جامبىل وبلىسىنىڭ پوليتسيا قىزمەتكەرلەرى «قاراسورا-2021» رەسپۋبليكالىق ارنايى جەدەل-پروفيلاكتيكالىق ءىس-شاراسىن وتكىزۋ بارىسىندا بايزاق اۋدانىنىڭ 49 جاستاعى تۇرعىنىن ۇستادى.
شۋ اۋدانىنىڭ تاسوتكەل اۋىلىنان 3 شاقىرىم جەردەگى قۇمعا جاقىن ماڭداعى ايماقتى تەكسەرۋ بارىسىندا ەسىرتكى زاتتارىن دايىنداۋمەن اينالىسقان ازاماتتان جالپى سالماعى 928 كەلى «كاننابيس وسىمدىگى» ەسىرتكى زاتى تابىلىپ, تاركىلەندى. ۇستالعان ازاماتتى جەكە ءتىنتۋ كەزىندە جالپى سالماعى 0,320 گر «كاننابيس شايىرى» ەسىرتكى زاتى تابىلدى. ۇستالعان ازامات كىناسىن تولىقتاي مويىنداپ, شۋ قالاسىنىڭ ۋاقىتشا ۇستاۋ يزولياتورىنا قامالدى.
اتالعان دەرەككە قاتىستى قر قىلمىستىق كودەكسىنىڭ 297-بابى 3-بولىگى بويىنشا سوتقا دەيىنگى تەرگەۋ امالدارى باستالدى. بۇل باپ بويىنشا قىلمىسكەردىڭ مۇلكى تاركىلەنىپ, ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋعا جازالانادى.
«جىل باسىنان بەرى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جامبىل وبلىسىنىڭ اۋماعىندا 2 توننا 23 كەلى كولەمىندە ءتۇرلى ەسىرتكى زاتتارىن تاركىلەدى. بۇل باعىتتاعى جۇمىستار ءارى قاراي جالعاساتىن بولادى», دەيدى جامبىل وبلىسى پوليتسيا دەپارتامەنتىنىڭ ءباسپاسوز قىزمەتى باستىعىنىڭ مىندەتىن اتقارۋشى بەگمان قۇتمىرزاەۆ.
