دامۋشى ەلدەردىڭ ۇلتتىق ۆاليۋتالارىنا ءتان جاعداي ءبىزدىڭ ۇلتتىق ۆاليۋتامىزدى دا اينالىپ وتپەدى. قازاقستان رەسپۋبليكاسى ۇلتتىق بانكىنىڭ ۇلتتىق ۆاليۋتامىزدىڭ ايىرباس باعامىن بىرقالىپتى دەڭگەيدە ۇستاۋدان باس تارتۋ, ۆاليۋتالىق ينتەرۆەنتسيا كولەمىن تومەندەتۋ جانە تەڭگەنىڭ ايىرباس باعامىنىڭ قالىپتاسۋ ۇردىسىنە ارالاسۋىن شەكتەۋ تۋرالى قابىلداعان شەشىمى كەشەلى بەرى حالىق اراسىندا قىزۋ پىكىرتالاس تۋعىزۋدا. ەكونوميكانىڭ, ونىڭ ىشىندە قارجى نارىعىنىڭ كۇرت وزگەرۋىنە جول بەرمەۋ ماقساتىندا قازاقستان رەسپۋبليكاسى ۇلتتىق بانكى 3 تەڭگە كولەمىندە اۋىتقۋىن ەسكەرە وتىرىپ, تەڭگەنىڭ اقش دوللارىنا شاققانداعى اراقاتىناسىن 185 تەڭگە مولشەرىندە بەلگىلەدى. قازاقستان رەسپۋبليكاسى ۇلتتىق بانكىنىڭ رەسمي كەلتىرگەن مالىمەتى بويىنشا 2012 جىلعا قاراعاندا 2013 جىلى تولەم بالانسىنىڭ ءپروفيتسيتى 5,4 ەسەگە قىسقارعان. تەڭگە باعامىن تۇزەتۋ تۋرالى شەشىم قابىلداۋعا بۇل دا وزىندىك نەگىز بولدى دەپ ايتا الامىز.
ۇلتتىق ۆاليۋتا باعامىنىڭ توسىننان وزگەرۋى, ءارى «كوش جۇرە تۇزەلەدى» دەگەندەي, ۋاقىت وتە كەلە نىعايۋى ۇزاقمەرزىمدى پەرسپەكتيۆادا ەكونوميكاعا وڭ ىقپال جاسايدى. ەل ۇكىمەتى ءتيىستى شارالار كەشەنىن جۇزەگە اسىرسا, بۇل مۋلتيپليكاتيۆتىك اسەرگە يە بولادى. بۇل تۇرعىدان ەل ۇكىمەتىنىڭ قاراپ قالماي جاتقانىنا ءبارىمىز كۋا بولىپ وتىرمىز. ۇلتتىق ۆاليۋتامىزدىڭ نىعايۋى ونەركاسىپ ءوندىرىسىنىڭ, ينۆەستيتسيانىڭ, جۇمىسپەن قامتۋ دەڭگەيىنىڭ, ناتيجەسىندە ىشكى جالپى ءونىم مولشەرىنىڭ وسۋىنە اسەر ەتەدى. سەبەبى, بۇل ەڭ الدىمەن كاپيتالدىڭ كەتۋىنە شەكتەۋ قويادى. اعىمداعى سىرتقى ەكونوميكالىق كونيۋنكتۋرا مەن ماكروەكونوميكالىق جاعداي ءۇشىن قالىپتى قۇبىلىس بولىپ تانىلاتىن بۇل ۇدەرىس وتاندىق تاۋارلاردىڭ باسەكەگە قابىلەتتىلىگىن قولداۋ اياسىندا ءارى التىن-ۆاليۋتا قورىنىڭ تومەندەۋىنىڭ الدىن الۋ, ەكسپورت پەن يمپورت الماستىراتىن سالا كاسىپكەرلەرى ءۇشىن وتە ءتيىمدى. كەدەن وداعى شەڭبەرىندە وتاندىق وندىرۋشىلەردى ەكونوميكالىق تۇرعىدان قولداۋ بارىسىندا وتە قاجەت تەتىك.مايا ارزاەۆا,
ءال-فارابي اتىنداعى قازاق ۇلتتىق ۋنيۆەرسيتەتى
قارجى كافەدراسىنىڭ مەڭگەرۋشىسى,
ەكونوميكا عىلىمدارىنىڭ كانديداتى, دوتسەنت.
