23 قاڭتار كۇنى قىرعىزستان شەكارا اۋماعىندا جويىلعان قاراقشىلار ينگۋش سەپاراتيستىك ۇيىمىنا مۇشەلەر بولۋى ىقتيمال. بۇل تۋرالى «ينتەرفاكس» اگەنتتىگىنە سىلتەمە جاساعان Ras.kz حابارلادى.
«قاڭتاردىڭ 23-ءى كۇنى قىرعىزستان شەكاراسىنا باسىپ كىرگەن 11 ادامنان تۇراتىن سودىرلار ينگۋش سەپاراتيستەرى بولۋى مۇمكىن دەگەن بولجام باسىم بولىپ تۇر», – دەدى قىرعىزستان مەملەكەتتىك شەكارا قىزمەتى رايىسىنىڭ مىندەتىن اتقارۋشى رايىمبەردي دۋيشەمبيەۆ.
ارنايى وپەراتسيانىڭ بارىسىندا ولتىرىلگەن ءاربىر سودىردىڭ جانىندا پىشاق, 15 مەترلىك ارقان, ازىق-ت ۇلىك زاپاستارى, قۇرما, بال, اۋىستىرىپ كيەتىن اياققكيىم, قۇران, ولە قالسا دەنەلەرىن ورايتىن ماتا بولعان. بۇدان باسقا, بەينەكامەرا دا بولىپتى. بىراق بايلانىس قۇرالدارى كورىنبەگەن.
«اتالمىش وقيعادان كەيىن, 23 قاڭتاردان بەرى قىرعىزستان مەن قىتاي شەكاراسىنداعى ءتارتىپ كۇشەيتىلدى», – دەدى ر.دۋيشەمبيەۆ.
ونىڭ ايتۋىنشا, سودىرلار توبىن ءبىرىنشى بولىپ ەگەر الەكساندر بارىكين كەزدەستىرگەن. ورمانشى ولاردى توقتاتپاق بولعان. سول ءۇشىن ءوزى اياۋسىز ولتىرىلگەن. ونىڭ باسى كەسىلىپ الىنىپتى.
«ا.بارىكين نە بولعانىن شەكاراشىلارعا حابارلاپ ۇلگەردى. ول ولەر الدىندا دا ەرلىك كورسەتتى: قازا تاپپاس بۇرىن ەكى قاراقشىنى الا كەتتى. ول مەملەكەتتىك ناگراداعا ۇسىنىلاتىن بولادى. ال جەرلەۋ ءراسىمى بارلىق قۇرمەتىمەن ىستىقكول وبلىسىنىڭ ورتالىعى قاراقول قالاسىندا وتەدى», – دەدى ر.دۋيشەمبيەۆ.
شەكارا اسكەرلەرى باستىعىنىڭ مىندەتىن اتقارۋشىنىڭ سوزىنە قاراعاندا, سودىرلاردىڭ قىرعىزستان اۋماعىنا قارۋ-جاراق الۋ ءۇشىن نە تەراكت جاساۋ ءۇشىن كەلگەن بولۋلارى مۇمكىن.
«ولاردىڭ ءبىزدىڭ ءبىر ادامىمىزدى ءولتىرىپ قويعانىن ەسكەرىپ, جەرگىلىكتى جۇرتقا ۇلكەن قاۋىپ توندىرەتىنىن بىلدىك. سوندىقتان قاراڭعى تۇسكەنشە ءبارىن جويۋعا شەشىم قابىلدادىق. سەبەبى, 4-4,5 شاقىرىم بيىكتەگى تاۋدا تۇندە اۋا تەمپەراتۋراسى 35-40 گرادۋسقا دەيىن تومەندەيدى. ونىڭ ۇستىنە, ولار ءبىزدىڭ بەرىلۋ جونىندەگى شارتىمىزدى قابىلدامادى. كەلىسسوز جۇرگىزۋ بارىسىندا «اللاح اكبار!» دەپ الدى دا, شەكاراشىلارعا كارابيننەن وق جاۋدىردى», – دەدى ر.دۋيشەمبيەۆ.
ايدار ورىسباەۆ.
دەرەككوز: Ras.kz
فوتو: Topwar.ru
