مەملەكەت باسشىسى «حالىق بىرلىگى مەن جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداعان جولداۋىندا ەلىمىزدىڭ ءبىلىم بەرۋ جۇيەسىندە ءبىرشاما ولقىلىقتار بار ەكەنىن ءسوز ەتىپ, ءتيىستى تاپسىرمالار بەردى.
ء«بىز ەلىمىزدە ءومىر بويى وقىتۋ تۇجىرىمداماسىن كەشەندى تۇردە العا تارتىپ كەلەمىز. حالىقتىڭ بەيرەسمي بىلىمگە تارتىلۋى تومەن دەڭگەيدە ەكەندىگى ەشكىمگە قۇپيا ەمەس. شىن مانىندە, اتا-انالاردىڭ بىلىمگە دەگەن سالعىرت كوزقاراسى بالالاردا دا سونداي كوزقاراستى قالىپتاستىرادى», دەپ شارانى باستادى «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ باسقارما توراعاسى اسىلبەك ەسەنباەۆ.
باسقارما توراعاسى ءبىلىم بەرۋ سالاسىندا بەرىلگەن جاڭا تاپسىرمالارعا دا توقتالا كەتتى.
مەملەكەتتىك تاپسىرما اياسىندا «رۋحاني جاڭعىرۋ» ينستيتۋتى بيىل «ازاماتتىق الاڭ» وتىرىستارىن تۇراقتى تۇردە وتكىزۋدى جوسپارلاعان.
«مەملەكەت باسشىسى 1 قىركۇيەكتەگى جولداۋىندا عىلىمدى دامىتۋدىڭ ماڭىزدىلىعىن اتاپ ءوتتى. بەرىلگەن تاپسىرماعا سايكەس زاڭ جوباسىنىڭ تۇجىرىمداماسى دا دايىندالدى. عىلىمدى قارجىلاندىرۋ مەحانيزمدەرىنىڭ نەگىزدى جەتىلمەۋى سەكىلدى انىق كەدەرگىلەر بار ەكەنى جاسىرىن ەمەس. بۇدان وزگە دە ءبىرشاما ولقىلىقتاردىڭ ورنىن تولتىرۋ ماقساتىندا قر قولدانىستاعى 3 كودەكسى مەن 6 زاڭىنا تولىقتىرۋلار مەن وزگەرىزتەر ەنگىزۋ كوزدەلگەن», دەپ اتاپ ءوتتى قر بعم عىلىم كوميتەتى توراعاسىنىڭ ورىنباسارى دۋمان ورىنبەكوۆ.
مەكتەپكە قادام باسقان بۇلدىرشىندەر سانىنىڭ ارتۋى قۋانتارلىق جاعداي. دەسە دە, مۇنىڭ سوڭىندا ءۇش اۋىسىمدى وقۋ ءۇردىسى, ورىن تاپشىلىعى, «ى» سىنىبى سەكىلدى وزگە دە ماسەلەلەر تۋىنداعانى الاڭداتادى.
ء«ۇش اۋىسىممەن وقيتىن مەكتەپتەر بار. بۇل ماسەلە بولاشاقتا ءوز كەدەرگىلەرىن كەلتىرۋى ابدەن مۇمكىن. مەگاپوليستەردەگى مەكتەپتەردىڭ ساپاسى مەن اۋداندىق, اۋىلدىق مەكتەپتەردىڭ ساپاسى بىردەي بولۋى دا اسا ماڭىزدى. اۋىلدىق مەكتەپتىڭ جابدىقتالۋى قالالىق مەكتەپتەن تومەن بولسا, ءبىز «جابايى» ميگراتسيانى قالىپتاستىرىپ الامىز. بۇل ءۇش اۋىسىمدى مەكتەپ ماسەلەسىنىڭ ەشقاشان شەشىلمەيتىندەي ەتەدى. سوندىقتان وسى مەكتەپ ماسەلەسىنە ناقتى جۇيەلىلىك قاجەت», دەگەن پىكىر ءبىلدىردى نۇر-سۇلتان قالاسى 90-گيمنازيا ديرەكتورى اياتجان احمەتجان ۇلى.
