قازاقستان پرەزيدەنتى جانىنداعى ورتالىق كوممۋنيكاتسيالار قىزمەتى ۇيىمداستىرعان بريفينگكە پارلامەنت ءماجىلىسىنىڭ دەپۋتاتى, «اق جول» دەموكراتيالىق پارتياسى فراكتسياسىنىڭ جەتەكشىسى ازات پەرۋاشەۆ قاتىسىپ, ەلباسى جولداۋىنا قاتىستى ويىمەن ءبولىسىپ, ۇسىنىستارىن جەتكىزدى.
قازاقستان پرەزيدەنتى جانىنداعى ورتالىق كوممۋنيكاتسيالار قىزمەتى ۇيىمداستىرعان بريفينگكە پارلامەنت ءماجىلىسىنىڭ دەپۋتاتى, «اق جول» دەموكراتيالىق پارتياسى فراكتسياسىنىڭ جەتەكشىسى ازات پەرۋاشەۆ قاتىسىپ, ەلباسى جولداۋىنا قاتىستى ويىمەن ءبولىسىپ, ۇسىنىستارىن جەتكىزدى.
ءماجىلىس دەپۋتاتى مەملەكەت باسشىسىنىڭ بيىلعى جولداۋى «ماڭگىلىك ەل» ۇلتتىق يدەياسىمەن استاسىپ جاتقانىنا توقتالا كەلە, بۇل باعدارلامالىق قۇجاتتىڭ قوعام تاراپىنان قولداۋعا يە بولعانىن اتاپ ءوتتى. «بۇل ورايدا, جۇبان مولداعاليەۆتىڭ «مەن قازاقپىن, مىڭ ءولىپ, مىڭ تىرىلگەن» دەگەن ولەڭ جولدارى ويعا ورالادى. قازاق حالقىنىڭ تاريحى ءبىزدىڭ مەملەكەتىمىز بەن قازاقستاندىقتاردىڭ ورتاق تاريحىنا اينالۋى ءتيىس. بۇل يدەيا باسىمىزدى بىرىكتىرەتىن ورتاق تاعدىرىمىز, سونداي-اق, ءبىزدىڭ بىرلىگىمىزدىڭ بولاشاقتاعى كەپىلى. سول سەبەپتى, «ماڭگىلىك ەل» ۇعىمى مەن ءۇشىن ۋاقىتتىڭ كەز كەلگەن قيىندىعىنا توتەپ بەرەتىن حالىق», دەدى ا. پەرۋاشەۆ. ول, سونىمەن قاتار, بۇگىنگى تاڭدا قازاقستان ەكونوميكاسىنىڭ الەمدىك ەكونوميكاعا ينتەگراتسيالانۋى جاڭا ساپالىق دەڭگەيگە كوتەرىلۋى قاجەتتىگىن, بۇل ورايدا مەملەكەت باسشىسىنىڭ ناقتى تاپسىرمالار جۇكتەگەنىن جەتكىزدى.
«اق جول» پارتياسىنىڭ جەتەكشىسى جولداۋدا ايتىلعان شاعىن جانە ورتا بيزنەس ماسەلەسىن دە اينالىپ وتپەدى. «مەملەكەت باسشىسى شاعىن جانە ورتا بيزنەستى «يندۋستريالىق جانە الەۋمەتتىك جاڭارۋدىڭ ماڭىزدى قۇرالى» دەپ تەگىن ايتقان جوق. سەبەبى, شاعىن جانە ورتا كاسىپورىندار وزدەرىنىڭ «تابيعاتى» جاعىنان اعىمداعى كەز كەلگەن قيىندىققا جاۋاپ قاتا الادى. دۇنيەجۇزىندە شاعىن جانە ورتا بيزنەس يننوۆاتسيانى ءارتاراپتاندىرۋدىڭ لوكوموتيۆى سانالادى. ول ەكونوميكانىڭ جاڭا سەكتورلارىن اشىپ قانا قويماي, جاڭا ونىمدەردىڭ شىعۋىنا جول اشادى. بۇل ورايدا, پرەزيدەنتتىڭ «بيزنەستىڭ دامۋىنا كەدەرگى كەلتىرەتىن بارلىق قۇقىقتىق نورمالاردىڭ كۇشىن جويۋ» دەگەن ءسوزى جاي ەمەس, باسشىلىققا الاتىن ءسوز. وسىعان بايلانىستى «اق جول» پارتياسىنىڭ دەپۋتاتتارى زاڭدىق باستامالار قۇقىعىن پايدالانا وتىرىپ, ۇكىمەتتىڭ قاراۋىنا وزدەرى ازىرلەگەن «شاعىن جانە ورتا بيزنەستى مەملەكەتتىك قولداۋ تۋرالى» زاڭ جوباسىن ۇسىندى», دەدى ا.پەرۋاشەۆ. وسىلاي دەگەن ول بۇل زاڭ جوباسىندا كاسىپكەرلەرگە قولداۋ كورسەتەتىن ءارتۇرلى ءىس-شارالار كورىنىس تاپقانىن تىلگە تيەك ەتتى.
بريفينگ بارىسىندا سىن دا ايتىلماي قالمادى. ا.پەرۋاشەۆ «ۇكىمەت دەپۋتاتتىق ساۋالدارعا ءۇستىرت قارايدى», دەي كەلە, بۇل ماسەلەگە نازار اۋدارۋ قاجەتتىگىن اتاپ كورسەتتى.
ءلايلا ەدىلقىزى,
«ەگەمەن قازاقستان».
