مەملەكەت باسشىسى «CLAAS» كومپانياسىنىڭ حالىقارالىق بەدەلىن جوعارى باعالاپ, گەرمانيالىق كونتسەرنمەن ۇزاقمەرزىمدى ىنتىماقتاستىق ورناتۋ قاجەت ەكەنىن اتاپ ءوتتى.
«CLAAS» ونىمدەرىنىڭ قازاقستان نارىعىنا كەلۋى بۇل ۇلكەن جەتىستىك. بۇنى وتە ءىرى ينۆەستيتسيالىق وقيعا دەۋگە بولادى», دەدى قاسىم-جومارت توقاەۆ.
سونىمەن قاتار پرەزيدەنت وسى وڭىردە بىرقاتار جوبالاردى جۇزەگە اسىرىپ جاتقان شەتەلدىك ينۆەستورلارمەن كەزدەستى.
«CLAAS» كومپانياسىنىڭ تمد ەلدەرى بويىنشا ايماقتىق ديرەكتورى نيلس رويچ مەملەكەت باسشىسىن قازاقستاندا بولاشاقتا ىسكە اسىرماق ينۆەستيتسيالىق جوبالارىمەن تانىستىردى.
تۇرىكتىڭ «YDA HOLDING» كومپانياسىنىڭ باسقارما توراعاسى ارسلان حۋسەين پەتروپاۆلدا حالىقارالىق JCI ستاندارتتارىنا سايكەس 625 ورىندىق زاماناۋي كوپسالالى اۋرۋحانا قۇرىلىسىنىڭ باستالعانىنان حاباردار ەتتى.
اريزونا ۋنيۆەرسيتەتىنىڭ (اقش) جاھاندىق ماسەلەلەر جونىندەگى ۆيتسە-پرەزيدەنتى برەنت ۋايت اتالعان وقۋ ورنىنىڭ Kozybayev University-مەن ىنتىماقتاستىق ورناتۋ جونىندەگى جوسپارىن ايتتى. بۇل كەلىسىم قازاقستاندىق جوعارى وقۋ ورنىن امەريكالىق ءبىلىم بەرۋ مەكەمەسىندەگى اكادەميالىق تەحنولوگيالارمەن قامتاماسىز ەتۋگە باعىتتالماق.
قاسىم-جومارت توقاەۆ ينۆەستيتسيالىق جوبالارمەن تانىسقاننان كەيىن ينۆەستورلارعا ەل ەكونوميكاسىن, اتاپ ايتقاندا وڭىرلەردى دامىتۋعا قوسقان ۇلەستەرى ءۇشىن ريزاشىلىعىن ءبىلدىردى. مەملەكەت باسشىسى ينۆەستورلاردىڭ بيزنەس-جوبالارىنىڭ ىسكە اسىرىلۋىن باقىلاۋدا ۇستاۋ ءۇشىن جەكە مونيتورينگ جۇرگىزەتىنىن اتاپ ءوتتى.
