وبلىس اكىمدىگىندە وتكەن اكتيۆ وتىرىسىندا قازاقستان پرەزيدەنتى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى حالىققا جولداۋى تالقىلاندى.
وبلىس اكىمدىگىندە وتكەن اكتيۆ وتىرىسىندا قازاقستان پرەزيدەنتى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى حالىققا جولداۋى تالقىلاندى.
وبلىس اكىمى كارىم كوكىرەكباەۆ بيىلعى جولداۋدا ماڭىزدى الەۋمەتتىك اسپەكتىلەرگە باسىمدىق بەرىلگەندىگى تۋرالى ايتا كەلىپ, ونى حالىققا جەتكىزۋ مەن ورىنداۋ جونىندەگى مىندەتتەرگە توقتالدى. جولداۋدا اتاپ وتىلگەن بالالاردى مەكتەپكە دەيىنگى بىلىممەن 100 پايىز قامتۋ تاپسىرمالارىن ىسكە اسىرۋ بويىنشا وبلىستاعى ءتيىستى باسشىلارعا بىرقاتار تاپسىرمالار بەردى. اتاپ ايتساق, 2020 جىلعا دەيىن 3-6 جاس ارالىعىنداعى بالالاردى تولىق مەكتەپكە دەيىنگى بىلىممەن قامتاماسىز ەتۋ ءۇشىن 88 بالاباقشا جانە 53 شاعىن ورتالىقتىڭ قۇرىلىسىن جۇرگىزۋ قاجەت. وسىعان بايلانىستى ايماق باسشىسى وبلىستىق ءبىلىم باسقارماسىنىڭ باسشىسىنا, اۋدان جانە قالا اكىمدەرىنە ءبىلىم نىساندارى بويىنشا جوبالىق-سمەتالىق قۇجاتتامالاردى دايىنداۋدى جۇكتەدى. سونىمەن قاتار, بۇرىنعى بالاباقشا عيماراتتارىن قايتارۋعا بيۋدجەتتەن قاراجات قاراستىرۋدى تاپسىردى.
سونىمەن بىرگە, بيىلعى جىلى تاراز قالاسىندا 300 توسەككە ارنالعان كوپسالالى اۋرۋحانانىڭ, 4 دارىگەرلىك امبۋلاتوريانىڭ, 1 فەلدشەرلىك-اكۋشەرلىك جانە 15 مەديتسينالىق پۋنكتتىڭ قۇرىلىسىن اياقتاۋدى تالاپ ەتتى. سونىمەن قاتار, وبلىس اكىمى 2016-2019 جىلدارعا ارنالعان يندۋستريالىق-يننوۆاتسيالىق دامۋ باعدارلاماسىنىڭ ەكىنشى بەسجىلدىعى ناقتى ءارى ساپالى ورىندالاتىندىعىن دا ەسكەرتىپ ءوتتى. بۇل باعىتتا دا ايماقتا جەمىستى جۇمىس اتقارىلىپ كەلەدى. وتكەن جىلى يندۋستريالاندىرۋ كارتاسى شەڭبەرىندە وبلىستا 8 يننوۆاتسيالىق جوبا جۇزەگە استى. وعان 21 ميلليارد تەڭگە قارجى جۇمسالىپ, 626 جاڭا جۇمىس ورنى اشىلعان. ۇستىمىزدەگى جىلى 22 ميلليارد تەڭگەنىڭ 7 ينۆەستيتسيالىق جوباسىن جۇزەگە اسىرۋ كوزدەلىپ وتىر, ول بويىنشا 866 جاڭا جۇمىس ورنى اشىلماق.
– ەلباسىمىز استانامىزدا ەكسپو-2017 حالىقارالىق كورمەسىن وتكىزۋ كەزىندە الەمدىك تاجىريبەدەگى «جاسىل ەكونوميكانى» ەنگىزۋدىڭ وزىق تەحنولوگياسىن پايدالانۋ كەرەكتىگىن تاپسىردى, – دەپ اتاپ ءوتتى اكىم. – بۇل سالادا دا وبلىستا بىرقاتار جەتىستىكتەر بار دەپ ايتا الامىن. مىسالى, وبلىستا ەكسپو-2017 حالىقارالىق كورمەسىنە دايىندىق شەڭبەرىندە 188 مۆت قۇرايتىن بالامالى ەنەرگەتيكا نىساندارى سالىنىپ جاتىر. بۇگىندە وبلىستا وسىنداي 5 جوبا جۇزەگە اسىرىلعان.
قازىرگى ۋاقىتتا اۋداندىق ماڭىزدى قالا, اۋىلدىق وكرۋگ جانە اۋىل اكىمدەرىنىڭ قۇزىرەتتەرى ءتيىستى زاڭمەن كەڭەيتىلدى. ولارعا قوسىمشا 79 وكىلەتتىك بەرىلدى. بۇل اكىمدەرگە ءىس جۇزىندە جەرگىلىكتى ماڭىزداعى بارلىق كوكەيكەستى ماسەلەلەردى جەرگىلىكتى قاۋىمداستىق مۇشەلەرىمەن بىرلەسە وتىرىپ, دەربەس جانە جاۋاپكەرشىلىكپەن شەشۋگە مۇمكىندىك بەرەدى. وبلىس اكىمى وسى ورايدا اۋدان اكىمدەرىنە بەرىلگەن وكىلەتتىكتەر شەڭبەرىندەگى جۇمىستاردى ءتيىمدى ۇيلەستىرۋدى, بۇگىنگى تاڭدا ءوتىپ جاتقان بارلىق دەڭگەيدەگى اكىمدەردىڭ ەسەپتەرىندە اتالعان ماسەلەلەردى كەڭىنەن تالقىلاۋدى تاپسىردى.
جىر الىبى جامبىل اتانىڭ اتىن يەمدەنگەن وبلىستى مەكەن ەتكەن 80-نەن استام ەتنوس وكىلدەرىنىڭ ەلباسىنىڭ بيىلعى جولداۋىنا قىزۋ قولداۋ كورسەتىپ, ونىڭ ىسكە اسۋىنا ايتارلىقتاي ۇلەس قوسارىنا سەنىم ءبىلدىرىلدى. ويتكەنى, بىرلىك پەن بەرەكە بار باقىتتىڭ باستاۋى بولىپ تابىلادى.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.
