پرەزيدەنتتەر اۋعانستانداعى قازىرگى جاعداي بويىنشا جان-جاقتى پىكىر الماستى. قاسىم-جومارت توقاەۆ شارل ميشەلدىڭ سۇراۋى بويىنشا, قازاقستاننىڭ اۋعان ماسەلەسىنە قاتىستى ۇستانىمىن ءبىلدىردى. مەملەكەت باسشىسى الەمدىك ۇيىمعا قولداۋ كورسەتۋ ماقساتىمەن بۇۇ-نىڭ اۋعانستانداعى كەڭسەسىن الماتىدا ۋاقىتشا ورنالاستىرۋ تۋرالى شەشىم قابىلدانعانىن حابارلادى.
قاسىم-جومارت توقاەۆ قازاقستانداعى اۋعان ستۋدەنتتەرىنە دە ءتيىستى كومەك كورسەتىلىپ جاتقانىن ايتتى. مەملەكەت باسشىسى اۋعان ماسەلەسىنە قاتىستى, سونىڭ ىشىندە اۋعانستاندا دا قازاقستان مەن ەۋروپالىق كەڭەس تىعىز قارىم-قاتىناس ورناتا الادى دەپ ەسەپتەيدى. قازاقستان ەۋروپالىق وداق ەلدەرىنىڭ ازاماتتارىن ەۆاكۋاتسيالاعان ۇشاقتارعا ءوز اۋەجايلارىندا جانار-جاعار ماي قۇيۋعا مۇمكىندىك جاساعانى تۋرالى ايتىلدى.
تاراپتار زاڭسىز ميگراتسيا, ەسىرتكى تاسىمالى, ادام جانە قارۋ-جاراق ساۋداسىنىڭ الدىن الۋ بويىنشا ىنتىماقتاستىق ورناتۋعا مۇددەلى ەكەنىن ءبىلدىردى. قازاقستاننىڭ ديپلوماتيالىق جانە وزگە دە سالالىق ۆەدومستۆولارى اتالعان ماسەلەلەر بويىنشا ەۋروپالىق كەڭەسكە كونسۋلتاتيۆتىك كومەك بەرە الادى.
مەملەكەت باسشىسى اۋعانستاندا بارلىق ەتنوستىق توپتاردىڭ قاتىسۋىمەن ينكليۋزيۆتى ۇكىمەت قۇرىلعاننان كەيىن جاعدايدىڭ تۇراقتالاتىنىنا ۇمىتتەنەدى. بۇعان سوعىستان زارداپ شەگىپ وتىرعان بارلىق اۋعان حالقى مۇددەلى.
ەۋروپالىق كەڭەستىڭ پرەزيدەنتى مازمۇندى سۇحباتقا ريزاشىلىعىن ءبىلدىرىپ, اۋعان تاقىرىبىنداعى كوپ ماسەلە بويىنشا كوزقاراستارىنىڭ ورتاق ەكەنىن اتاپ ءوتتى. شارل ميشەل قاسىم-جومارت توقاەۆتىڭ جىل سوڭىنا دەيىن بولاتىن بريۋسسەلگە ساپارى بارىسىندا جەكە كەزدەسەتىنىنە سەنىم ءبىلدىردى. سول ساپاردا قازاقستان مەن ەۋروپالىق كەڭەستىڭ ىنتىماقتاستىعى بويىنشا كۇن تارتىبىندەگى اۋقىمدى ماسەلەلەر جونىندە جان-جاقتى پىكىر الماساتىنىن ايتتى.
