قالا مەكتەپتەرىنىڭ ءداستۇرلى وقۋ فورماتىنا ورالۋىنا بايلانىستى قالا باسشىسى بالالاردىڭ دەنساۋلىعىن ساقتاۋ ءبىرىنشى كەزەكتەگى ماسەلە ەكەندىگىن اتاپ ءوتتى.
ونىڭ ايتۋىنشا, زياتكەر ۇرپاق تاربيەلەۋ باستى ستراتەگيالىق مىندەت پەن زامان تالابى بولىپ بەلگىلەنگەن. ءبىلىم سالاسىندا ماقساتتى ينديكاتورلىق كورسەتكىشتەر قويىلىپ, ادامي كاپيتالدىڭ ساپاسىن ارتتىرۋ مىندەتتەرى مەجەلەنگەن. بۇل باعىتتا مەملەكەت باسشىسىنىڭ تاپسىرماسىنا سايكەس, ءبىلىم بەرۋ ۇيىمدارىنىڭ قۇرىلىسىن جۇرگىزۋ, ولاردىڭ جابدىقتالۋ دەڭگەيىن ارتتىرۋ, ءبىلىم سالاسىندا مەملەكەتتىك-جەكەمەنشىك ارىپتەستىكتى جولعا قويۋ, پەداگوگ كادرلاردىڭ الەۋەتىن كوتەرۋ, تاعى باسقا ماڭىزدى كورسەتكىشتەر قامتىلعان.
الداعى 5 جىلدا قالادا 72 مەكتەپتىڭ قۇرىلىسىن جۇرگىزۋ جوسپارلانىپ, ءۇش اۋىسىمدى مەكتەپتەر ماسەلەسى مەن مەكتەبى جوق شاعىناۋداندار مەن تۇرعىن الاپتاردا جاڭا مەكتەپتەر سالۋ بەلگىلەنگەن. بيىل 32 مەكتەپتىڭ قۇرىلىسى باستالسا, جىل سوڭىنا دەيىن 20 مەكتەپ ىسكە قوسىلماق. تاعى 16 مەكتەپ قۇرىلىسىنا جەكە ينۆەستورلار تارتىلعان.
قالا باسشىسى پەداگوگتارعا وقۋشىلار ءبىلىم وليمپيادالارى مەن ۇلتتىق تەستىلەۋ كورسەتكىشتەرىنەن وق بويى وزىق تۇرۋى كەرەك دەگەن تالابىن جەتكىزدى. بالالاردى كيبەركەڭىستىكتەگى ناشاقورلىق بيزنەسىنەن بارىنشا قورعاپ, ولاردىڭ الەۋمەتتىك جەلىدەگى بەلسەندىلىگىن باقىلاۋدا ۇستاۋ ماسەلەسىن دە العا تارتتى.
«بۇگىن مەكتەبىنە ۇلەس قوسقان بالا, ەرتەڭ ەلىنە ۇلەس قوساتىن بولادى», دەدى مۇرات ايتەنوۆ ءوز سوزىندە.
