ۋكراينا پرەمەر-ءمينيسترى نيكولاي ازاروۆ شەرۋشىلەرگە كۇش قولدانىلاتىنىن ەسكەرتكەن ەدى. بۇگىنگى مالىمەتتەر بويىنشا, پوليتسيا مەن ەرەۋىلشىلەردىڭ اراسىندا ورىن العان قاقتىعىستار كەزىندە قازا بولعاندار بار. بۇل تۋرالى Azattyg.org حابارلادى.
ۋكراينا پرەمەر-ءمينيسترى «ەگەر ارانداتۋشىلار كيەۆتەگى ارەكەتىن توقتاتپاسا, شەرۋشىلەرگە قارسى كۇش قولدانىلادى» دەگەن ەسكەرتۋ جاساعان ەدى.
بۇدان بۇرىن قاقتىعىس كەزىندە ەكى ەرەۋىلشىنىڭ قازا بولعانى جونىندە اقپار تاراتىلعان ەدى. كەيىننەن «ۋكراينسكايا پراۆدا» گازەتى 20-25 جاس ارالىعىنداعى جاس جىگىتتىڭ قاقتىعىس كەزىندە العان جاراقاتتارىنان اۋرۋحانادا كوز جۇمعانى تۋرالى جازدى.
رەسەيدىڭ «روسسيا 24» تەلەارناسىنا سۇحبات بەرگەن ازاروۆ «كيەۆتە وتكەن اپتادان بەرى دەمونسترانتتار مەن ميليتسيا جاساقتارىنىڭ قاقتىعىسىپ جاتقانىنا نارازى» ەكەنىن ايتقان. «جاۋاپكەرشىلىك جاعدايدى وسىنشا ۋشىقتىرعان وپپوزيتسيالىق پارتيالاردىڭ جەتەكشىلەرىنە ارتىلادى. الداعى بىرنەشە كۇندە ولار باعىتتارىن ايقىنداپ الۋى ءتيىس. ەگەر وپپوزيتسيا بۇزاقىلار مەن ەكسترەميستەردى, ارانداتۋشىلاردى قولداسا, وندا سولارمەن بىرگە ەكەنىن ايتسىن. ال ەگەر ولاردى قولدامايتىن بولسا, وندا ۇكىمەتپەن بىرلەسىپ, قالا كوشەلەرىن ارانداتۋشىلاردان تازارتۋعا كىرىسسىن», – دەدى ازاروۆ. سونداي-اق ول ارانداتۋشىلار ءوز ارەكەتىن توقتاتپاعان جاعدايدا, ۇكىمەتتىڭ ولارعا قارسى كۇش قولدانىپ, زاڭ اياسىندا ازاماتتارىن قورعاۋعا حاقى بار ەكەنىن العا تارتتى.
21 قاڭتاردا رەسەي سىرتقى ىستەر ءمينيسترى سەرگەي لاۆروۆ ۋكرايناداعى جاعدايدىڭ «باقىلاۋدان شىعىپ بارا جاتقانىنا» الاڭداۋشىلىق ءبىلدىرىپ, كيەۆتەگى شيەلەنىستىڭ سوزىلىپ كەتكەنىنە ۋكراينا وپپوزيتسياسىن ايىپتادى.
ۋكراينا پارلامەنتى قابىلداعان جاڭا زاڭ بويىنشا, رۇقسات ەتىلمەگەن جيىن وتكىزگەندەرگە سالىناتىن ايىپپۇل كولەمى مەن قاماۋ مەرزىمى كوبەيدى.
ازاروۆ بەيبىت جيىن وتكىزۋدى شەكتەيتىن زاڭدى «ەۋروپا زاڭنامالارىنىڭ ءدال كوشىرمەسى» دەپ سيپاتتايدى.
بۇۇ ادام قۇقىقتارى جونىندەگى جوعارعى كوميسسارى ناۆي پيللەي ۋكراينا زاڭدارى ادام قۇقىقتارى جونىندەگى حالىقارالىق زاڭنامالارعا ساي كەلمەيتىنىن ايتقان. ول زاڭداردىڭ «ازاماتتاردىڭ وي-پىكىر ەركىندىگىن, بەيبىت جيىن وتكىزۋ, اقپارات الۋ ەركىندىگىن جانە ازاماتتىق قوعامنىڭ ەركىن جۇمىس ىستەۋ قۇقىقتارىن بۇزادى» دەپ, ۋكراينا بيلىگىن ولاردى جويۋعا شاقىرعان.
كيەۆتەگى جاڭا زاڭعا قارسى شىققان شەرۋشىلەر مەن پوليتسيا قاقتىعىستارى تۇندە دە تولاستاماي تۇر.
ۋكراينا پرەزيدەنتى ۆيكتور يانۋكوۆيچ بۇعان دەيىن وپپوزيتسيا جەتەكشىلەرىن بيلىكپەن ديالوگ قۇرۋعا جانە ىمىرالاسۋعا شاقىرعان.
ايدار ورىباەۆ.
دەرەككوز: Azattyg.org
فوتو:Reuters.com
