قازاقستان ۇكىمەتى مەن رەسەيلىك سبەر كومپانيالار توبى اراسىندا جاسالعان مەموراندۋمنىڭ تولىق ءماتىنى جاريالاندى. قۇجاتتىڭ اتاۋى: «تسيفرلىق ترانسفورماتسيا, تسيفرلاندىرۋدىڭ پلاتفورمالىق مودەلىنە جانە «Data-Driven Government» تۇجىرىمداماسىنا كوشۋ جونىندەگى جوبالاردى ىسكە اسىرۋ سالاسىنداعى ىنتىماقتاستىق تۋرالى مەموراندۋمعا قول قويۋ تۋرالى».
تسيفرلىق پلاتفورمالىق شەشىمدەردى قۇرۋعا ارنالعان تەحنولوگيالارى, تاجىريبەسى مەن قۇرالدارى بار سبەر كومپانيالار توبى ستراتەگيالىق ارىپتەس رەتىندە قازاقستاندىق باعدارلامالىق قامتىلىمدى ازىرلەۋشى – «BTS Digital» جشس-نى (قازاقستان رەسپۋبليكاسى ۇكىمەتىنىڭ 40% ۇلەسى بار ERG توبىنىڭ ەنشىلەس كومپانياسى) انىقتالدى.
مەملەكەتتىڭ كەپىلدىگىمەن «ۇلتتىق اقپاراتتىق تەحنولوگيالار» اق «سبەربانكتەن» نەسيە الماقشى. قۇجاتتا نەسيەنى «قارىز تۋرالى كەلىسىم» دەپ اتاعان.
«ۇات» اق مەن سبەربانك جاق اراسىندا وعان قىزمەت كورسەتۋ بويىنشا نەگىزگى بورىش پەن پايىزدار سوماسىنا قازاقستان رەسپۋبليكاسىنىڭ مەملەكەتتىك كەپىلدىگىمەن «ۇات» اق پايداسىنا كرەديت جەلىسىن ۇسىنۋدى كوزدەيتىن قارىز تۋرالى كەلىسىم جاساسۋ. كرەديت جەلىسى سبەربانك جاق تاراپىنا بارلىق قاجەتتى قۇجاتتار ۋاقتىلى ۇسىنىلعان جاعدايدا 2022 جىلدىڭ ءبىرىنشى توقسانىنىڭ سوڭىنا دەيىن بەس ءجۇز ميلليون اقش دوللارىنا دەيىنگى مولشەردەگى سوما رەسەي رۋبلىمەن بەرىلەتىن بولادى», دەلىنگەن قۇجاتتا.
مەموراندۋمدا نەسيەنىڭ قانشا پايىزبەن بەرىلەتىنى كورسەتىلمەگەن.
وسى مەموراندۋم شارتتارىندا GovTech پلاتفورماسىن ىسكە اسىرۋ شارتىن جانە GovTech پلاتفورماسى قىزمەتتەرىن الۋ شارتىن جاساسۋ مۇمكىندىگىن قامتاماسىز ەتەدى.
مەموراندۋم ىسكە اسۋى ءۇشىن تاراپتار 2021 جىلدىڭ 1 جەلتوقسانىنا دەيىن ونى ىسكە اسىرۋ جونىندەگى ءىس-شارالار جوسپارىن ازىرلەپ, قول قويۋى كەرەك.
ايتا كەتەيىك, 3 قىركۇيەك كۇنى شىعىس ەكونوميكالىق فورۋمى بارىسىندا قر پرەمەر-ءمينيسترى اسقار مامين مەن سبەربانك باسقارماسىنىڭ توراعاسى گەرمان گرەف ىنتىماقتاستىق تۋرالى مەموراندۋمعا قول قويدى. قۇجاتقا سايكەس رەسەيلىك كومپانيا قازاقستاننىڭ مەملەكەتتىك سەكتورىن تسيفرلاندىرۋ جونىندەگى جوبالاردى ىسكە اسىرۋعا قاتىسادى.
بۇعان دەيىن سبەربانكتىڭ 50%-دان استام اكتسياسى رەسەي ۇكىمەتى باقىلايتىن ۇلتتىق ءال-اۋقات قورىنا تيەسىلى ەكەنى جازىلدى.
