كوكەيگە قونادى

قازاق ەلى! ەجەلدەن بەرگى ەل ارمانى ەمەس پە ەدى بۇل! ءتىپتى وسى ءبىر قازاق ەلى مەن قازاق جەرى دەگەن قاسيەتتى قوس ۇعىم ءۇشىن اتا-بابالارىمىز اتتان تۇسپەي جاۋ­مەن ارپالىسىپ,تالاي ءبىر تار جول تايعاق كەشۋدى باستارىنان دا وتكىزگەندىكتەرىن كونە تاريح تا جوققا شىعارا الماسى انىق.ەلىمىز, مىنا ءسىز ءبىز «قازاقستان» دەگەن اتپەن دە تالاي ءبىر اسۋلاردان دا استىق. الايدا, سەزىنە بىلگەن جانعا «قازاعىن» بىلاي قويا تۇرىپ ايتار بولساق, وسى ءبىر «ستان» دەگەن سوزدەن الدەبىر سالقىندىق ەسىپ تۇراتىنى بار. «ستان» دەگەنىڭىز ءتىپتى كىم كورىنگەننىڭ ءبىر تۇنەپ كەتەر جاتاعى سياقتى ۇعىمعا جاقىنداۋ ما دەپ قالامىن. جانە دە كىم كورىنگەننىڭ بيلىگى مەن ءامىرى جۇرەر, ناقتىلى يەسى جوق ەل دەگەنگە دە ساياتىنى بار. ەندى ءبىز دۇنيەگە تانىلعان ەگەمەن ەلمىز! جانە دە الەمدىك ساياساتتا دا, الەمدىك قاۋىمداستىقتا دا وزىمىزگە لايىقتى ورنىمىز بار ابىرويلى دا ايبىندى ەلمىز! قازاقستان رەسپۋبليكاسىنىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ ەل تاعدىرىن, تاۋەلسىزدىگىمىزدىڭ تاعدىرىن كەڭىنەن ءپىشىپ كەلە جاتقان كەمەل دە كورەگەن ساياساتىنىڭ ارقاسىندا الەمنىڭ دامىعان 50 ەلدەرىنىڭ قاتارىنان ورىن الىپ وتىرعان ەلمىز! ءبىز ەندى 2050 جىلعا دەيىنگى دامۋ باعىتىمىزدى ايقىنداپ, الەمنىڭ ەڭ دامىعان قۋاتتى 30 ەلىنىڭ قاتارىنا تۇرۋدى ماقسات ەتكەن ەلمىز! «ءبىز ءۇشىن بولاشاعىمىزعا باعدار ەتەتىن, ۇلتتى ۇيىستىرىپ, ۇلى ماقساتتارعا جەتەلەيتىن يدەيا بار. ول ماڭگىلىك ەل يدەياسى» – ەلباسىنىڭ حالىققا ارناعان جولداۋىندا ايتىلعان وسى ءبىر اۋىز ءسوز ءبىزدىڭ بارشامىزدىڭ كوكەيىمىزدە جاتقان, ءتىپتى ءبىزدى قويىپ سان عاسىرلار بويى بابالارىمىزدىڭ كوكەيىندە كەتكەن ارماندى تىلەكتى نيەتى ەدى. ەندى مىنە, جاراتقان يەمىز وڭعارىپ, ەلباسى ءوزى باستاپ, حالقىمىز قولداپ ءبىز ماڭگىلىك ەل بولۋدى مۇرات تۇتىپ, بۇل ۇلى ماقساتتى ۇلتتىڭ ۇلى ستراتەگيالىق ماقساتى رەتىندە العا تارتتىق. ءبىز ءوزىمىزدىڭ كەلەشەگىمىزگە, ءوزىمىز­دىڭ العا قويىپ وتىرعان ءىس جوسپار­لارىمىزدىڭ جاسام­پاز­دىعىنا سەنىپ بارىپ ماڭگىلىك ەل بولامىز دەپ تورتكۇل دۇنيەگە مالىمدەمە جاساپ وتىرمىز. ەندى ماقسات ايقىن, وي دا انىق, يدەيا دا بار! بىزگە ەندى وسى ءبىر ۇلى مۇراتقا جەتىپ, ماڭگىلىك ەل بولۋ ءۇشىن ەلباسىنىڭ توڭىرەگىنە تىعىز توپتاسىپ, بىرلىگىمىزدى ساقتاپ, ءتىلىمىز بەن دىنىمىزگە بەرىك بولىپ, ەلىمىزدەگى يندۋستريالاندىرۋ باعدارلاماسىن ويداعىداي ەتىپ, ساپالى ورىنداۋ, ءبىلىم مەن عىلىمدى دامىتۋ جانە جان اياماي ەڭبەك ەتۋ قالدى! ەڭ باستىسى, ەلباسى نۇرسۇلتان نازارباەۆ ماڭگىلىك ەلدىڭ ىرگەتاسىن قالاپ, ماڭگىلىك ەلدىڭ استاناسىن جاڭا­دان سالىپ, قازاق ەلىنىڭ الەمدىك ەكونوميكاداعى دا, ساياساتتاعى دا وزىنە لايىقتى ورنىن ويىپ تۇرىپ الىپ بەردى! بۇل ءسوز تالاستىرۋدى قاجەت ەتپەيتىن تاريحي اقيقات! ءبىز وسى ءبىر وي تۇجىرى­مى­مىز­بەن بولىسۋدەگى ماقساتىمىز ەلباسىنىڭ جۋىردا اتىراۋ قالاسىندا بولعان ساپارى كەزىندە جۇرتشىلىقپەن كەزدەسۋ بارىسىندا قازاقستاندى ەندىگى ارادا «قازاق ەلى» دەپ اتاۋ جونىندە وي تاستاعان ءسوزىنىڭ كوكەيىمىزدەن شىققاندىعىن ايتۋ بولاتىن. ەلباسى بۇل ويدى 2013 جىلعى ءوز جولداۋىندا ورتاعا تاستاعان ەدى. ەندى سول ورتاعا سالىنعان ويدىڭ جۇزەگە اسىرىلاتىن كەزى دە كەلگەن سىڭايلى. ارينە, ەلباسى بۇل ماسەلەنىڭ اۋەلى ەل تالقىسىنا سالىناتىندىعىن دا ايتىپ ءوتتى. بۇل ماسەلە ەل تالقىسىنا سالىنار بولسا بارشا قازاقستاندىقتاردىڭ بۇل ماسەلەنى, ياعني, قازاقستاننىڭ «قازاق ەلى» اتانۋىن جاقتاپ, قولدايتىندىقتارى دا ءسوزسىز دەگەن كوڭىلدە ءبىر سەنىم بار. جابال ەرعاليەۆ, جازۋشى, قازاقستاننىڭ ەڭبەك سىڭىرگەن قايراتكەرى, قازاقستان رەسپۋبليكاسى پارلامەنتى سەناتىنىڭ دەپۋتاتى.