بۇعان دەيىن اسحات ورازبەك بۇقارالىق اقپارات قۇرالدارىنا بەرگەن سۇحباتىندا جاڭا تەلەفون كودىنا كوشۋ بويىنشا رەسەيلىك تاراپپەن كەلىسسوزدەر جۇرگىزىلىپ جاتقانىن, ناتيجەسىندە قازاقستان +7 كودىن پايدالانا بەرۋى مۇمكىن ەكەنىن ايتقان بولاتىن. ونىڭ ايتۋىنشا, تەلەفون كودىن وزگەرتۋگە ءوتىنىش بەرۋ رەسەيمەن اراداعى كەلىسسوز ەرەكشەلىكتەرىنە بايلانىستى, رەسەيلىك تاراپ التى اي ىشىندە كەلىسىمدى ءبىر جاقتى بۇزا الادى.
تەلەفون ءنومىرى +997-گە وزگەرتۋگە بيۋدجەتتەن بولىنەتىن شىعىن تۋرالى اسحات ورازبەك بۇنداي تەحنيكالىق شاراعا مەملەكەتتىك بيۋدجەتتەن قاراجات بولىنبەيتىنىن ايتتى.
«+997-گە كوشۋگە بايلانىستى تەلەكوممۋنيكاتسيا جەلىلەرىندە جابدىقتى قايتا ورناتۋ جانە قايتا كونفيگۋراتسيالاۋ جۇمىستارى بايلانىس وپەراتورلارىنىڭ مەنشىكتى قاراجاتى ەسەبىنەن جۇرگىزىلەدى. قازىر پروتسەستەردى اۆتوماتتاندىرۋدىڭ تەحنولوگيالىق دەڭگەيى, ونىڭ مۇمكىندىكتەرى قازاقستاندىق بايلانىس وپەراتورلارىنىڭ جابدىقتارى جاڭا كودقا قيىندىقسىز اۋىسۋعا مۇمكىندىك بەرەدى», دەدى ۆيتسە-مينيستر بەرگەن جاۋابىندا.
مينيسترلىك تەلەفون كودىن وزگەرتۋ كەزىندە مەملەكەتتىك جانە جەكە قۇرىلىمداردىڭ شىعىندارى, تەلەفون نومىرىنە بايلانىستى تولەم قىزمەتتەرىنىڭ جۇمىسىنداعى قيىندىقتار تۋرالى ءتۇسىندىردى.
«حالىقارالىق تەلەكوممۋنيكاتسيا وداعىنىڭ ۇسىنىستارىنا سايكەس (E.164.1) ەنگىزىلگەن ساتتەن باستاپ جاڭا جانە ەسكى كودتار ەكى جىل بىرگە قولدانىلۋى مۇمكىن. بۇل تۋرالى ۇكىمەتتىك جانە كوممەرتسيالىق قۇرىلىمدار الدىن الا حاباردار بولادى. وسى ۋاقىت ىشىندە ءارتۇرلى تسيفرلىق قىزمەتتەردىڭ يەلەرى جاڭا كودقا كوشۋگە بايلانىستى وزگەرىستەردى ءوز قاراجاتى ەسەبىنەن جاسايتىن مۇمكىندىك يە بولادى», دەدى اسحات ورازبەك.
ەسكە سالايىق, بۇعان دەيىن حالىقارالىق كود قازاقستاندا +7-دەن +997-گە دەيىن وزگەرۋى مۇمكىن ەكەنى ايتىلدى. بۇل تۋرالى بۇرىن تسيفرلىق دامۋ, يننوۆاتسيا جانە اەروعارىش ونەركاسىبى ءمينيسترى باعدات مۋسين مالىمدەدى. ءمينيستردىڭ ايتۋىنشا, وپەراتور كودتارى وزگەرمەيدى.
