فەيسبۋكتىڭ بۇرىنعى قىزمەتكەرى فرەنسيس حوگاننىڭ ايتۋىنشا, كومپانيانىڭ باستى ماقساتى – جەلى قولدانۋشىلارىنىڭ قاۋىپسىزدىگى ەمەس, قارجىلىق پايدا تابۋ عانا. سەنات تىڭداۋىنا قاتىسقان ول فەيسبۋكقا تيەسىلى ينستاگرام الەۋمەتتىك جەلىسىنىڭ جاس قولدانۋشىلارعا, اسىرەسە بويجەتكەندەرگە كەسىرى تۋرالى مالىمدەپ, رەفورما جاساۋعا شاقىردى. سونىمەن قاتار ونىڭ ايتۋىنشا, فەيسبۋك پلاتفورماسىندا دەنساۋلىق ساقتاۋعا قاتىستى جالعان اقپاراتتىڭ تاراۋى – كومپانيا ونىمدەرىن وتكىزۋدىڭ قۇيتىرقى جولى. ءارى وسال توپتارعا مانيپۋلياتسيا جۇرگىزۋ دە كەڭىنەن قولدانىلىپ كەلگەن-مىس. وسى ورايدا سەناتورلار تسۋكەربەرگتىڭ ءوزى الداعى ۋاقىتتا كونگرەسس الدىندا جاۋاپ بەرۋگە ءتيىس دەپ وتىر.
«مەنىڭ بۇل جەرگە كەلىپ, كۋالىك ەتۋىمنىڭ باستى سەبەبى – فەيسبۋك ءبىزدىڭ قوعام ءۇشىن قانشالىقتى قاۋىپتى ەكەندىگىن ءتۇسىندىرۋ. ەڭ الدىمەن ءبىزدىڭ بالالارىمىز بەن دەموكراتيامىز ءۇشىن قاۋىپتى. بۇل كومپانيانىڭ كۇشى شەكتەن شىعىپ بارادى. قازىرگى كەزدە فەيسبۋك تەمەكى سياقتى دەڭگەيگە جەتتى. جاس بالالار ءوز-ءوزىن ۇستاي الماي وتىر. ينستاگرامنان باس المايدى. ال ول جەلىگە كىرگەن ادام ۇلكەن مانيپۋلياتسياعا ۇشىرايدى. ءتىپتى فەيسبۋكتىڭ سالدارىنان اجىراسىپ جاتقان وتباسىلار بار. سونىمەن قاتار فەيسبۋكتىڭ جۇرگىزىپ وتىرعان ساياساتى – ەفيوپيا سياقتى ەلدەردە ەتنيكالىق زورلىق-زومبىلىقتى تۋدىرۋدا», دەيدى فەيسبۋكتىڭ بۇرىنعى جوبا مەنەدجەرى فرەنسيس حوگان.
