ەلباسى ديپلوماتيالىق كورپۋسپەن ءداستۇرلى كەزدەسۋ وتكىزدى
كەشە ەلباسى نۇرسۇلتان نازارباەۆ قازاقستانداعى شەتەلدىك ديپلوماتيالىق ميسسيالار جانە حالىقارالىق ۇيىمدار باسشىلارىمەن كەزدەستى.
بۇل كەزدەسۋ بىزدە ءداستۇرلى تۇردە وتكىزىلىپ كەلەدى, دەپ باستادى ءسوزىن پرەزيدەنت. قازاقستان سىزدەر وكىلدىك ەتىپ وتىرعان بارلىق ەلدەرمەن دوستىق قارىم-قاتىناستى نىعايتۋعا مۇددەلى. بىلتىر قازاقستاندا تىركەلگەن ديپلوماتيالىق كورپۋس قۇرامىنىڭ ۇشتەن ءبىر بولىگى جاڭاردى. جاڭا ەلشىلەردى قازاقستاندا تىڭنان قىزمەت ىستەۋگە كىرىسكەندەرىمەن قۇتتىقتايمىن, دەدى ەلباسى. ءبىزدىڭ حالقىمىزدا «ەلدەستىرمەك – ەلشىدەن» دەگەن جاقسى ءسوز بار. سىزدەر استاناداعى بۇرىننان قىزمەت ەتىپ كەلە جاتقان ارىپتەستەرىڭىزبەن بىرگە جوعارى دەڭگەيدەگى ىنتىماقتاستىقتى تەرەڭدەتە ءتۇسۋگە ءوز ۇلەستەرىڭىزدى قوساتىندارىڭىزعا سەنەمىن. ءبىز ءوز تاراپىمىزدان سىزدەردىڭ الاڭسىز قىزمەت ەتۋلەرىڭىزگە بارلىق جاعدايدى جاساۋعا دايىنبىز. بارشالارىڭىزعا قازاقستانداعى لايىقتى جانە يگىلىكتى قىزمەتتەرىڭىز ءۇشىن زور تابىس تىلەيمىن.
ودان ءارى پرەزيدەنت كەزدەسۋدىڭ الەمدىك ماڭىزدى وقيعا – سوچي وليمپياداسىنىڭ قارساڭىندا ءوتىپ وتىرعانىن اۋىزعا الا كەلىپ, ونىڭ ۇيىمداستىرۋشىسى, قازاقستاننىڭ ستراتەگيالىق ارىپتەسى رەسەي فەدەراتسياسىنا وليمپيادانىڭ جاقسى ءوتۋىن جانە بارلىق ەلدەردىڭ ۇلتتىق كوماندالارىنا بيىك تابىستار تىلەيتىنىن جەتكىزدى. سىزدەردىڭ ەلدەرىڭىز قازاقستاننىڭ 2022 جىلى الماتىدا ءححىV قىسقى وليمپيادانى وتكىزۋگە بەرگەن ءوتىنىشىن قولدايدى دەپ سەنەمىن, دەدى وسى ورايدا پرەزيدەنت.
ءوزىنىڭ جۋىردا جاساعان جولداۋىنا توقتالا كەلىپ, ن.نازارباەۆ ونىڭ قازاقستان دامۋىنداعى جاڭا كەزەڭدى باستاپ بەرگەنىن ايتتى. وندا قازاقستاننىڭ الەمنىڭ ەڭ جوعارى دامىعان 30 ەلىنىڭ قاتارىنا ءوتۋ جولىنداعى دامۋىنىڭ باستى باعىتتارى مەن ناقتى مىندەتتەرى بەلگىلەنگەن. ءبىز ءوز ماقساتىمىزعا ءححى عاسىردىڭ العاشقى جارتىسىندا-اق جەتەمىز دەپ مەجەلەپ وتىرمىز. ءبىزدىڭ «قازاقستان-2050» ستراتەگيامىز قازاقستانمەن دوستىققا مۇددەلى بارلىق ەلدەرمەن كەڭ قۇلاشتى كەلىسسوزدەر جۇرگىزۋدى جانە ءوزارا ءتيىمدى ىنتىماقتاستىق ورناتۋدى قاراستىرادى. ەڭ ءبىرىنشى كەزەكتە بۇل ينۆەستيتسيالىق ىنتىماقتاستىقتى, تەحنولوگيالارمەن الماسۋدى, يننوۆاتسيالىق يمپورتتى جانە قازاقستاندىق ونىمدەردىڭ ەكسپورتىن قامتيدى. وسى ورايدا مەن شەتەلدىك ىسكەرلەردى ەكونوميكانىڭ بارلىق سالالارى بويىنشا قازاقستانمەن تىعىز ىنتىماقتاستىق ورناتۋعا شاقىرامىن, دەدى پرەزيدەنت.
ودان ءارى ەلباسى قازاقستاننىڭ تاۋەلسىزدىك جىلدارىندا اتقارعان ىستەرىنە قىسقاشا شولۋ جاساپ ءوتتى. سونىڭ ىشىندە, 2000 جىل مەن 2013 جىل ارالىعىندا قازاقستاندىقتار تۋريستىك جانە ىسكەرلىك ساپارلارمەن شەتەلدەرگە 61 ميلليوننان استام رەت جولعا شىققاندارىن ايتتى. ونداعان مىڭ قازاقستاندىق جاستار دامىعان شەتەلدەردەن ءبىلىم الدى جانە ءالى دە وقىپ جاتىر. سوندىقتان دا قازاقستاندىقتار جوعارى دامىعان ەلدەردىڭ دامۋ قاعيداتتارى مەن ستاندارتتارىنا لايىقتى ءومىر ءسۇرۋ شارتتارىن جاساعىسى كەلەدى. ەكىنشىدەن, ءبىز سەرپىندى دامۋ عانا ءححى عاسىردا ءبىزدىڭ تاۋەلسىزدىگىمىزگە كەپىلدىك بەرە الاتىنىن كورىپ وتىرمىز. وسى سەبەپتى ءبىزدىڭ جالپىۇلتتىق يدەيامىز ءبىر ماقسات, ءبىر مۇددە, ءبىر بولاشاقتى كوزدەپ, ءبىرتۇتاس ەلىمىز قولداعان ماڭگىلىك ەل بولىپ تابىلادى. ول وتە ومىرشەڭ كۇشكە يە, ءوزىنىڭ ۇلى مۇمكىندىكتەرى مەن لايىقتى بولاشاعىنا حالقىمىزدى سەندىرە الادى, دەدى مەملەكەت باسشىسى.
ۇشىنشىدەن, ءبىز الداعى 15-17 جىل ۋاقىت ءبىزدىڭ ەلىمىزدىڭ كەڭ قۇلاشپەن قارقىندى دامۋىنا «مۇمكىنشىلىكتەر تىنىسىن» اشادى دەپ سانايمىز. ءبىزدىڭ ستراتەگيالىق جوسپارلاۋداعى تاجىريبەمىز وسى ۋاقىتتار ارالىعىندا دامۋعا ءبىرشاما جايلى گەوساياسي جانە گەوەكونوميكالىق جاعداي بولاتىنىن بولجاپ وتىر. ارينە, جاھاندىق قاتەرلەردى دە جوققا شىعارۋعا بولمايدى. سوندىقتان دا ءبىز ايماقتىق باسەكەلەستىك ارتىقشىلىقتاردى قولدانۋعا جانە ەسەلەۋگە مىندەتتىمىز. تورتىنشىدەن, قازاقستان ءوزىن لايىقتى جانە ادىلەتتى الەمنىڭ لايىقتى بولشەگى دەپ بىلەدى, دەي كەلىپ, ەلباسى ءوزىنىڭ 2012 جىلعى G-GLOBAL يدەياسىنىڭ جاھاندىق دەڭگەيدەگى پروبلەمالاردى شەشۋگە ۇسىنعان بەلسەندى ارەكەتى دەپ سانايتىنىن جەتكىزدى. قازاقستاننىڭ وسىنداي ءرولى بارىن سەزىنۋ – ءبىزدىڭ ماڭگىلىك ەل يدەيامىزدىڭ ماڭىزدى قۇرامداس بولىگى ەكەنىن كورسەتەتىنىن كولدەنەڭ تارتتى.
پرەزيدەنت, بەسىنشىدەن, قازاقستاننىڭ وتە كۇردەلى, سونىمەن بىرگە, جەمىستى رەفورمالاردى ىسكە اسىرا العانىن ايتتى. بۇگىنگى كۇنى ءبىزدىڭ تاجىريبەمىزدى ەۋرازيادا جانە بۇكىل الەمدە كوپتەگەن دامۋشى ەلدەر وزىنە ۇلگى ەتۋدە. الەمدىك داعدارىستىڭ ەڭ قيىن كەزەڭدەرىندە دە ءبىزدىڭ ەكونوميكامىز دامۋدىڭ العا باسۋشى ديناميكاسىن ۇستاي ءبىلدى. وتكەن جىلى ەلىمىز باسەكەلەستىككە قابىلەتتىلىكتىڭ جاھاندىق يندەكسىندە 50-ءشى ورىنعا تابان تىرەدى. بيزنەستى جۇرگىزۋدىڭ جەڭىلدىگى جونىنەن 49-شى ورىنعا كوتەرىلدىك. 2013 جىلدىڭ قورىتىندىسى بويىنشا ءىجو ءوسىمى 6 پايىزدى قۇرادى. جۇمىسسىزدىق 5 پايىز دەڭگەيىندە. ەلدىڭ جالپىلاما ايتقانداعى حالىقارالىق رەزەرۆىنىڭ كولەمى 100 ملرد. دوللارعا جەتىپ قالدى. وسىلاي دەي كەلىپ, ەلباسى ودان ءارى ەلىمىزدە جۇرگىزىلىپ جاتقان جاڭعىرتۋ باعدارلاماسىنىڭ جۇمىستارىنا توقتالدى.
سونىڭ ىشىندە 4 جىلدا 780 جاڭا كاسىپورىننىڭ ىسكە قوسىلعانى, 160 مىڭ جاڭا جۇمىس ورىندارىنىڭ اشىلعانى, 70 ملرد. دوللارلىق باعدارلاما تولىق ىسكە اسقاندا 950 كاسىپورىن پايدالانۋعا بەرىلىپ, 250 مىڭ جاڭا جۇمىس ورىندارى اشىلاتىنى جەتكىزىلدى. وسى باعدارلامانىڭ ىسكە اسۋ ناتيجەسىندە قازاقستاندا بۇرىن ەشقاشان شىعارىلماعان 250 ءتۇرلى ءونىم شىعارىلاتىن بولادى, دەدى پرەزيدەنت. ءبىز ۇلى جىبەك جولىن جاڭعىرتۋدامىز. 2015 جىلى «باتىس ەۋروپا–باتىس قىتاي» كولىك ءدالىزىنىڭ قازاقستاندىق ۋچاسكەسى تولىعىمەن ىسكە قوسىلاتىن بولادى. سوڭعى جىلدارى ءبىز ءوزىمىزدىڭ ارىپتەستەرىمىزبەن بىرگە قىتاي مەن وڭتۇستىك-شىعىس ازياعا, يران جانە پارسى شىعاناعىنا شىعارا الاتىن تەمىرجول ماگيسترالدارىن تارتتىق. ءبىلىم بەرۋ سالاسىندا دا وڭ وزگەرىستەر بار. ءبىزدىڭ ماقساتىمىز – قازاقستاندى ەۋرازياداعى ءبىلىم بەرۋدىڭ تاڭداۋلى ورتالىعىنا اينالدىرۋ. سونداي-اق, جۇرەككە جانە باسقا دا ورگاندارعا وتا جاساۋ مەن اۋىستىرۋ ءبىز ءۇشىن كۇندەلىكتى شارۋانىڭ بىرىنە اينالدى.
كەلەسى كەزەكتە ن.نازارباەۆ دامىعان 30 ەلدىڭ قاتارىنا ەنۋ تۇجىرىمداماسىنىڭ ناقتى مىندەتتەرىنە توقتالدى. سونىڭ ىشىندە بەسجىلدىق جوسپارلار نەگىزىندە يندۋستريالاندىرۋ ترەندىنىڭ كۇشەيتىلەتىنى, اگرارلىق سالادا ەڭبەك ونىمدىلىگىنىڭ ارتتىرىلاتىنى, ەت جانە ءسۇت ونىمدەرى بويىنشا قازاقستاندى قۋاتتى ايماقتىق ورتالىققا اينالدىرۋ جوسپارلانعانى, ەكونوميكادا عىلىمدى تەرەڭىرەك قولدانۋ ماڭىزدى قۇرال رەتىندە قاراستىرىلاتىنى, ول ءۇشىن عىلىمعا بولىنەتىن قاراجات ءىجو-ءنىڭ 3 پايىزىنا كوتەرىلەتىنى, ينفراقۇرىلىمدار جەتىلدىرىلىپ, سالىق سالۋ رەجىمى جەڭىلدەتىلەتىنى ايتىلدى. ەلباسى ۇلتتىق ينفراقۇرىلىمداردى سەرپىندى دامىتۋ جوسپارلارى اراسىنداعى بىرنەشە ناقتى جۇمىستاردى دا اتاپ ءوتتى. استانا مەن الماتىدا, كەيىننەن شىمكەنت پەن اقتوبەدە اسا ءىرى اگلومەراتسيا قۇرۋ ويىمىزدا بار. بۇلار ەكونوميكالىق جانە الەۋمەتتىك-مادەنيەتتىك ءوسىمنىڭ ۋربانيستيكالىق ورتالىقتارى بولادى, دەدى پرەزيدەنت.
قازاقستانداعى ەنەرگەتيكانىڭ دامۋى يادرولىق قۋاتپەن بايلانىستىرىلاتىنى دا اتالىپ ءوتتى. بۇگىنگى كۇنى قازاقستان ۋران رۋداسىن ءوندىرۋ بويىنشا الەمدە الدىڭعى ورىنداردىڭ بىرىنە شىعىپ وتىر جانە ونى تولىق تسيكلىنە جەتكىزۋ جولىنداعى بايىتۋ ماسەلەلەرى شەشىلۋدە. پەرسپەكتيۆادا ءبىز اتوم ەلەكتر ستانساسىن سالۋدى جوسپارلاپ وتىرمىز, دەدى پرەزيدەنت. سونىمەن بىرگە, جاڭا مۇناي وڭدەۋ زاۋىتى سالىناتىن بولادى. بۇل سىزدەردىڭ ەلدەرىڭىزبەن ءوزارا ءتيىمدى ىنتىماقتاستىق جاساۋعا جاقسى مۇمكىنشىلىكتەر تۋدىرادى. استانادا ەكسپو-2017 حالىقارالىق كورمەسىن وتكىزۋ بويىنشا قۇرىلىسقا قاتىسۋعا مۇددەلى ەلدەر بولسا, ىنتىماقتاستىققا شاقىرامىن. ەلدە ادال باسەكەلەستىككە, ادىلەتتىككە, زاڭنىڭ ۇستەمدىگىنە, جوعارى قۇقىقتىق مادەنيەتكە لايىقتى احۋال تۋدىرۋ ءۇشىن دە كوپتەگەن ناقتى شارالار اتقارىلۋ ۇستىندە.
كەلەسى كەزەكتە نۇرسۇلتان ءابىش ۇلى «قازاقستان-2050» ستراتەگياسىنىڭ ۇزاقمەرزىمدى مىندەتتەرى ەسكەرىلە وتىرىپ, سىرتقى ساياساتتىڭ 2020 جىلعا دەيىنگى جاڭا تۇجىرىمداماسى بەكىتىلگەنىن جانە ول اشىق سيپاتقا يە ەكەنىن ايتتى. وندا جالپىالەمدىك ترەندتەر ەسكەرىلىپ, بۇكىل الەمدەگى ارىپتەستەرىمىزبەن ءتيىمدى ءوزارا ىنتىماقتاستىق قاپەرگە الىنعان. بۇگىندە جاھاندىق ەكونوميكادا ءبىراز ىلگەرىلەۋلەر بايقالۋدا. بولجامدار ەۋروپادا, اقش جانە وزگە دە ەلدەردە ەكونوميكالىق ءوسىم ۇردىستەرىنىڭ كۇشەيىپ كەلە جاتقاندىعىن كورسەتىپ وتىر, دەدى قازاقستان پرەزيدەنتى. وسىعان بايلانىستى مەملەكەت باسشىسى بىرقاتار حالىقارالىق ماسەلەلەردى نازاردا ۇستاۋ قاجەت دەپ ەسەپتەيتىنىن جەتكىزدى. جاھاندىق ەكونوميكانىڭ تسيكلدىك سيپاتىن دا ۇمىتپاۋ كەرەك. وسۋدەن سوڭ قۇلدىراۋ بار. تاريحتا مۇنداي جاعداي بىرنەشە رەت قايتالانعان. سوندىقتان الەم جانە قازاقستان جاھاندىق ەكونوميكاداعى كەز كەلگەن بەتبۇرىس پەن حالىقارالىق ساياساتقا دايىن بولۋعا ءتيىس. سونداي-اق, ءوسۋ كەزەڭىندە قاۋىپسىزدىكتى قامتاماسىز ەتۋ ماسەلەلەرىنىڭ ماڭىزى دا ارتادى. كارى قۇرلىق پەن جاڭا الەمنىڭ بىرقاتار ەلدەرىندە الەۋمەتتىك پروبلەمالاردىڭ ءالى دە شەشىلمەۋىنەن ىشكى قاقتىعىستاردىڭ جوعارى دەڭگەيدەگى قاۋىپ-قاتەرى ساقتالىپ وتىر, دەدى ن. نازارباەۆ.
سونداي-اق, پرەزيدەنت سيرياداعى احۋالدى رەتتەۋ جونىندەگى جەنەۆا كەلىسسوزدەرىنىڭ باستالۋىن قۇپتايتىنىن جانە ونىڭ تابىستى وتۋىنەن ءۇمىتتى ەكەنىن جەتكىزدى. سونىمەن بىرگە, قازاقستاننىڭ تاعى ءبىر ماڭىزدى حالىقارالىق پروبلەمانى – يران يادرولىق باعدارلاماسى تۇيتكىلىن شەشۋگە قاتىسقانىن اتاپ ءوتتى. الماتىدا وسى ماسەلەنى رەتتەۋ پروبلەمالارى جونىندە كوپتاراپتى كەلىسسوزدەردىڭ ەكى راۋندى ءوتتى, دەدى ەلباسى.
پرەزيدەنتتىڭ سوزىندە قازاقستاننىڭ باسقا مەملەكەتتەرمەن ىنتىماقتاستىق اياسىن كەڭەيتۋ ماسەلەسىنە كوپ ورىن بەرىلدى. وتكەن جىلدىڭ وزىندە عانا ەلىمىزگە رەسەي, قىتاي, ەۋروپالىق كوميسسيا, ۇلىبريتانيا, يندونەزيا, يسپانيا, بەلارۋس, قىرعىزستان, تۇركىمەنستان, فينليانديا, لاتۆيا باسشىلارى كەلدى. كاسپي ماڭى ەلدەرىمەن ءبىرلەسكەن جۇمىسىمىزدىڭ باسىم باعىتتارىنىڭ ءبىرى – كاسپي تەڭىزىنىڭ قۇقىقتىق مارتەبەسىن انىقتاۋ. قازاقستان داعدارىسقا قارسى دۇنيەجۇزىلىك كونفەرەنتسيا ۇيىمداستىردى. ول بۇۇ-دان قولداۋ تاۋىپ, استانا ەكونوميكالىق فورۋمى اياسىندا ءوتتى. رەسەي فەدەراتسياسى, قحر, كورشىلەس ورتالىق ازيا مەملەكەتتەرىمەن, اقش جانە ەۋروپا وداعى ەلدەرىمەن دوستىق پەن ىنتىماقتاستىقتى دامىتۋ – ماڭىزدى مىندەت. قازاقستان باتىس جارتى شارداعى مەملەكەتتەرمەن, وڭتۇستىك-شىعىس ازيا جانە افريكامەن ىنتىماقتاستىق اياسىن كەڭەيتتى. ۆەتنام مەن وڭتۇستىك افريكا رەسپۋبليكاسىندا قازاقستان ەلشىلىكتەرى اشىلدى. بيىل ەفيوپيادا, مەكسيكا مەن كۋۆەيتتە ەلشىلىكتەرىمىز اشىلاتىن بولادى, دەدى قازاقستان پرەزيدەنتى.
ەلباسى ەلىمىزدىڭ بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە سايلانۋ ناۋقانىن رەسمي تۇردە باستاعانىن ەسكە سالدى. وسىعان وراي, نۇرسۇلتان نازارباەۆ وكىلدەرى قاتىسىپ وتىرعان ەلدەردىڭ ۇكىمەتتەرىنە قازاقستاننىڭ كانديداتۋراسىن قولداۋعا شاقىرعان ۇندەۋ تاستادى.
پرەزيدەنت ەۋرازيانىڭ ورتالىعىندا ورنالاسقان مەملەكەت رەتىندە ءبىزدىڭ ەلىمىز ءۇشىن ينتەگراتسيالىق ۇدەرىستەرگە قاتىسۋدىڭ ومىرلىك ماڭىزى بار ەكەنىن ايتتى. سونداي-اق, بۇكىل ورتالىق ازيانىڭ تابىستى دامۋىنىڭ كەپىلى دە ىشكى وڭىرلىك ينتەگراتسيانى بەلسەندى ىلگەرىلەتۋ بولاتىنىن اتاپ ءوتتى. بۇعان قوسا, مەملەكەت باسشىسى قازاقستان سىرتقى ساياساتتىڭ مادەني-گۋمانيتارلىق ولشەمدەرىنىڭ بارلىق قىرلارىنا, سونىڭ ىشىندە, دامۋعا رەسمي كومەك كورسەتۋ جونىندەگى حالىقارالىق ىنتىماقتاستىققا دا زور ءمان بەرەتىنىن جەتكىزدى.
ءسوزىنىڭ سوڭىندا پرەزيدەنت ديپلوماتيانىڭ ءاردايىم پاتريوتتىق ونەگەنىڭ جوعارى ساتىسى بولعانىنا جانە سولاي بولىپ قالا بەرەتىنىنە توقتالدى. بارلىق ەلشىلەرگە, ديپلوماتيالىق ميسسيالار مەن حالىقارالىق ۇيىمدار وكىلدىكتەرىنىڭ باسشىلارىنا قازاقستان رەسپۋبليكاسىنداعى لايىقتى جانە ءمارتەبەلى ميسسيالارىڭىز ءۇشىن زور ريزاشىلىعىمدى بىلدىرەمىن. ءبىز ەكونوميكانى, ساياساتتى جانە قوعام ءومىرىن ودان ءارى دامىتۋ ءۇشىن وزگە ەلدەردىڭ ءتاجىريبەسىن الاتىن بولامىز. سىزدەرگە جۇمىستا تابىس, وتباسىلارىڭىزعا باقىت پەن اماندىق تىلەيمىن, دەدى نۇرسۇلتان نازارباەۆ.
ديپلوماتيالىق كورپۋس دۋايەنى, رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى ميحايل بوچارنيكوۆ قازاقستان پرەزيدەنتىنىڭ ديپلوماتيالىق ميسسيالار مەن حالىقارالىق ۇيىمدار وكىلدىكتەرىنىڭ باسشىلارىمەن قالىپتاسقان ءداستۇرلى كەزدەسۋىن ديپلوماتتار جوعارى باعالايتىنىن اتاپ كورسەتتى. ءوزىمىز كەلىپ وتىرعان ەلدە بولىپ جاتقان ۇدەرىستەردىڭ باعاسىن, ونىڭ بولاشاق دامۋ باعىتتارىن مەملەكەت باسشىسىنىڭ ءوز اۋزىنان ەستۋ ديپلوماتتار ءۇشىن وتە ماڭىزدى. 2013 جىل قازاقستاندى الەمدەگى ەڭ دامىعان 30 ەلدىڭ قاتارىنا قوسۋدى ماقسات ەتكەن «قازاقستان-2050» ستراتەگياسىن ىسكە اسىرۋدىڭ العاشقى جىلى بولدى. بۇل جىلى ايتارلىقتاي ەكونوميكالىق قيىنشىلىقتار كەزدەستى. الايدا, قازاقستان دامۋىنىڭ ۇزاق جىلدار بويى ساقتالىپ كەلە جاتقان وڭ ديناميكاسىن اتاپ ءوتۋ ءبىز ءۇشىن سۇيسىنەرلىك جايت, دەدى م.بوچارنيكوۆ.
ديپلوماتيالىق كورپۋس دۋايەنى ەكونوميكالىق جانە قارجىلىق تۇراقتىلىق قازاقستاننىڭ حالىقارالىق بەدەلىن نىعايتاتىنىن اتاپ ءوتتى. سونداي-اق, ول قازىرگى ۋاقىتتا قازاقستان الەمنىڭ 158 ەلىمەن ديپلوماتيالىق قارىم-قاتىناس ورناتقانىن, ونىڭ 67-سىندە ديپلوماتيالىق وكىلدىكتەرى بار ەكەنىن ايتتى. ول ديپلوماتيالىق كورپۋسقا كورسەتىلگەن ىقىلاس پەن ولاردىڭ قىزمەت ەتۋىنە جاسالعان قولايلى جاعداي ءۇشىن ريزاشىلىعىن ءبىلدىرىپ, رەسەي فەدەراتسياسىنىڭ ەلشىسى رەتىندە سوچيدەگى قىسقى وليمپيادانى تابىستى وتكىزۋگە قاتىستى يگى تىلەكتەر ءۇشىن العىسىن جەتكىزدى.
جاقسىباي سامرات,
«ەگەمەن قازاقستان».
سۋرەتتەردى تۇسىرگەندەر س.بوندارەنكو, ب.وتارباەۆ.
