتاتى ساتىبالدى سىزدىقوۆپەن پىكىر بولىسكەنىمىزدە تومەندەگىدەي ويلارىن ورتاعا سالدى. – ءبىزدىڭ شارۋاشىلىق «اگروتسەنتر-استانا» فيرماسىمەن ۇلەسكەر, – دەيدى ول. – قارجىلىق جاعدايىمىز اسا باپتى بولماعانىمەن, «نۇربانك» وتىنىشىمىزگە تۇسىنىستىكپەن قارادى. وسىنىڭ ارقاسىندا كوكشەتاۋلىق «ۆەكتوردىڭ» 20 داناسىن ساتىپ الىپ, 28 مىڭ گەكتارداعى بىتىك ەگىندى توكپەي-شاشپاي جيناپ الدىق. بۇل – اۋىلداستارىم ءۇشىن ايرىقشا قۋا­نىشتى وقيعا. ويتكەنى, ءبىز سوڭعى رەت 2001 جىلى الىنعان «ەنيسەيلەردى» ىلدەبايلاپ پايدالانىپ ءجۇر ەدىك. – جالپى, مەن «ۆەكتور» كومباين­دارى­نىڭ تەحنيكالىق مۇمكىندىكتەرىن جوعارى باعالايمىن, – دەيدى ديرەكتوردىڭ ءسوزىن جالعاستىرعان تاجىريبەلى بريگادير الەك­ساندر تكاچەنكو. – مۇنداي كومبايندار­دى اۋدانىمىزداعى «نوۆوكۋبانكا» جشس كوپ جىلداردان بەرى پايدالانىپ كە­لە­دى. «ۆەكتور» ءوڭىرىمىزدىڭ كليماتتىق ەرەك­شەلىكتەرىنە قولايلى, جەڭىل باسقا­رى­لادى ءارى جەرگىلىكتى جاعدايدا جوندەپ تە الۋعا بولادى. ال ونىمدىلىگى جاعىنان شە­تەلدىك قىمبات كومباينداردان قالىس­پايدى. ءبىز جۋىردا فيرمالىق جالاۋى الىس­تان جەلبىرەگەن زاۋىتقا كەلگەنىمىزدە, ادەتتەگىدەي, قاربالاس جۇمىس قىزىپ تۇر ەكەن. كاسىپورىن قاقپاسىنان شىعۋعا دايىن كومباينداردىڭ قۇجاتتارى مەن قوسالقى بولشەكتەرىن تەكسەرىستەن ءوت­كىزىپ جۇرگەن زاۋىت ديرەكتورى يۋري باشۋروۆتىڭ قالت ەتكەن ءساتىن پايدالانىپ, سوزگە تارتتىق. – «ۆەكتوردىڭ» قازاقستان رىنوگىن­داعى ۇلەسى جىل ساناپ ارتىپ كەلەدى. ناق­تىلاي ايتساق, رەسپۋبليكاداعى ەگىن جيناۋ تەحنيكاسىنىڭ 42 پايىزىن وسى كومبايندار الادى, – دەدى يۋري ەفيموۆيچ. – ارينە, بۇل تۇرعىدا, اقمولا وبلىسى جەتەكشى ورىندا. وتكەن جىلى قۇراستىرعان 144 اگرە­گات­تىڭ 70-ءىن «روستسەلماش» كومپانيا­سىمەن 11 جىل بويى ارىپتەستىك باي­لانىستاعى «قازاگروقارجى» اق جۇيە­سى­­مەن ساتىپ جاتىرمىز. قازىرگى تاڭدا ءون­دىرىستىك الاڭدارىمىزدى جاڭعىرتىپ, قۋاتتاندىرۋ ۇستىندەمىز. بيىل 3000 شارشى مەترلىك ەكىنشى تسەحتى ىسكە قوسۋ ارقىلى 200 كومباين شىعارۋعا مۇمكىندىك تۋادى. ال 2015 جىلى ونى 300 داناعا جەتكىزۋ نيەتىندەمىز. سۇرىنىستىڭ وسە ءتۇسۋىن تەحنيكانىڭ ساپالىق كورسەتكىشتەرىمەن بىرگە, بىلتىرعى شىلدەدەن باستاپ كەدەن رەجىمىندەگى «ەركىن قويما» جەلىسىن اشقانىمىزبەن بايلانىستىرۋعا بولادى. ياعني, ونىمدەرىمىزدى قوسىمشا قۇن سالىعىنسىز بوساتۋدىڭ ارقاسىندا كومبايننىڭ باعاسى 12 پايىزعا ارزانداپ وتىر. مۇنىڭ ءوزى كەدەن وداعىنىڭ ارتىقشىلىقتارىن بىلدىرۋمەن قاتار, اۋىل ەڭبەككەرلەرى ءۇشىن ايتارلىقتاي جەڭىلدىك ەكەندىگى بەلگىلى. كوكشەتاۋ زاۋىتىنىڭ بولاشاق جوس­پار­لارى تۋرالى سۇراعىمىزعا يۋري ەفيموۆيچ 2015-2016 جىلدارى ءوندىرىستى ارتاراپتاندىرۋعا باعىت ۇستا­لىپ, زامانالىق «اگروسويۋز-حورش» دانسەپكىش كەشەندەرىن, جاتكالاردى تاسىمالداۋ اربالارىن شىعارۋ جوباسى تۇزىلگەنىن ايتتى. جالپى, استىق كومبايندارىن قۇراستىرۋدا حالىقارالىق «ست-كZ» سەرتيفيكاتىنا يە كاسىپورىندا قازاقستاندىق ۇلەس قازىر 16,6 پايىز بولسا, بيىلعى جىلى ونى 20 پايىزدان اسىرۋ كوزدەلۋدە. باقبەرگەن امالبەك, «ەگەمەن قازاقستان». اقمولا وبلىسى. سۋرەتتى تۇسىرگەن ەرمۇرات دوسىموۆ.