شقو اكىمى دانيال احمەتوۆ قالا جانە اۋدان اكىمدەرىمەن, باسقارما باسشىلارىمەن «باقىتتى وتباسى» باعدارلاماسىن ىسكە اسىرۋ جونىندە كەڭەس وتكىزدى. ⠀
«كوپبالالى, تولىق ەمەس وتباسىلار جانە مۇمكىندىگى شەكتەۋلى بالا تاربيەلەپ وتىرعان جانۇيالار ءتيىمدى شارتتار ارقىلى جاڭا ءۇي الا الادى. باستاپقى جارنا رەتىندە 1,5 ميلليون تەڭگەنىڭ سەرتيفيكاتى بەرىلەدى. بۇعان قوسا «پارىز» قورىنان 700 مىڭ تەڭگەدەن بولىنەدى.
بۇل «بىرقاباتتى شىعىس» باعدارلاماسى بويىنشا سالىنعان اۋدانى 70 شارشى مەتردى قۇرايتىن پاتەر قۇنىنىڭ 22% پايىزى», دەدى ايماق باسشىسى.
وبلىستىڭ جىلجىمايتىن م ۇلىك نارىعىندا قولدانىستاعى تۇرعىن ءۇيدىڭ شارشى مەترى – 280 مىڭ تەڭگەدەن, ال جاڭا پاتەر شارشى مەترىنىڭ – 340 مىڭ تەڭگەگە دەيىن بارادى.
«مۇنىڭ جانىندا ءبىزدىڭ ۇسىنىپ وتىرعان جوبامىز وتە ءتيىمدى ەكەنى انىق. جەڭىلدەتىلگەن شارتپەن ءار شارشى مەتر 160 مىڭ تەڭگەگە باعالانىپ وتىر. بۇگىنگى تاڭدا «باقىتتى وتباسى» باعدارلاماسىنا قاتىسۋعا 1860 ءوتىنىم ءتۇسىپ, ونىڭ 250-ءى ماقۇلداندى. وكىنىشكە قاراي, جەرگىلىكتى جەرلەردەگى اكىمدەر باعدارلامانىڭ ارتىقشىلىقتارىن دۇرىس تۇسىندىرمەيدى.
باستاپقى جارنا رەتىندە پاتەر قۇنىنىڭ 22%-ى تولەنەتىنىن, دايىن ۇيگە كىرە سالۋعا بولاتىنىن, نەسيە شارتتارىنىڭ ەرەكشەلىگىن جانە ءۇي جانىندا جەكە جەر ۋچاسكەسى بولاتىنىن كوپشىلىك بىلمەيدى. بۇل جۇمىستى كۇشەيتۋ قاجەت. وتباسىلاردىڭ سانىن ەسەپتەپ قانا قويماي, ولاردىڭ ارقايسىسىمەن سويلەسۋ كەرەك», دەدى دانيال احمەتوۆ.
