ارىپتەستىڭ ءۇش تۋىندىسى

جۋرناليستىك جولىمدى باس­تاپ, تابانى كۇرەكتەي جيىرما ەكى جىل بويى تەر توككەن, ىس­تىعىنا كۇيىپ, سۋىعىنا توڭعان قوستاناي وبلىستىق «قوستاناي تاڭى» گازەتى مەن ءۇشىن ەرەكشە ىستىق. سول قاراشاڭىراقتا بولىپ جاتقان شىعارماشىلىق ىزدەنىس پەن وزگەرىستەرگە ۇنەمى قۇلاق تۇرە جۇرەمىن. كەزىندە نەگىزىن مۇحامەدجان سەرالين, بەيىمبەت مايلين سياقتى ۇلتى­مىزدىڭ ءبىرتۋار ۇلدارى سالعان ۇنپاراقتا سول اسىل اعالاردىڭ جالعاسىنداي بولعان تالاي قا­رىم­دى قالامگەرلەر قازىر دە ەڭبەك ەتەدى. سولاردىڭ ءبىرى – «قوس­تاناي تاڭى» گازەتى باس رەداك­تورىنىڭ ءبىرىنشى ورىنبا­سارى, قازاقستان جازۋشىلار جانە جۋرناليستەر وداقتارىنىڭ مۇشەسى, مادەنيەت قايراتكەرى, قازاقستاننىڭ قۇرمەتتى ءجۋرناليسى ءسالىم مەڭدىباەۆ. – بۇگىندە مەن ءوزىمدى كەزىندە بي-اعاڭ اتقارعان جۇمىستى جال­عاستىرىپ جۇرگەندەي سەزىنەمىن. ال بۇل ەرەكشە جاۋاپكەرشىلىك, – دەيدى ارىپتەسىم. سوندىقتان دا بولار, وسى ۇجىم­دا قىرىق ءۇش جىل بويى ابى­رويلى ەڭبەك ەتىپ كەلە جاتقان ءسالىم توقمىرزا ۇلى ۇنەمى جاڭا ءبىر باستامالارعا مۇرىندىق بولىپ جۇرەدى. انا ءبىر جىلدارى رەداكتسيا تىرشىلىگىنە ەرەكشە ءبىر سەرپىن بەرگەن گازەتتىڭ جاستارعا ارنالعان «نامىس», ايەلدەرگە ارنالعان «اقسۇلۋ», تاريحي-تانىمدىق «زەر­­دە» قوسىمشالارىن وسى ءسا­كەڭ ءوزى باس بولىپ, وقىرماندار نا­زارىنا ۇسىندى. وتكەن 2013 جىلى جازۋشى-جۋرناليست قالامىنان ءۇش ءبىر­دەي تاماشا كىتاپ «قوستاناي تاڭى­نىڭ» كىتاپحاناسى» سەرياسىمەن دۇنيەگە كەلدى. ءبىرىنشى كىتاپ «تۇمارىمىز – ءتۇر­كىستان» دەپ اتالادى. وعان اۆتور­دىڭ جەتەكشىلىگىمەن وسىنداي ايدارمەن گازەت بەتىندە جا­رىق كورگەن وچەرك, دەرەكتى اڭگى­مەلەر مەن جولجازبا­لار توپ­تاستىرىلعان. بۇل كۇندەرى قا­سيەت­تى تۇركىس­تاندا قوس­تاناي-تور­عاي ءوڭى­رىنەن شىققان تو­عىز بىردەي ءباھادۇر با­بامىزدىڭ جەر­لەنگەنى بەلگىلى بولىپ وتىر. ولار: شاقشاق جانىبەك, قارا­بالۋان الديار ۇلى, مەشىت­باي سۇگىر ۇلى, مەرگەن باباس­ ۇلى, بەكباۋلى وتەي ۇلى, ءالى­بەك قۇدايبەردى ۇلى, ايت­پاي اتكەلتىر ۇلى, شوبان جامان­قۇل ۇلى, ماديار جاۋعاشتى ۇلى. بۇ­لاردىڭ ءبارى كەشەگى جوڭعار شاپقىنشىلىعى كەزىندە قازاق ەلىنىڭ تاۋەلسىزدىگى ءۇشىن قان مەن تەر توككەن تاريحي تۇلعالار. سول بابالار ەرلىگىن ناسيحاتتاۋ­دا بۇل تاريحي-تانىمدىق تۋىندىنىڭ الاتىن ورنى ەرەكشە. اۆتوردىڭ ەكىنشى كىتابى «ءبىزدىڭ ەلدىڭ جىگىتتەرى» دەپ اتالادى. بۇل ەڭبەكتە ەسىمدەرى بۇكىل ەلگە ايگىلى مەملەكەت جانە قوعام قايراتكەرى ءىلياس وماروۆ, عۇلاما عالىمدار ومىرزاق سۇلتانعازين, جۇماعالي ىسماعۇلوۆ, ساعىندىق ساتىبالدين, جانكەلدى وتارباەۆ, اۋىلشارۋاشىلىق ءوندىرىسىنىڭ كوشباسشىلارى ءجازيت قۇدايقۇل, سايران بۇقانوۆ, ومىرزاق يحتي­لياپوۆ سياقتى تالاي تانىمال ازا­ماتتاردىڭ بەينەسى سومدالادى. ال «ارمىسىڭ, التىن تاڭ!» اتتى كىتاپ شىعا باستاعانىنا توق­سان جىلدان استام ۋاقىت بول­عان «قوستاناي تاڭىندا» سوڭ­عى ون-ون بەس جىل كولەمىندە جاريا­لانعان ساكەڭنىڭ تاڭدامالى شىعار­مالارىنان تۇرادى دەسەك, قاتە ايتقاندىق بولماس. بەس تاراۋدان تۇراتىن تۋىندىدا ءجۋرناليستىڭ ءارتۇرلى تاقىرىپتى قامتىعان وي-تولعامدارى ءوز وقىرمانىن تابادى دەپ كامىل سەنىممەن ايتا الامىز. جۋرناليستىك العىرلىعى مەن جازۋشىلىق شەبەرلىگىن تانىت­قان ارىپتەسىمىز بۇدان بۇرىن دا «جۇرەك ءلۇپىلى», «ەمەننىڭ ايىر بۇتاعى», «ءموپ-ءمولدىر دۇنيە», «ەركىمبايدىڭ سۇلتانى», «تە­رەڭ تامىر» اتتى كىتاپتار جازىپ, جاريالاعان بولاتىن. ال «قوس­تاناي تاڭىنىڭ» كىتاپحاناسى» سەريا­سىمەن شىققان سوڭعى ءۇش تۋىن­دىسى ارىپتەسىمىزدى بيىك تۇ­عىرعا كوتەرگەن كەلىستى ەڭبەك بولىپ ەسەپتەلەدى. قايسار ءالىم, «ەگەمەن قازاقستان».