نۇر-سۇلتان, شىمكەنت قالالارى مەن الماتى, شىعىس قازاقستان جانە ماڭعىستاۋ وبلىستارىندا ىسكە قوسىلعان «وتباسىنداعى زورلىق-زومبىلىقسىز قازاقستان» قاناتقاقتى جوباسى تۋرالى كەڭىنەن ماعلۇمات بەرىلگەن وتىرىسقا ۇلتتىق كوميسسيا مۇشەلەرى, پارلامەنت دەپۋتاتتارى, ورتالىق مەملەكەتتىك جانە جەرگىلىكتى اتقارۋشى ورگانداردىڭ, ۇكىمەتتىك ەمەس ۇيىمدار مەن باق وكىلدەرى قاتىستى. باسقوسۋدى اشقان ۇلتتىق كوميسسيا باسشىسى ءلاززات رامازانوۆا مەملەكەت باسشىسىنىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» جولداۋىندا العا قويىلعان مىندەتتەر مەملەكەتتىك جانە جەرگىلىكتى اتقارۋشى ورگانداردان قازاقستاندىق وتباسىلاردىڭ ءال-اۋقاتىن جاقسارتۋ جانە ايەلدەردىڭ قۇقىقتارى مەن مۇمكىندىكتەرىن كەڭەيتۋ ءۇشىن جوعارى جاۋاپكەرشىلىك پەن ۇيلەسىمدى ءىس-قيمىلدى تالاپ ەتەتىنىن اتاپ ءوتتى.
«وتباسى ءال-اۋقاتىنىڭ ماسەلەلەرى, تۇرمىستىق زورلىق-زومبىلىقتىڭ جۇيەلى الدىن الۋ بويىنشا قوعامدىق ۇيىمدارمەن ءتيىمدى ءوزارا ءىس-قيمىل جاساۋ, قيىن جاعدايعا تاپ بولعان ازاماتتارعا ۋاقتىلى كومەك كورسەتۋ ماسەلەلەرى ۇلتتىق كوميسسيا جۇمىسىنىڭ باسىم باعىتى بولىپ قالا بەرەدى», دەپ اتاپ ءوتتى ءلاززات رامازانوۆا.
تۇرمىستىق زورلىق-زومبىلىقتىڭ جاي-كۇيىن تالداۋ ەلىمىزدەگى ءاربىر ەكىنشى قىلمىستىڭ ماس كۇيدە جاسالاتىنىن, زاڭسىز ارەكەتتەردىڭ 70-75 پايىزى تۇرعىن ءۇي-جايلاردا تىركەلەتىنىن كورسەتىپ وتىر. سونداي-اق وتباسىلىق-تۇرمىستىق قۇقىق بۇزۋشىلىقتىڭ 80 پايىزىندا زورلىق-زومبىلىق سۋبەكتىلەرى – ەرلى-زايىپتى نەمەسە ازاماتتىق نەكەدە تۇرعان ادامدار بولسا, 20 پايىزى وزگە تۋىستىق قاتىناستاعى ادامدار.
قولعا الىنعان ءىس-شارالارعا قاراماستان, ءالى دە شەشۋدى تالاپ ەتەتىن ماسەلە از ەمەس. باسقوسۋ بارىسىندا اۋماقتاردى دامىتۋ جوسپارلارىندا وتباسى ينستيتۋتىن نىعايتۋ جانە تۇرمىستىق زورلىق-زومبىلىقتىڭ الدىن الۋ ماسەلەلەرى بويىنشا نىسانالى ينديكاتورلاردىڭ جوق ەكەنى ايتىلدى. بۇل رەتتە جەرگىلىكتى اتقارۋشى ورگانداردىڭ قۇزىرەتى دە ناقتىلانباعان. الدىن الۋ جۇيەسىنە ادىلەت, مادەنيەت جانە سپورت, ىشكى جانە جاستار ساياساتى ورگاندارى تارتىلماعان.
بۇل ورايدا كوميسسيا باسشىسى جۇيەلى مونيتورينگ جۇرگىزۋ, الەۋمەتتىك قولايسىزدىق پەن تۇرمىستىق زورلىق-زومبىلىق ماسەلەلەرى بويىنشا ۆەدومستۆوارالىق ءوزارا ءىس-قيمىلدى جانە جەدەل دەن قويۋ تەتىكتەرىن نىعايتۋ قاجەتتىگىن ءسوز ەتتى.
وتىرىستا ەڭبەك جانە حالىقتى الەۋمەتتىك قورعاۋ مينيسترلىگى مەن ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ ۇلتتىق ستاتيستيكا بيۋروسىنىڭ وڭىرلەردەگى وتباسىلاردىڭ ءال-اۋقاتىنا مونيتورينگ جۇرگىزۋ ناتيجەلەرى جانە قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىنىڭ ينديكاتورلارىن ەسەپتەۋ ادىستەمەسى تۋرالى اقپاراتى تىڭدالدى.
مينيسترلىكتىڭ اقپاراتى بويىنشا, «وتباسىنىڭ تسيفرلى كارتاسىن» ەنگىزۋ جوسپارلانۋدا. «ەلىمىزدىڭ 19 ميلليون تۇرعىنىنا تالداۋ جۇرگىزىلدى, 5 ميلليون 341 مىڭ وتباسىنىڭ تسيفرلى كارتالارى قالىپتاستىرىلدى. بۇگىنگى تاڭدا وتباسىلاردىڭ 2,7 ميلليون نەمەسە 50,6%-ى قولايلى جانە جاقسى دەڭگەيگە جاتادى. اتاۋلى الەۋمەتتىك كومەكپەن قامتۋ 2020 جىلدىڭ ۇقساس كەزەڭىمەن سالىستىرعاندا 186,2 مىڭ وتباسىعا دەيىن نەمەسە 891,1 مىڭ ادامنان استام ءوستى, ءوسىم 25%-دى قۇرادى», دەلىنگەن ۆەدومستۆو تاراتقان مالىمەتتە.
ال ۇلتتىق ستاتيستيكا بيۋروسى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ شەڭبەرىندە 9 نىسانالى ينديكاتور بويىنشا ەسەپتەۋ ادىستەمەسىن ازىرلەگەن. ول وتباسىلىق جانە گەندەرلىك ساياساتتى ىسكە اسىرۋ تيىمدىلىگىنىڭ نەگىزگى كورسەتكىشتەرىن قالىپتاستىرۋ ءتارتىبىن جۇيەلەندىرۋگە, دەرەكتەردى جيناۋ, ۇسىنۋ جانە ولاردى ساقتاۋ ءۇشىن ۋاكىلەتتى مەملەكەتتىك ورگانداردىڭ جاۋاپكەرشىلىگىن بەكىتۋگە مۇمكىندىك بەرەدى.
وتىرىس سوڭىندا كوميسسيا توراعاسى ءلاززات رامازانوۆا مەملەكەتتىك ورگاندارعا بىرقاتار ناقتى ۇسىنىس ايتىپ, ورتاق جۇمىستاردى پىسىقتادى.
