كەشە ورتالىق كوممۋنيكاتسيالار قىزمەتىندە وڭىرلىك دامۋ ءمينيسترى بولات جامىشەۆ مەملەكەت باسشىسىنىڭ تاياۋداعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداعان جولداۋىنا وراي بريفينگ وتكىزدى.
كەشە ورتالىق كوممۋنيكاتسيالار قىزمەتىندە وڭىرلىك دامۋ ءمينيسترى بولات جامىشەۆ مەملەكەت باسشىسىنىڭ تاياۋداعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداعان جولداۋىنا وراي بريفينگ وتكىزدى.
وعان ءمينيستردىڭ ەكى ورىنباسارى ق.وسكەنباەۆ پەن س.جۇمانعارين دە قاتىسىپ وتىردى. وڭىرلىك دامۋ ءمينيسترى جولداۋدىڭ ماڭىزدىلىعىن تىلگە تيەك ەتىپ, ونىڭ بىرقاتار ءبولىمدەرىنە ارنايى توقتالىپ ءوتتى. «جولداۋدا كاسىپكەرلىكتى دامىتۋعا باسىمدىق بەرىلگەن. اسىرەسە, ورتا جانە شاعىن بيزنەسكە قولداۋ كورسەتىپ, ونىڭ وركەن جايۋىنا مۇمكىندىك جاساۋ شاراسى پىسىقتالعان. ول ءۇشىن وڭىرلىك دامۋ مينيسترلىگى بىرقاتار ىستەردى قولعا الىپ, جۇزەگە اسىرۋ جولدارى قاراستىرىلىپ جاتىر. اتاپ ايتقاندا, پارلامەنتكە «رۇقساتتار مەن حابارلامالار تۋرالى» زاڭ جوباسى ەنگىزىلدى. ول بويىنشا 9 كودەكس پەن 74 زاڭعا وزگەرىستەر مەن تولىقتىرۋلار ەنگىزىلەدى. ناتيجەسىندە جاعىمدى بيزنەس-احۋال ورنىعادى دەگەن ءۇمىت بار», دەدى ب.جامىشەۆ.
ءمينيستردىڭ سوزىنە قاراعاندا, كاسىپكەرلەردىڭ ەركىن جۇمىس ىستەپ, شارۋاسىن كەڭەيتۋلەرىنە كوپتەگەن تەكسەرۋلەر مەن كەدەرگىلەر بار كورىنەدى. ونداي كەلەڭسىزدىكتەردىڭ جولىن كەسۋ شارالارى وزگەرتىلگەن ءجانە تولىقتىرىلعان زاڭدا قاراستىرىلىپتى. ەندىگىدە بارلىق ءراسىمدەر مەن تالاپتار ۇكىمەت قاۋلىلارىنىڭ دەڭگەيىندە بەكىتىلەتىن بولادى ەكەن. مۇنىمەن قاتار, كاسىپكەرلىك قىزمەتتى مەملەكەتتىك رەتتەۋدىڭ 2020 جىلعا دەيىنگى تۇجىرىمداماسى دا جاسالىپتى. ەندى ونى بەكىتۋ ماقساتىندا مەملەكەت باسشىسى جارلىعىنىڭ جوباسى ءازىرلەنىپتى. وسىناۋ زاڭدار مەن تۇجىرىمدامالاردى دايىنداۋعا اتالعان مينيسترلىكپەن قاتار, جاۋاپتى ۆەدومستۆولار مەن ۇلتتىق كاسىپكەرلەر پالاتاسى دا اتسالىسىپتى.
– مينيسترلىكتىڭ قازىرگى اتقارىپ جاتقان جۇمىستارىنىڭ ءبارى ەلباسىنىڭ اتالعان جولداۋىنان كورىنىس تاۋىپ جاتقانىنا وزدەرىڭىز كوز جەتكىزىپ وتىرسىزدار. مەملەكەت باسشىسى 2050 جىلعا قاراي قازاقستان حالقىنىڭ 70 پايىزى قالالاردا تۇراتىنىن ايتتى. ماسەلەن, ءبىزدىڭ ەلگە گەوگرافيالىق جاعىنان ۇقساس اۆستراليا مەن كانادادا سولاي. بۇيىرتسا, قازىرگى قولعا الىپ جاتقان جۇمىستارىمىز جەمىستى بولسا, بولاشاقتا حالىقتىڭ 35 پايىزى تۇرعىندارى 2 ميلليوننان اساتىن قالالاردا تۇرۋى ءتيىس. ەلباسى ايتقانداي, بۇل ورىندالماس ارمان-قيال ەمەس, ارەكەت ەتكەن قانداي دا قوعام قول جەتكىزە الاتىن ناقتى ماقسات, دەدى مينيستر.
مەملەكەت باسشىسىنىڭ جولداۋىندا جۇكتەلگەن تاپسىرمالار مەن ۇسىنىستاردىڭ وڭىرلىك دامۋ مينيسترلىگىنە قاراستىلارىن تولىق سارالاپ, ولاردى ورىنداۋ جولدارىن بايانداعان ب.ءجامىشەۆ, جۋرناليستەردىڭ قويعان سۇراقتارىنا دا جاۋاپ بەردى.
نۇرباي ەلمۇراتوۆ,
«ەگەمەن قازاقستان».
