كەشە پرەمەر-مينيستر سەرىك احمەتوۆتىڭ قاتىسۋىمەن «قتج» ۇك» اق 2013 جىلى اتقارىلعان جۇمىستارىنىڭ قورىتىندىسىن شىعاردى. سونىمەن قاتار, 2014 جىلعى باسىم باعىتتار بەلگىلەندى.
كەشە پرەمەر-مينيستر سەرىك احمەتوۆتىڭ قاتىسۋىمەن «قتج» ۇك» اق 2013 جىلى اتقارىلعان جۇمىستارىنىڭ قورىتىندىسىن شىعاردى. سونىمەن قاتار, 2014 جىلعى باسىم باعىتتار بەلگىلەندى.
ۇلتتىق كومپانيا وتكەن جىلدى تابىستى اياقتادى. ەلىمىزدىڭ كولىكتىك-ترانزيتتىك الەۋەتىن كەڭەيتىپ, كولىكتىك-لوگيستيكالىق حابتى دامىتۋ, سونداي-اق, تاسىمالداۋ جىلدامدىعىن ارتتىرىپ, سەرۆيستىك قىزمەتتى جاقسارتۋ جۇمىستارى ناتيجەلى بولدى.
جينالىستا كومپانيا پرەزيدەنتى ا.مامين بايانداما جاسادى. «2013 جىلى «قتج» ۇك» اق بارلىق نەگىزگى وندىرىستىك جانە قارجىلىق مىندەتتەمەلەرىن تولىق ورىندادى», دەدى ول. سونىمەن, جوسپارداعىدان جۇك اينالىمى – 1, جولاۋشى اينالىمى 0,3 پايىزعا وسكەن. تازا تابىس – 3,2, ەڭبەك ونىمدىلىگى ءار ادامعا شاققاندا 1,3 پايىزعا, ياعني ارتىعىمەن ورىندالعان. مۇنىمەن قاتار, كومپانيا ستراتەگيالىق دامۋىن جۇزەگە اسىرىپ, وندىرىسكە جاڭا تەحنولوگيالار ەنگىزىپتى. اكتيۆتەرى دە جاڭعىرتىلۋدا ەكەن. كومپانيانىڭ قورى جەكە وندىرىستىك جانە جوعارى تەحنولوگيالىق ونىمدەرمەن تولىقتىرىلىپ جاتقان كورىنەدى. اتاپ ايتقاندا, «لوكوموتيۆ قۇراستىرۋ زاۋىتى» اق تەپلوۆوزدارى مەن «تۇلپار-تالگو» جشس, سونداي-اق «قۆك» جشس ونىمدەرىمەن تولىعا تۇسكەن. قاڭتار ايىندا 12 قازاقستاندىق العاشقى تەپلوۆوزدار تاجىريبەلىك سىناقتان وتكىزىلىپتى.
بىلتىر 135 لوكوموتيۆ, 3154 جۇك, 288 جولاۋشىلار ۆاگونىن ساتىپ الىپ, 631 شاقىرىم جولدى كۇردەلى جوندەۋدەن وتكىزىپ ۇلگىرگەن. مۇنىمەن بىرگە, جاڭا جولاۋشى پويىزدارىنىڭ قۇرامى – استانا – اتىراۋ, الماتى – اتىراۋ باعدارىنا شىعا باستادى. ال بيىل جۇردەك پويىزدار استانا – قىزىلوردا, الماتى – اقتوبە, استانا – وسكەمەن, الماتى – وسكەمەن, الماتى – تاشكەنت باعىتتارىنا جول تارتادى ەكەن. حالىقارالىق جۇك پويىزدارىنىڭ كونتەينەرلىك قۇرامالارى چۋنتسين – دوستىق – دۋيسبۋرگ, چەندۋ – دوستىق – لودز باعىتتارىنا قاتىناي باستاپتى. الدىن الا اقپاراتتىق باعدارلاما جانە ەلەكتروندى رەسىمدەۋ ارقىلى بۇل پويىز توقتاۋسىز تاۋلىگىنە 997, كەي تۇستاردا 1100 شاقىرىمعا دەيىن جۇرەدى. وتكەن جەلتوقسان ايىنان بەرى سيان – قازاقستان كونتەينەرلىك پويىزى جاساقتالىپ, ەۋروپادان ازياعا جانە كەرى قاراي قىسقا مەرزىمدە جۇيەلى تۇردە جۇك تاسىمالدانا باستاسا, بيىل سيان – وزبەكستان, شەنجەن – قازاقستان, ليانيۋنگان – قازاقستان كونتەينەرلىك جۇردەك جۇك پويىزدارى جاساقتالادى, دەيدى ا.مامين.
سونداي-اق, بىلتىر جەزقازعان-بەينەۋ جانە ارقالىق-شۇباركول ماگيسترالدارىنىڭ جوعارعى قاباتىن توسەپ, توركوزدى رەلستى-شپالداردى ءتۇيىستىرىپتى. وسى جىلى تەمىرجولشىلار جاڭا جەلىلەردەگى ينفراقۇرىلىمداردى اياقتاپ, ستانساداعى الەۋمەتتىك جانە ينجەنەرلىك نىسانداردىڭ قۇرىلىسىن ءبىتىرۋدى كوزدەپ وتىر. قتج-نىڭ بازاسىندا «KTZ Express» اق كولىكتىك-لوگيستيكالىق وپەراتورى قۇرىلىپتى. ول تەمىرجول, اقتاۋ تەڭىز پورتى, 11 اۋەجاي, «قورعاس» حالىقارالىق شەكارالىق ستانساسى اراسىنداعى كولىكتىك-لوگيستيكالىق تىزبەك جۇمىسىن ۇيلەستىرەدى.
بايانداماشىلاردى مۇقيات تىڭداعان س.احمەتوۆ تەمىرجول كومپانياسى 2013 جىلى مەملەكەت باسشىسى مەن ۇكىمەت بەرگەن تاپسىرمالاردى ويداعىداي ورىنداعانىن اتاپ ءوتتى. سالاداعى ءوندىرىستىڭ دامۋ قارقىنىنا كوڭىلى تولاتىنىن ءبىلدىردى. تەمىرجول بويىنداعى ينفراقۇرىلىمنىڭ جاقسارعانىنا دا نازار اۋداردى. ەلباسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا ءترانزيتتى جەتىلدىرىپ, تەمىر جولداردىڭ وتكىزۋ قابىلەتىن ارتتىرۋدى جۇكتەدى. بۇل تاپسىرمانىڭ مۇلتىكسىز ورىندالۋىنا مىندەتتىمىز. سونداي-اق, ۆوكزالداردى كۇردەلى جوندەۋلەردەن وتكىزىپ جاتىرمىز. بۇل دا قۇپتارلىق جۇمىس. ويتكەنى, ەكسپو-2017-گە دەيىن قالالار مەن رازەزدەردىڭ ءبارىنىڭ ۆوكزالدارىن رەتكە كەلتىرىپ ۇلگەرۋگە ءتيىسپىز. ال, ۇكىمەت تاراپىنان تەمىرجول كومپانياسىن قولداۋ شارالارى جالعاسا بەرەدى, دەدى پرەمەر-مينيستر. دەسە دە, ۇكىمەت باسشىسى جولاۋشىلار تاسىمالىنا قاتىستى سىني پىكىرىن دە ءبىلدىردى. ۆاگونداردىڭ سانيتارلىق تازالىق جاعدايى سىن كوتەرمەيتىنىن ايتتى. سونداي-اق, بيلەت باعاسىنىڭ قىمباتتاۋى كورسەتىلەتىن سەرۆيسكە سايكەس بولۋى كەرەكتىگىن نازارعا الدى. مۇنىمەن قاتار, تاۋارىن ەكسپورتقا شىعاراتىن وتاندىق كاسىپورىندار مەن كومپانيالارعا جەڭىلدىكتەر قاراستىرىلۋى ءتيىس ەكەنىن قاپەرگە سالدى. ءتىپتى, ولارعا سۋبسيديا قاراستىرعان ءجون بولاتىنىن ءبىلدىردى. ءسوز سوڭىندا ۇكىمەت باسشىسى تەمىرجولشىلارعا بىرقاتار تاپسىرمالار بەرىپ, ولاردىڭ ورىندالۋ بارىسى ۇكىمەتتىڭ باقىلاۋىندا بولاتىنىن ەسكەرتتى.
ءوز كەزەگىندە تەمىرجولشىلار بيىل جۇك اينالىمىن – 233,8 ملرد. توننا-شاقىرىمعا, جولاۋشىلار اينالىمىن 17,3 ملرد. جولاۋشى-شاقىرىمعا جەتكىزىپ, كىرىس كولەمىن 962 ملرد. تەڭگەگە جەتكىزۋگە مىندەتتەمە الدى.
نۇرباي ەلمۇراتوۆ,
«ەگەمەن قازاقستان».
