مەتان گازى يگەرىلەتىن بولدى

بۇعان دەيىن دە جازىپ جۇرگە­نىمىزدەي, شاحتالار كومىر قابات­تارىنداعى مەتان گازىن يگىلىككە جاراتۋ قاراعاندىلىق كەنشى عالىمدار مەن مامانداردى كوپتەن ويلانتىپ-تولعانتۋشى وزەكتى ماسەلە بولىپ كەلەدى. بولجام بويىنشا وتىن كەنى وندىرىلەتىن تۇستاردا ونىڭ جالپى قورى 1 تريلليون تەكشە مەتردەن اسادى ەكەن.  بۇل بىلايشا ايتقاندا, قاراعاندى تۇنىپ تۇرعان تاعى ءبىر بايلىق كوزىن باۋىرىنا باسىپ جاتىر دەگەن ءسوز. الەمنىڭ  20 ەلىندەگىدەي  كادەگە اسىرىلۋى جولعا تولىق قويىلسا, ءوڭىر ەكونوميكاسىنا تيگىزەر ىقپالى ۇشان-تەڭىز بولماقتىعى تالاسسىز. كەيىنگى ون جىلدا ءورىس العان مەتان گازىن بارلاۋ, ونى الۋ جۇمىستارى ناتيجەسىن بەرە باستاپ وتىر. بۇدان ءۇش جىل بۇرىن لەنين اتىنداعى شاحتادا مەتان ارقىلى ەلەكتر قۋاتىن ءوندىرۋ جوباسى ىسكە قوسىلدى. سونىڭ ارقاسىندا كاسىپورىن ءوزىن-ءوزى  ەنەرگيامەن 15-20 پايىزعا قامتاماسىز ەتە  الاتىن بولدى. وسىلايشا, قولدا باردى ۇقساتا ءبىلۋ باسقا دا شاحتالار قىزىعۋشىلىعىن تۋدىردى. ەسەپتەۋلەرگە قاراعاندا قورى 28 ملرد. تەكشە مەتردى قۇرايتىن تالدىقۇدىق پەن ساران كومىرلى بولىكتەرىندە يگەرىلۋى كۇننەن-كۇنگە وسۋدە. ەلباسىنىڭ مەتان گازىن ءوندىرۋ جونىندە ۇكىمەتكە بەرگەن تاپسىرماسىنا سايكەس گەولوگيالىق بارلاۋ مەن زەرتتەۋ ءىس-شارالارى كەڭىنەن جۇرگىزىلىپ جاتىر. جاقىندا شەرۋباي-نۇرا, قاراجار-شاقان ۋچاسكەسىندە دە وسىناۋ بايلىق  كوزىن وندىرىستىك ماقساتقا پايدالانۋعا  جول  سالىندى. ايقىن نەسىپباي, «ەگەمەن قازاقستان». قاراعاندى.