قوستاناي وبلىستىق قازاقستان حالقى اسسامبلەياسى ەتنومادەني بىرلەستىكتەرىنىڭ مۇشەلەرى جولداۋ تۋرالى وسىنداي تۇجىرىمعا كەدى
ەلباسى نۇرسۇلتان نازارباەۆ حالىققا ءداستۇرلى كەزەكتى جولداۋىن جولداعاننان كەيىن, قوستانايداعى «دوستىق» ۇيىنە وبلىستىق قازاقستان حالقى اسسامبلەياسى ەتنومادەني ۇيىمدارىنىڭ, عىلىمي-ساراپتاۋ توبىنىڭ جانە قوعامدىق كەلىسىم كەڭەسىنىڭ مۇشەلەرى جينالىپ, كەڭەيتىلگەن ءماجىلىس وتكىزدى.
قوستاناي وبلىستىق قازاقستان حالقى اسسامبلەياسى ەتنومادەني بىرلەستىكتەرىنىڭ مۇشەلەرى جولداۋ تۋرالى وسىنداي تۇجىرىمعا كەدى
ەلباسى نۇرسۇلتان نازارباەۆ حالىققا ءداستۇرلى كەزەكتى جولداۋىن جولداعاننان كەيىن, قوستانايداعى «دوستىق» ۇيىنە وبلىستىق قازاقستان حالقى اسسامبلەياسى ەتنومادەني ۇيىمدارىنىڭ, عىلىمي-ساراپتاۋ توبىنىڭ جانە قوعامدىق كەلىسىم كەڭەسىنىڭ مۇشەلەرى جينالىپ, كەڭەيتىلگەن ءماجىلىس وتكىزدى.
ولار عالامتور مۇمكىندىگىن پايدالانىپ, ەلەكتروندىق اقپارات قۇرالدارى ارقىلى بەرىلگەن اقپاراتتاردى كورىپ, تىڭداپ, جولداۋدا ايتىلعان ماسەلەلەردەن ءبىراز حاباردار بولىپ ۇلگەردى. وبلىستىق قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى باعىتۇر الىمباەۆ جولداۋدىڭ ماڭىزىنا توقتالدى.
– ەلباسىنىڭ بۇل كەزەكتى جولداۋى ەل تاۋەلسىزدىگىن العان جىلداردان بەرى قازاقستاننىڭ ءوسۋ, دامۋ جولىن كورسەتكەندەي بولدى. ەلباسىنىڭ ءار جولداۋىندا ەلىمىزدىڭ بولاشاعىن ايقىندايتىن ماقساتتار قويىلىپ كەلدى. وسى كەزگە دەيىن نۇرسۇلتان ءابىش ۇلى كوتەرگەن كوپتەگەن ماسەلەلەر جۇزەگە استى. قازاقستاننىڭ دۇنيەجۇزىندەگى موينى وزىق ەلۋ ەلدىڭ اراسىنان ورىن الۋى, ەندى ەڭ ۇزدىك وتىزدىقتىڭ قاتارىنان كورىنۋ ءۇشىن العا ۇلكەن ماقساتتار قويۋى وسىنىڭ دالەلى, – دەدى ب.الىمباەۆ. – دامۋدىڭ ۇلگىلەرى ءوزىمىزدىڭ وبلىسىمىزدىڭ مىسالىنان دا جەتەرلىك. قانشاما يننوۆاتسيالىق كاسىپورىندار, زاۋىتتار ىسكە قوسىلدى. اۋىل شارۋاشىلىعىنداعى جەتىستىكتەر ءوز الدىنا. ارينە, دامۋدىڭ جولى تاقتايداي تەگىس بولمايدى, كەمشىلىكتەر, ءالى دە كوپ ەڭبەكتى قاجەت ەتەتىن ولقىلىقتار دا بار. ونىڭ بارلىعى دا ەڭبەكتىڭ, بىرلىكتىڭ ارقاسىندا جوندەلەدى.
مۇنان كەيىن وبلىستىق قازاقستان حالقى اسسامبلەياسىنداعى عىلىمي-ساراپتاۋ توبىنىڭ مۇشەسى, تاريح عىلىمدارىنىڭ دوكتورى ەركىن ءابىل ءسوز الدى.
– ەلباسى نۇرسۇلتان نازارباەۆتىڭ بۇل جولداۋىنىڭ باستى ەرەكشەلىگى ستراتەگيالىق جوسپارلاۋدىڭ قاجەتتىلىگىن ايتۋىندا دەپ بىلەمىن. كەڭەس وداعىنداعى جوسپارلى ەكونوميكادان كەيىن جوسپارلاۋ تاسىلىنە كەرى كوزقاراس قالىپتاسىپ قالعانداي ەدى. الايدا, ول جوسپارلاۋ مەن بۇل ستراتەگيالىق جوسپارلاۋدى سالىستىرۋعا بولمايدى. جوسپارلاماسا اۋاجايىلۋشىلىق بولماي ما؟ جوسپار اتقاراتىن ءىسىڭدى رەتتەۋ, وعان ۇمتىلۋ, كۇش-قۋاتىڭدى جيناقتاۋ دەگەن ءسوز عوي. ەلباسى «2030» ستراتەگياسى تۋرالى ايتقاندا كەيبىرەۋلەر وعان كۇمانمەن قاراعانى جاسىرىن ەمەس. سوندا ايتىلعان ءىرى-ءىرى ماسەلەلەردىڭ كوپشىلىگى ون بەس جىلدىڭ ىشىندە-اق جۇزەگە استى عوي. ەلباسىنىڭ جولداۋىندا اتان تۇيە تارتا المايتىنداي اسقاق تسيفرلار بار. بىراق ايتىلدى ما, العا ۇمتىلساق, كورىنگەن توبەنىڭ الىستىعى بولمايدى, يگەرەمىز. ول ءۇشىن قازاقستاندا مۇمكىندىك, جاعداي تولىعىمەن جەتەدى. مىسالى, شيكىزات بار, قارجى بار, كادر دايىنداۋ تاجىريبەسى بار, ەگەر ولاردى وقىتۋ كەرەك بولسا, قايدا وقىتۋ كەرەك ەكەنىن بىلەمىز, – دەدى ەركىن امانجول ۇلى.
مۇنان كەيىن پولياك, تاجىك, ازەربايجان, ورىس, ت.ب. ەتنومادەني بىرلەستىكتەر وكىلدەرى جولداۋ تۋرالى ءوز ويلارىن ورتاعا سالدى. پولياك ۇلتىنىڭ وكىلى ۆيكتور رادۋمسكي: «ماعان ەلباسىنىڭ مەديتسينا تۋرالى ايتقانى وتە ۇنادى. ادامدار ءوز دەنساۋلىعى تۋرالى وزدەرى ويلانۋى قاجەت, قوعامعا بۇل پىكىر سىلكىنىس بەرەدى. دۇنيەدەگى ەلدەردىڭ تۇرعىندارى دەنساۋلىعىن جوندەۋ ءۇشىن قازاقستانعا كەلەتىن كۇن دە تۋار», دەسە, تاجىك ەرگوشۆوي حولماتوۆ: «نۇرسۇلتان نازارباەۆ ورتا جانە شاعىن بيزنەس تۋرالى وتە ورىندى ايتتى. ءىرى يننوۆاتسيالىق زاۋىتتار كەرەك, بىراق ولارداعى جۇمىس ورنى شەكتەۋلى بولادى عوي. سوندىقتان ادامدارعا جۇمىس بەرۋشى نەگىزىنەن شاعىن جانە ورتا بيزنەس بولۋى قاجەت. كىم دە بولسا جۇمىس ىستەگەندە عانا جاقسى تۇرادى», دەدى. ورىس ەتنومادەني بىرلەستىگىنىڭ جەتەكشىسى يۋري يۆلەۆ: «پرەزيدەنتتىڭ جولداۋىندا كوتەرىلگەن ماسەلەلەر مەن العا قويعان ماقساتتاردىڭ بارلىعى شىنايى دەپ بىلەمىن. ويتكەنى, وسىدان ون بەس جىل بۇرىن قازاقستاندا ماشينا جاساۋ ءىسى وسىنشا داميدى دەپ كىم ويلاعان ەدى؟ بولاشاقتا روبوتتەحنيكا دا قازاقستاندىقتار ءۇشىن جات بولمايتىنىنا سەنەمىن», دەدى.
قوستانايدا ءبىر اتانىڭ بالالارىنداي تاتۋلىقتى تۋ ەتىپ تۇرىپ جاتقان كوپ ۇلتتىڭ وكىلدەرى ەلباسىنىڭ بيىلعى «قازاقستان جولى – 2050»: ءبىر ماقسات, ءبىر مۇددە, ءبىر بولاشاق» اتتى جولداۋىندا ءومىردىڭ بارلىق سالاسى قامتىلعاندىعىن تىلگە تيەك ەتتى. ولاردىڭ بارلىعى دا ەندىگى ماقسات – بۇل قۇجاتتىڭ قازاقستاندىقتاردىڭ تەگىس تانىسۋى, اركىمنىڭ جۇرەگىندە جۇرەتىن الداعى ۋاقىتتىڭ باعدارشامى بولۋى قاجەتتىگىن ايتتى.
ءنازيرا جارىمبەتوۆا,
«ەگەمەن قازاقستان».
قوستاناي.
