ءىجو-عا پايدالى جاعى كوپ

تەڭگە باعامىنىڭ وزگەرۋى بيۋدجەتتىڭ تابىسى مەن شىعىنىنا, ىشكى جالپى ءونىم مەن ينفلياتسياعا جالپى جاعىمسىز اسەرىن تيگىزبەيدى. كەرىسىنشە, بيۋدجەتكە تۇسەتىن پايدانى ەسەلەمەك. ەكونوميكا جانە بيۋدجەتتىك جوسپارلاۋ مينيسترلىگىنىڭ مالىمەتتەرى, مىنە, وسىلاي دەيدى. ەكونوميكا جانە بيۋدجەتتىك جوسپارلاۋ مينيسترلىگى تەڭگە باعامىنىڭ وزگەرۋىن ەسكەرە وتىرىپ, ىشكى جالپى ءونىمنىڭ نومينالدى كولەمى قوسىمشا 6,5 پايىزدىق تارماققا ۇلعايادى جانە ءىجو-ءنىڭ نومينالدى ءوسۋى 2014 جىلى 119,4 پايىزدى قۇرايدى, دەپ مالىمدەدى. ىشكى جالپى ءونىمنىڭ,  كولەمى 2014 جىلى بۇرىن بولجامدالعان 38,6 ترلن. تەڭگەمەن سالىستىرعاندا 41,1 ترلن. تەڭگەنى قۇرايدى. ەكسپورتتان تۇسەتىن تەڭگەمەن ەسەپتەگەندەگى پايدانىڭ 8,8 پايىزدىق تارماققا ۇلعايۋى ىشكى جالپى ءونىمنىڭ نومينالدى وسۋىنە ىقپال ەتەتىن بولادى. سونىمەن بىرگە, يمپورتتىڭ قىمباتتاۋى ەسەبىنەن ىشكى جالپى ءونىمنىڭ نومينالدى كولەمى 2,3 پايىزدىق تارماققا تومەندەيدى. سونىمەن قاتار, مينيسترلىك مالىمەتتەرى تەڭگە باعامىنىڭ وزگەرۋى جۇرگىزىلىپ جاتقان يندۋستريالاندىرۋ ساياساتىن ەسكەرە وتىرىپ, قازاقستاندىق وندىرۋشىلەر مەن ەكسپورتتاۋشىلاردىڭ باسەكەگە قابىلەتتىلىگىن ارتتىرۋعا ىقپال ەتۋى ءتيىس دەگەن پايىمعا كەلىپ وتىر. تەڭگە باعامىنىڭ وزگەرۋى ناتيجەسىندە, سونداي-اق, وتاندىق تاۋار وندىرۋشىلەر ونىمدەرىنىڭ ءوسۋى جانە نەعۇرلىم قىمبات يمپورتتىق تاۋارلاردىڭ ازايۋى كۇتىلۋدە. بۇل قازاقستاننىڭ ساۋدا تەڭگەرىمىن ۇستاپ تۇرادى جانە ەلىمىزدىڭ سىرتقى ساۋداداعى پوزيتسياسىن جاقسارتادى دەيدى ماماندار. مۇنايعا ەكسپورتتىق كەدەندىك باجدىڭ ءتۇسىمى بويىنشا (125,7 ملرد. تەڭگە), «بايقوڭىر» كەشەنىن پايدالانعانى ءۇشىن جالداۋ اقىسى (3,7 ملرد. تەڭگە) بويىنشا, اسكەري پوليگونداردى پايدالانعانى ءۇشىن جالداۋ اقىسى (0,8 ملرد. تەڭگە) بويىنشا باعامدىق ايىرما ەسەبىنەن باعالاۋعا بايلانىستى 2014 جىلى رەسپۋبليكالىق بيۋدجەتتىڭ كىرىسى 130,2 ملرد. تەڭگەگە ۇلعايادى. رەسپۋبليكالىق بيۋدجەت شىعىستارى باعامدىق ايىرما ەسەبىنەن 85,2 ملرد. تەڭگەگە ۇلعايادى. وسىلايشا, بيۋدجەت شىعىستارىنىڭ ءوسۋى بيۋدجەت كىرىستەرىنىڭ ءوسۋى ەسەبىنەن نيۆەليرلەنەتىن بولادى. باعالاۋ بويىنشا تەڭگەنىڭ 20 پايىزعا تۇزەتىلۋى ينفلياتسيانى 3,3 پايىزدىق تارماققا ۇلعايتادى. ينفلياتسيا دەڭگەيىنىڭ 2013 جىلعى 4,8 پايىز دەڭگەيىن ەسەپكە الا وتىرىپ, ينفلياتسيانىڭ 6-8 پايىز دالىزدە قالاتىنى كۇتىلەدى. ەكونوميكا جانە بيۋدجەتتىك جوسپارلاۋ مينيسترلىگىنىڭ ايتۋىنشا, سونداي-اق, كوممۋنالدىق قىزمەتتەر تاريفتەرىنىڭ قوسىمشا ءوسۋى كوزدەلمەيدى. ينفلياتسياعا اقىلى قىزمەتتەردىڭ سالىمى بۇرىن بەكىتىلگەن 1,2 پايىز دەڭگەيىندە قالادى. بۇل رەتتە, بيىلعى جىلى ينفلياتسيانىڭ ورتاشا دەڭگەيىن 2 پايىزعا ءوسىرۋ ارقىلى زەينەت­اقىنى 9 پايىزعا, الەۋمەتتىك جاردەماقىلاردى 7 پايىزعا ارتتىرۋ كوزدەلەدى. دينارا بىتىكوۆا, «ەگەمەن قازاقستان»