فوتوكورمەنى قازاقستاننىڭ يىۇ جانىنداعى تۇراقتى وكىلدىگى ۇيىمنىڭ باس حاتشىلىعىمەن بىرلەسە ۇيىمداستىردى.
ءىس-شارانىڭ اشىلۋ سالتاناتىنا يىۇ حاتشىلىعىنىڭ باسشىلىعى مەن قىزمەتكەرلەرى, يىۇ جانىنداعى مۇشە مەملەكەتتەردىڭ تۇراقتى وكىلدىكتەرىنىڭ جانە دجيددا قالاسىندا اككرەديتتەلگەن باس كونسۋلدىق باسشىلارى, يسلام دامۋ بانكىنىڭ, دۇنيەجۇزىلىك يسلام ليگاسىنىڭ جانە باسقا دا حالىقارالىق ۇيىم وكىلدەرى قاتىستى.
كورمەنىڭ اشىلۋىندا قازاقستاننىڭ ساۋد ارابياسىنداعى ەلشىسى, قر يىۇ جانىنداعى تۇراقتى وكىلى بەرىك ارىن جانە يىۇ باس حاتشىسىنىڭ ورىنباسارى سامير باكەر دياب قۇتتىقتاۋ ءسوز سويلەدى.
ب. ارىن قازاقستاننىڭ جاڭا تاريحى تۇڭعىش پرەزيدەنت – ەلباسى نۇرسۇلتان نازارباەۆتىڭ ەسىمىمەن تىعىز بايلانىستى ەكەنىن اتاپ ءوتىپ, قاتىسۋشىلاردى ەلىمىزدىڭ تاۋەلسىزدىك جىلدارىنداعى نەگىزگى ىشكى ساياسي جانە الەۋمەتتىك-ەكونوميكالىق جەتىستىكتەرى, حالىقارالىق ارەناداعى تابىستارى تۋرالى حاباردار ەتتى.
سونداي-اق قازىرگى ۋاقىتتا پرەزيدەنت قاسىم-جومارت توقاەۆتىڭ باسشىلىعىمەن جۇرگىزىلىپ جاتقان ەكونوميكالىق جانە ساياسي رەفورمالارىنا توقتالىپ ءوتتى. وسى تۇرعىدا وتاندىق ديپلومات قوناقتاردى پرەزيدەنتتىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىنىڭ نەگىزگى قاعيدالارىمەن تانىستىرىپ, جولداۋدا قازىرگى كۇردەلى كەزەڭدە ەلدىڭ ودان ءارى الەۋمەتتىك-ەكونوميكالىق دامۋىنىڭ نەگىزگى ۆەكتورلارى كورسەتىلگەنىنە نازار اۋداردى.
ەلشى يىۇ-عا مۇشە مەملەكەتتەردىڭ جانە حاتشىلىقتىڭ قازاقستاننىڭ تاۋەلسىز دامۋىنا جانە ونىڭ سىرتقى ساياسي باستامالارىنا ۇدايى قولداۋ كورسەتكەنى ءۇشىن العىس ءبىلدىرىپ, سونىڭ ارقاسىندا ەلىمىز 2011-2012 جىلدارى يىۇ سىرتقى ىستەر مينيسترلىگىنىڭ 38-ءشى سەسسياسىنا جانە 2017-2021 جىلدارى عىلىم مەن تەحنولوگيالار جونىندەگى يىۇ-نىڭ ءبىرىنشى سامميتىنە تابىستى توراعالىق ەتكەنىن, سونداي-اق باس پاتەرى نۇر-سۇلتان قالاسىندا ورنالاسقان ازىق-ت ۇلىك قاۋىپسىزدىگى جونىندەگى يسلام ۇيىمىن قۇرعانىن اتاپ ءوتتى.
ءوز كەزەگىندە, يىۇ باس حاتشىسىنىڭ ورىنباسارى س. دياب قازاقستان رەسپۋبليكاسى باسشىلىعى مەن حالقىن تاۋەلسىزدىكتىڭ 30 جىلدىعىمەن قۇتتىقتاپ, ەلدىڭ ءارى قاراي وركەندەپ دامۋىن جانە گۇلدەنۋىن تىلەدى.
ول قازاقستان ۇيىمنىڭ قىزمەتىنە قوماقتى ۇلەس قوسىپ وتىرعان يىۇ-نىڭ بەلسەندى مۇشەلەرىنىڭ ءبىرى ەكەنىن اتاپ ءوتتى. وسى تۇرعىدا ول قازاقستان باسشىلىعىنىڭ ۇيىمنىڭ حالىقارالىق ىستەردەگى ءرولىن نىعايتۋعا, مۇسىلمان ەلدەرىندەگى عىلىم مەن تەحنولوگيانى دامىتۋعا باعىتتالعان ماڭىزدى باستامالارىن جوعارى باعالادى.
«فوتوكورمە قوناقتارعا قازاقستان دامۋىنىڭ نەگىزگى كەزەڭدەرىمەن, ەلىمىزدە وتكەن ءىرى حالىقارالىق ءىس-شارالارمەن تانىسۋعا, ەلىمىزدىڭ تابيعي سۇلۋلىعى مەن ساۋلەتتىك لاندشافتارىن كورۋگە, سونداي-اق قازاقستان حالقىنىڭ تاريحى, مادەنيەتى, داستۇرلەرى مەن ءومىر سالتى تۋرالى تۇسىنىك الۋعا مۇمكىندىك بەردى.
ءىس-شارا بارىسىندا كەلۋشىلەرگە تاقىرىپتىق بەينەروليكتەر كورسەتىلدى, ەلباسى ن. نازارباەۆ پەن پرەزيدەنت ق. توقاەۆتىڭ كىتاپتارى, مەملەكەت باسشىسىنىڭ جولداۋى جانە تاۋەلسىزدىكتىڭ 30 جىلدىعى قارساڭىندا ونىڭ ساياسي جانە الەۋمەتتىك-ەكونوميكالىق دامۋى تۋرالى باياندايتىن وزگە دە اقپاراتتىق ماتەريالدار تاراتىلدى», دەپ جازىلعان قر ءسىم ءباسپاسوز حابارلاماسىندا.
