قاجىبەك توتەكين - قىتاي ەلىندەگى قازاقتار اراسىندا جازۋشىلىق ەڭبەگىمەن كەڭىنەن تانىلعان بەلگىلى قالامگەر.
ول 1940 جىلى 1 جەلتوقساندا قىتايدىڭ تارباعاتاي ايماعى تولى اۋدانى مايلى تاۋ باۋرايىندا دۇنيەگە كەلگەن.
شىعارماشىلىعىن 1958 جىلى «شۇعىلا» جۋرنالىنا شىققان « ۇلى جوسپار» اتتى ولەڭىمەن باستاعان. سودان بەرى ادەبيەتتىڭ بارلىق جانرىندا قالام تەربەگەن. قاجىبەك توتەكيننىڭ قىتاي ەلىندە «دوڭگەلەنگەن دۇنيە» اتتى اڭگىمە-پوۆەستەر جيناعى, «ساقابانىڭ ساتيرالارى» ەسسە-اڭگىمەلەر جيناعى, «سەرۋەن سەزىمدەر» اتتى جىر كىتابى جارىق كورگەن. بۇدان باسقا «جانىم ساعان ايتايىن» جىر كىتابى, «بويتۇمار» اڭگىمە-ەسسە كىتابى, «دارىماعان قارعىس» اتتى ولەڭ رومانى قازاقستاندا جارىق كورگەن. بيىل «اتاسى مەن ەدىگەنىڭ قىزىقتى حيكايالارى» اتتى بالالارعا ارنالعان كىتابى مەن «وسى شاردا مەن بارمىن» اتتى جىر جيناعى باسپاعا ۇسىنىلعان.
قىتاي جەرىنەن كوشىپ كەلگەن جازۋشىنىڭ شاڭىراعى الماتى وبلىسىنا قونىستانعان. بەلگىلى جازۋشىنىڭ ەسىمى قىتايداعى مەملەكەتتىك «ادەبيەت كوركەمونەر سالاسىنداعى ايگىلى ادامدار» ەنتسيكلوپەدياسىنا, «20-عاسىر قىتاي جازۋشىلارى» ەنتسيكلوپەدياسىنا ەنگەن.
