بۇل تۋرالى Telegram-داعى Risk Takers كانالىندا قوزعالىپ, الماتىدا باسپانا شارشى مەترىنىڭ ورتاشا باعاسى جىل باسىنان بەرى 459,9 مىڭنان 518,1 مىڭ تەڭگەگە دەيىن وسكەنى ءسوز بولدى.
«يندەكس 12,65 پايىزعا قىمباتتاپ وتىر. ەلوردادا دا سونداي ديناميكا بايقالادى. سونداي-اق شارشى مەتر قۇنىنىڭ ءوسۋى وبلىس ورتالىقتارى مەن وزگە دە ءىرى قالالاردا تىركەلدى. يندەكس ترەندىنىڭ وڭ جاعدايدا قالا بەرۋى باعا تۇراقتالۋىنىڭ ءالى دە كەشەۋىلدەيتىنىن اڭعارتاتىنداي. الايدا ساتۋ-ساتىپ الۋ كەلىسىمدەرى سانىنىڭ ازايۋى ارقاسىندا باعا ءوسىمى باياۋلاۋى مۇمكىن. مەملەكەت قۇرىلىسشىلاردى قولدايتىن جاڭا مەحانيزم ويلاپ شىعارمايدى دەپ ۇمىتتەنەمىز. باعا ءوسىمى مەن ونىڭ تۇراقتالۋى قانداي دا ءبىر شارالار ەسەبىنەن ەمەس, تازا نارىقتىق تەندەنتسيالار اسەرىمەن رەتتەلۋى كەرەك», دەپ جازادى اتالعان كانال ساراپشىسى.
ال Tengenomika كانالىنىڭ جازۋىنشا, شىلدە ايىندا جاڭا ۇيلەر باعاسى 0,4, ەكىنشى نارىق ۇيلەرى 1,1, ال ارەندا 0,6 پايىزعا قىمباتتاعان. جىلدىق مولشەردە ەسەپتەيتىن بولساق, نارىقتىڭ اتالعان سەگمەنتتەرى 12 اي ىشىندە 12,9%, 24,9% جانە 11,9%-عا وسكەن. بۇل رەتتە كانال ساراپشىسى 2021-ءدىڭ جەتى ايىنىڭ قورىتىندىسىن ەسكەرگەندە باسپانا باعاسىنىڭ ۇزاق مەرزىمدى ءۇردىسى مەن ەلدەگى جالپى ينفلياتسيا (2012 جىلدىڭ قاڭتارىنان باستاپ) اراسىندا ايىرماشىلىق ۇلعايىپ بارا جاتقانىن ايتادى.
«ەكىنشى نارىق ءۇي باعاسىنىڭ ۇزاق مەرزىم بويعى ءوسىمى 2012 جىلدان بەرى جيناقتالعان ينفلياتسيادان 37 پايىزدىق پۋنكتكە الدا تۇر. ال جاڭا ۇيلەردىڭ ۇزاق مەرزىم بويعى قىمباتتاۋ جىلدامدىعى جيناقتالعان ينفلياتسيامەن اراداعى ايىرمانى 2 پايىزدىق پۋنكتكە دەيىن قىسقارتقان. سالىستىرار بولساق, بىلتىر جەلتوقساندا جاڭا ۇيلەر باعاسىنىڭ ۇزاق مەرزىمدى ءوسۋى جيناقتالعان ينفلياتسيادان 10 پايىزعا تومەن بولعان. سوڭعى رەت مۇنداي جاعداي 2013-2016 جىلدارى بايقالىپ ەدى. ول كەزدە تەڭگە باعانىنىڭ قۇلدىراپ كەتۋىنەن نارىق قىزىپ كەتكەن بولاتىن. ءبىزدىڭ باعالاۋىمىز بويىنشا, ءدال قازىرگى ساتتە نارىقتىڭ قىزىپ كەتۋىنە بجزق سالىمشىلارىنا قورداعى ارتىق قاراجاتىن پايدالانۋ مۇمكىندىگىنىڭ بەرىلۋى سەبەپ بولدى», دەپ جازادى Tengenomika.
قۇرىلىسشىلار وداعىنىڭ باسشىسى تالعات ەرعاليەۆ باسپانا باعاسىنىڭ شىرقاپ كەتۋىنە بجزق اسەرى ءتيدى دەگەن كوزقاراسپەن كەلىسپەيدى.
«قازىر قوعامنىڭ جانە كەيبىر مەملەكەتتىك ورگان باسشىلارىنىڭ جىلجىمايتىن م ۇلىك نارىعىنداعى احۋالدى دۇرىس تۇسىنبەي وتىرعانىن كورۋدەمىز. پرەزيدەنت ق.توقاەۆتىڭ بۇل باستاماسى شىن مانىندە وتە ءتيىمدى جانە ءبىرازدان بەرى پاتەرگە قول جەتكىزە الماي جۇرگەن قازاقستاندىقتار ءۇشىن تاماشا مۇمكىندىك بولدى. قازاقستاندىقتار قور قارجىسىنىڭ 40 پايىزعا جۋىعىن يپوتەكالىق زايمدارىن وتەۋگە جانە ەمدەۋگە جۇمسادى. شامامەن 60 پايىزى ءبىرىنشى جانە ەكىنشى باسپانا نارىعىنا كەلىپ ءتۇستى. قازىر قازاقستاندا 162 مىڭ پاتەر ساتۋعا قويىلعان. بۇل – شامامەن 11 ملن شارشى مەتردەن استام ءۇي. ەگەر ۇسىنىس كوپ, ال حالىقتىڭ تولەم قابىلەتى تومەن بولسا باعا وسپەيدى. دەمەك ۇسىنىسقا قاراپ ەلىمىزدە باسپانا تاپشىلىعى جوق ەكەنىن اڭعارامىز. سوندىقتان باسپانا باعاسى زەينەتاقى قارجىسىنىڭ كەلۋىمەن اسپاندادى دەۋگە دە نەگىز جوق. مويىنداۋ كەرەك, ازاماتتاردىڭ زەينەتاقى قارجىسى ساتۋ-ساتىپ الۋ كەلىسىمدەرىن كوبەيتكەن شىعار, الايدا باعاعا اسەر ەتكەن جوق. باعا وسىمىنە بارلىق قۇرىلىس ماتەريالدارىنىڭ قىمباتتاۋى اسەرىن تيگىزدى. قۇرىلىس ماتەريالدارىنىڭ قىمباتتاۋى بجزق قارجىسىنىڭ شىعۋىمەن تۇسپا-تۇس كەلىپ قالدى», دەيدى ت.ەرعاليەۆ.
