ەلىمىزدە «جابىرلەنۋشىلەرگە وتەماقى قورى تۋرالى» زاڭ وتكەن جىلدىڭ 1 شىلدەسىنەن باستاپ قولدانىسقا ەنگىزىلدى. زاڭ جوباسى قىلمىستىق-پروتسەستىك كودەكسىنىڭ 173-بابىن ىسكە اسىرۋ ءۇشىن قارجى, ىشكى ىستەر مينيسترلىكتەرى جانە مۇددەلى مەملەكەتتىك ورگاندارمەن بىرگە ازىرلەنگەن بولاتىن. بريفينگتە زاڭنىڭ ىسكە اسىرىلۋ جولدارىن جان-جاقتى ءتۇسىندىرىپ وتكەن ءىىم وكىلى اتالعان ينستيتۋتتىڭ جابىرلەنۋشىلەردىڭ قۇقىقتارىن قالپىنا كەلتىرۋدە ەلەۋلى اسەر ەتەتىنىنە دە ەرەكشە ءمان بەردى.
«قىلمىستىق قۇقىق بۇزۋشىلىقتاردان زيان شەككەن جابىرلەنۋشىلەرگە وتەماقى تولەۋدى كوزدەيتىن زاڭ ەلىمىزدە العاش رەت قابىلدانىپ وتىر. قۇجات كىنالى ادامعا ۇستالعانعا جانە سوت ءىستى قاراعانعا دەيىن جابىرلەنۋشىنىڭ ەمدەۋگە, وڭالتۋعا, جەرلەۋگە كەتكەن شىعىندارىن تولىعىمەن وتەۋدى مىندەتتەيدى. ال بۇرىن جابىرلەنۋشىگە كەلتىرىلگەن زالالدىڭ ورنى ۇكىم زاڭدى كۇشىنە ەنگەننەن كەيىن سوتتىڭ شەشىمى بويىنشا عانا تولتىرىلاتىن», دەپ ءتۇسىندىرىپ ءوتتى پوليتسيا پولكوۆنيگى.
دەپارتامەنت باسشىنىڭ مالىمدەۋىنشە, زاڭ بويىنشا جابىرلەنۋشىلەرگە العاشقى بىرجولعى ماتەريالدىق كومەك كورسەتىلەدى. ول ءۇشىن قارجى مينيسترلىگىنىڭ قازىناشىلىق كوميتەتىندە زاڭدى تۇلعا بولىپ تابىلمايتىن, قولما-قول اقشانى باقىلاۋ شوتى بار ارنايى قور قۇرىلعان. ءبىر ايتا كەتەرلىگى, بۇل قور مەملەكەتتىك بيۋدجەتتەن قارجىلاندىرىلمايدى. قور قىلمىستىق قۇقىق بۇزۋشىلىقتاردى جاساعانى ءۇشىن ءوندىرىپ الاتىن ءماجبۇرلى تولەمدەر جانە پروتسەستىك مىندەتتەردى ورىنداماعانى ءۇشىن سوت سالاتىن اقشالاي ءوندىرىپ الۋلاردان تولتىرىلىپ وتىرادى. سونداي-اق قوردى تولتىرۋدىڭ تۇزەۋ جۇمىستارى مەن رەگرەستىك تالاپتار تارتىبىمەن ءوندىرىپ الىنعان اقشا جانە قازاقستان زاڭناماسىندا تىيىم سالىنباعان وزگە دە قارجى كوزدەرى قاراستىرىلعان.
«زاڭدا قىلمىستاردىڭ 124 قۇرامى بويىنشا جابىرلەنۋشىلەردىڭ ءۇش ساناتىنا وتەماقى تولەنەدى. ءبىرىنشى ساناتقا سەكسۋالدىق زورلىق-زومبىلىققا تاپ بولعان كامەلەتكە تولماعاندار, ادام ساۋداسى جانە ازاپتاۋعا ۇشىراعان جابىرلەنۋشىلەر جاتادى. ولارعا تولەنەتىن وتەماقىنىڭ مولشەرى شامامەن 90 مىڭ تەڭگە. ال دەنساۋلىعىنا اۋىر زيان كەلتىرىلگەن نە يممۋن تاپشىلىعى ۆيرۋسىن (ايتۆ/جيتس) جۇقتىرعان ەكىنشى ساناتتاعى ادامدارعا 120 مىڭ تەڭگە كولەمىندە وتەماقى تولەنەدى», دەپ زاڭ تالاپتارىنا ەگجەي-تەگجەي توقتالعان س.ءادىلوۆ ءۇشىنشى سانات – جابىرلەنۋشى قايتىس بولعان جاعدايدا بەرىلەتىن وتەماقىنىڭ 150 مىڭ تەڭگە كولەمىندە ەكەنىن دە مالىمدەدى.
«تولەمدەردىڭ تىزبەسىن سوتقا دەيىنگى تەرگەپ-تەكسەرۋ ورگاندارى جۇرگىزىپ, اي سايىن قازىناشىلىققا ۇسىنىپ وتىرادى. الايدا ازىق-ت ۇلىك باعاسىنىڭ كۇن ساناپ قىمباتتاپ جاتقانى بارشاعا بەلگىلى. جالپى, حالىق ءومىرىنىڭ قىمباتتاۋىن ەسكەرە وتىرىپ, ءىىم قارجى مينيسترلىگىنە جابىرلەنۋشىلەرگە تولەنەتىن وتەماقىنىڭ مولشەرىن كوبەيتۋ تۋرالى ۇسىنىس تا جولدادى», دەپ اتاپ ءوتتى سپيكەر.
ناقتى مالىمەتتەرگە سۇيەنەر بولساق, 2020 جىلدىڭ ەكىنشى جارتى جىلدىعىندا 260-تان استام جابىرلەنۋشىگە 22 640 000 تەڭگە كولەمىندە وتەماقى تولەنگەن. الايدا بريفينگ بارىسىندا س.ءادىلوۆ بۇل كورسەتكىشتىڭ جىل سايىن ءوسىپ كەلە جاتقانىن دا حابارلادى.
