ونلاين جيىنعا قازاقستاننىڭ تۇكپىر-تۇكپىرىنەن مىڭعا جۋىق اتا-اتا قاتىسۋدا. «سەنىم مەن بولاشاق» رەسپۋبليكالىق اتا-انالار قوعامدىق بىرلەستىگىنىڭ ۇيىمداستىرۋىمەن ءوتىپ جاتقان شارا اياسىندا «جاڭا ۇرپاق» جوباسىنىڭ اۆتورى, وتباسى كوۋچى اسحات ءابجانوۆ, پسيحولوگ-پەداگوگ ايجان ادىلباەۆا, «سەنىم مەن بولاشاق» رەسپۋبليكالىق اتا-انالار قوعامدىق بىرلەستىگىنىڭ ماماندارى ءدارىس وقىپ, اتا-انالارمەن ترەنينگتەر وتكىزەدى.
زەرتتەۋشى پەداگوگ نۇرلان يمانعاليەۆ «اتا-انا جاڭا وقۋ جىلىنا قالاي دايىندالۋى كەرەك» دەگەن تاقىرىپتا ءدارىس وقىپ, ۋاقىت مەنەدجمەنتىن ءتيىمدى ۇيىمداستىرۋ جولدارىنا توقتالدى.
«بالاڭىز تابىستى ازامات بولىپ جەتىلسىن دەسەڭىز, وعان ۋاقىت مەنەدجمەنتى داعدىلارىن ۇيرەتۋىڭىز كەرەك. بالاعا بىردەڭە ۇيرەتپەس بۇرىن, ونى اۋەلى ءوزىڭىز جەتىك ءبىلۋىڭىز قاجەت. سوندىقتان ەڭ اۋەلى ۋاقىت مەنەدجمەنتىن ساۋاتتى ۇيىمداستىرۋعا كوڭىل ءبولىڭىز. اتا-انالاردىڭ كوبى بالاسى 11 سىنىپقا كەلگەندە وكىنىپ جاتاتىنىن جىل سايىن كورىپ ءجۇرمىز. سونداي وكىنىش بولماۋى ءۇشىن بالاڭىزدىڭ بولاشاعىن 4-5 جىل بۇرىن جوسپارلاپ داعدىلانىڭىز. بالا ارمانداي العانىمەن, تابيعاتىنان 4-5 جىلعا جوسپار قۇرا المايدى. مىسالى, IELTS-تەن سۇرىنبەي ءوتۋ ءۇشىن كەمىندە 120 ساباق الۋ كەرەك. ال مۇنشا كولەمدەگى ءبىلىمدى 1-2 اپتانىڭ ىشىندە الىپ ۇلگەرۋ مۇمكىن ەمەس. بالانىڭ ۇلگەرىمىنە, سىناقتارعا دايىندىعىنا سىن ساعات تاياعاندا ەمەس, ەرتە باستان دايىندالۋ ماڭىزدى», دەپ كەڭەس بەردى پەداگوگ.
ول, سونداي-اق بالاسىنىڭ بولاشاعىنا الاڭدايتىن كەز كەلگەن اتا-انا قازىرگى تەحنولوگيانىڭ يگىلىكتەرىن ءوز يكەمىنە قاراي پايدالانۋ كەرەكتىگىن نازارعا سالدى.
ء«بىلىم بەرۋ جۇيەسى جىل سايىن وزگەرىپ جاتىر. اتا-انا باعانى ەمەس, ءار ءپاننىڭ ۇيرەنۋ ماقساتتارىن ءبىلۋ كەرەك. ءار ءپان بويىنشا بالا ءبىر توقساندا نەنى ۇيرەنۋ كەرەكتىگىن توقساننىڭ باسىندا ناقتىلاپ الساڭىز, ونىڭ ۇلگەرىمىن توقسان بويىندا قاداعالاپ وتىرا الاسىز. تەك العان باعاسىن سۇراي بەرگەننەن تاقىرىپ بويىنشا پىكىر الماسىپ قاداعالاۋ الدەقايدا ءتيىمدى», دەدى نۇرلان يمانعاليەۆ.
