دەنساۋلىق ساقتاۋ مينيسترلىگى سىنعا ىلىكتى

اۋىل حالقىنىڭ ساپالى مەديتسينالىق قىزمەتكە قولى جەتپەي وتىر. بۇل تۋرالى «قازاقستان» تەلەارناسى حابارلادى. بۇگىن, پارلامەنت ماجىلىسىندە وتكىزىلگەن ۇكىمەت ساعاتىندا «سالاماتتى قازاقستان» باعدارلاماسىنىڭ ورىندالۋى تالقىلاندى. وندا پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ ءتورايىمى داريعا نازارباەۆا دەنساۋلىق ساقتاۋ مينيسترلىگىن سىنعا الدى. «حالىق اۋرۋحانالار مەن ەمحانالاردىڭ قولجەتىمدىلىگىمەن قامتىلماي وتىر. «100 مەكتەپ جانە100 اۋرۋحانا» باعدارلاماسى بويىنشا 71 نىسان سالىنسا, سونىڭ 25-ءى عانا اۋىلدا. قالعان نىسانداردى 2016 جىلى اياقتاۋ جوسپارلانعان. دەگەنمەن, 13 نىساننىڭ  قۇرىلىسى ءالى باستالماعان. مۇنىڭ ءوزى ادامداردىڭ ساپالى مەديتسينالىق قىزمەتكە قولجەتىمدىلىگى ماسەلەسىنىڭ, اسىرەسە, اۋىلدىق جەرلەردە ءالى شەشىمىن تاپپاي وتىرعانىن كورسەتەدى. كوپتەگەن اۋىلدار اۋدان ورتالىقتارىنان قاشىقتا ورنالاسقان. ەندەشە,  اۋا رايىنىڭ قولايسىزدىعى جاعدايلارىن, ءبىزدىڭ جولدارىمىزدىڭ جاي-كۇيىن ەسەپكە الساق, شۇعىل مەديتسينالىق كومەكتى قاجەتسىنەتىن كۇيگە تاپ بولعان ادامنىڭ جاي-كۇيىن كوزگە ەلەستەتۋدىڭ ءوزى قيىن», - دەدى حالىق قالاۋلىسى د.نازارباەۆا. د. نازارباەۆا ءسوز ورايىندا  جەكەلەگەن ايماقتارداعى مەديتسينالىق نىسانداردىڭ قوندىرعىلارمەن تولىق قامتاماسىز ەتىلمەگەنىن دە العا تارتتى. جالپى, رەسپۋبليكانىڭ 9 وبلىسىندا قۇنى 834 ملن. تەڭگەنى قۇرايتىن مەديتسينالىق قۇرال-جابدىقتار پايدالانىلماي تۇر ەكەن. ال ەسەپ كوميتەتىنىڭ مالىمەتىنە جۇگىنسەك, «100 مەكتەپ جانە100 اۋرۋحانا» باعدارلاماسىن جۇزەگە اسىرۋ بارىسىندا مەملەكەتكە 1,5 ملرد. تەڭگە شىعىن كەلگەن. ءامىرحان الماعانبەتوۆ. دەرەككوز: «قازاقستان» تەلەارناسى. فوتو: «24 kz».