بيىلعى قىسقى وليمپياداعا ليتسەنزيا الا الماعان قازاقستان سپورتشىلارى دا بارادى. بۇل تۋرالى egemen.kz ءتىلشىسى حابارلادى.
جاقىندا باق وكىلدەرىمەن كەزدەسۋدە سپورت جانە دەنە شىنىقتىرۋ ىستەرى اگەنتتىگى توراعاسىنىڭ ورىنباسارى ەلسيار قاناعاتوۆ سوچي وليمپياداسىنا جارىستارعا قاتىساتىن سپورتشىلارىمىزبەن بىرگە جولداما الماي قالعان وتانداستارىمىز دا باراتىنىن ايتتى. «بىلتىر وليمپياداعا جولداما بەرەتىن كوپتەگەن جارىستار ءوتتى. وعان ەل نامىسى ءۇشىن ءبىراز سپورتشىلارىمىز جان الىسىپ, جان بەرىسىپ قاتىستى. الايدا ءبارىنىڭ وليمپياداعا ليتسەنزيانى جەڭىپ الۋعا مۇمكىندىگى بولمادى. وسى جاعدايدى جانە جاس سپورتشىلارىمىزدىڭ ەڭبەگىن, تالانتىن ەسكەرە وتىرىپ, ءبىز ولاردى وليمپياداعا اپارۋدى ءجون كورىپ وتىرمىز. بۇل ءبىر جاعىنان جاس بولسا دا تالانتىمەن تالاي جارىستاردا كوزگە تۇسكەن سپورتشىلارىمىزعا وليمپياداعا قاتىساتىن ارىپتەستەرىنەن, دوستارىنان ۇلگى السىن دەگەن ويمەن جاسالىپ جاتىر. ولار وليمپياداعا تۋريست رەتىندە باراتىن 300-گە جۋىق ادامنىڭ قۇرامىندا بولادى», دەيدى ە.قاناعاتوۆ. سونىمەن بىرگە ونىڭ ايتۋىنشا, وليمپياداعا تۋريست رەتىندە زەينەت جاسىنا شىعىپ, ەڭبەگى سىڭگەن بۇرىنعى سپورتشىلارىمىز دا بارادى.
داستان كەنجالين.
دەرەككوز: سپورت جانە دەنە شىنىقتىرۋ ىستەرى اگەنتتىگى.
