پرەزيدەنت • 17 تامىز، 2021

قاسىم-جومارت توقاەۆ قازاق-كورەي ىسكەر توپتارىنىڭ دوڭگەلەك ۇستەلىنە قاتىستى

59 رەت كورسەتىلدى

مەملەكەت باسشىسى جوعارى دەڭگەيدەگى كەلىسسوزدەردەن كەيىن كورەيا مەن قازاقستاننىڭ ءىرى كومپانيالارى باسشىلارىنىڭ جيىنىنا قاتىستى. بۇل تۋرالى اقوردا حابارلادى، دەپ جازادى Egemen.kz.

قازاقستان پرەزيدەنتى جيىنعا قاتىسۋشىلارعا پرەزيدەنت مۋن چجە ينمەن وتكەن مەملەكەتارالىق كەلىسسوزدەردىڭ نەگىزگى قورىتىندىلارى تۋرالى ايتىپ بەردى. قاسىم-جومارت توقاەۆ وڭتۇستىك كورەيانىڭ قازاقستان ءۇشىن اسا ماڭىزدى ستراتەگيالىق ارىپتەس ەكەنىنە توقتالدى.

«سوڭعى 15 جىلدا ءسىزدىڭ ەلىڭىزدەن كەلەتىن تىكەلەي ينۆەستيتسيا كولەمى 6 ميلليارد دوللاردان استى. قازاقستاندا كورەيالىق كاپيتال سالىنعان 550-دەن استام كاسىپورىن تابىستى جۇمىس ىستەپ جاتىر. ولاردىڭ قاتارىندا Samsung، Hyundai، Lotte، Posco، KNOC جانە باسقا دا جەتەكشى كورپوراتسيالار بار. وسى كومپانيالاردىڭ قاتىسۋىمەن جالپى قۇنى 2،5 ميلليارد دوللاردان اساتىن 24 ءىرى جوبا جۇزەگە اسىرىلدى. اسىرەسە، كورەيالىق SK Engineering & Construction كومپانياسىنىڭ قاتىسۋىمەن جۇزەگە اسىرىلىپ جاتقان ۇلكەن الماتى اينالما تاسجولىنىڭ (باكاد) قۇرىلىسىن ايتۋعا بولادى»، دەدى قاسىم-جومارت توقاەۆ.

1

سونىمەن قاتار مەملەكەت باسشىسى اۆتوموبيل جاساۋ، تۇرعىن ءۇي قۇرىلىسى، مەتاللۋرگيا جانە اۋىلشارۋاشىلىعى سياقتى سالالاردا جالپى قۇنى 1،5 ميللارد دوللاردان اساتىن كەلەشەگى زور ءۇمىت كۇتتىرەتىن 16 ينۆەستيتسيالىق جوبانىڭ ىسكە اسىرىلاتىنى تۋرالى ايتتى.

پرەزيدەنت ەكونوميكالىق ىنتىماقتاستىقتى ارتتىرۋعا جاڭا مۇمكىندىكتەردىڭ بار ەكەنىنە نازار اۋداردى. قاسىم-جومارت توقاەۆ يننوۆاتسيالار مەن جاڭا تەحنولوگيالارعا نەگىزدەلگەن ەكونوميكانى قالىپتاستىرۋعا باسىمدىق بەرىلەتىنىن اتاپ ءوتتى.

2

«قايتا وڭدەۋ ونەركاسىبىندەگى جوعارى تەحنولوگيالى ءوندىرىس، سونداي-اق، يندۋستريا 4.0 تەحنولوگيالارىنا ستراتەگيالىق تۇرعىدان مۇددەلىمىز. وڭتۇستىك كورەيا ەكونوميكانى تسيفرلاندىرۋ بويىنشا الەمدىك كوشباسشى جانە 5G جەلىلەرى سالاسىندا ۇزدىك بولىپ تانىلدى»، دەدى پرەزيدەنت.

3

سونىمەن قاتار، مەملەكەت باسشىسى قازاقستاندا يننوۆاتسيالىق تەحنولوگيالاردى دامىتۋ ءۇشىن زاماناۋي ينفراقۇرىلىم بار ەكەنىن اتاپ ءوتتى.

ء«بىز كوميۋتەرلىك تەحنيكا، جەلىلىك جابدىقتار، دەرەكتەردى وڭدەۋ ورتالىقتارى بويىنشا بىرلەسكەن وندىرىستىك جوبالار اشۋعا مۇددەلىمىز. قازاقستان 5G جەلىسىن ورىستەتۋ باعىتىندا جۇمىس ىستەپ جاتىر. ءىرى قالالاردا العاشقى سىناقتار وتكىزىلدى. كورەيا كومپانيالارىن ەلىمىزدە 5G جوبالارىن ىسكە اسىرۋ ۇدەرىسىنە قاتىسۋعا شاقىرامىن»، دەدى پرەزيدەنت.

قاسىم-جومارت توقاەۆ جەر قويناۋىن پايدالانۋ سالاسىنىڭ زور مۇمكىندىكتەرىن پايدالانۋعا شاقىردى. قازاقستاندا جەر اۋماعىنىڭ 25 پايىزىنا عانا گەولوگيالىق زەرتتەۋ جۇرگىزىلگەنىن ايتتى.
بۇل رەتتە، مەملەكەت باسشىسى اسىل جانە ءتۇستى مەتالداردى ءوندىرۋ بويىنشا بەس دايىن جوبانىڭ بار ەكەنىن اتاپ ءوتىپ، كورەي كومپانيالارىن قازاقستاننىڭ جەر قويناۋىن بىرلەسىپ يگەرۋگە شاقىردى.

3

قازاقستان پرەزيدەنتى كورەيالىق ارىپتەسىمەن اڭگىمە بارىسىندا ءبىزدىڭ ەلدەگى تابيعي رەسۋرستارعا بىرلەسىپ زەرتتەۋ جۇرگىزۋ تۋرالى ۇسىنىس ايتقانىن، كەيىن تابيعي بايلىقتى يگەرۋ بارىسىندا كورەي كومپانيالارىنا قۇقىقتىق باسىمدىق بەرىلۋى مۇمكىن ەكەنىن جەتكىزدى.

پرەزيدەنت ءوز سوزىندە قازاقستاندا بالامالى جانە جاڭاعىرتىلاتىن قۋات كوزدەرىن دامىتۋعا باسىمدىق بەرىلەتىنىن اتاپ ءوتتى. مەملەكەت باسشىسى جەل جانە كۇن ەنەرگياسىن پايدالانۋدىڭ الەۋەتى زور ەكەنىن ايتىپ، كورەي كومپانيالارىنا وسى سالاداعى ينۆەستيتسيالىق مۇمكىندىكتەردى قاراستىرۋدى ۇسىندى. ودان بولەك، قاسىم-جومارت توقاەۆ فورۋمعا قاتىسۋشىلاردى قازاقستاندا كورەيا تەحنولوگيالارى بويىنشا يادرولىق وتىندى بىرلەسىپ وندىرۋگە، سونداي-اق، قالدىقتاردى ەنەرگەتيكالىق جويۋ سالاسىنداعى جوبالاردى ىسكە اسىرۋعا شاقىردى.

4

قاسىم-جومارت توقاەۆ وڭتۇستىك كورەيامەن ماشينا جاساۋ سالاسىنداعى ىنتىماقتاستىقتى جوعارى باعالاپ، بۇل ەلدىڭ ءىرى كومپانيالارىنىڭ قاتىسۋىمەن اۆتوموبيل جاساۋ سالاسى قازاقستان ەكونوميكاسىنىڭ قارقىندى دامۋىنا ۇلەس قوسقانىن اتاپ ءوتتى. وسىعان بايلانىستى پرەزيدەنت اۆتوموبيلدەر جەلىسىن ۇلعايتۋعا جانە ءوندىرىس ورىندارىن ارتتىرۋعا ءازىر ەكەنىن مالىمدەدى.

مەملەكەت باسشىسى كورەيالىق كومپانيالارمەن بىرلەسىپ مۇناي-گاز ونەركاسىبىنە ارنالعان جابدىقتار مەن قوسىمشا بولشەكتەردىڭ، سونداي-اق، جاڭا تەحنولوگيالار نەگىزىندە اۋىلشارۋاشىلىعى ونىمدەرىن تەرەڭ قايتا وڭدەۋ بويىنشا ءوندىرىس اشۋعا مۇددەلى ەكەنىن ايتتى.
سونىمەن قاتار، قاسىم-جومارت توقاەۆ قازاقستان ارقىلى ازيادان ەۋروپاعا جۇك تاسىمالداۋ جانە كورەي ەكسپورتىن ەۋرازيالىق ەكونوميكالىق وداق نارىعىنا دا ءارتاراپتاندىرۋ مۇمكىندىكتەرىنە توقتالدى.

پرەزيدەنت ينۆەستورلارعا ارنالعان ينستيتۋتسيونالدىق ورتانى قالىپتاستىرۋ تۋرالى ايتا كەلە، «Kazakh Invest» ۇلتتىق كومپانياسىنىڭ، ارنايى ەكونوميكالىق جانە يندۋستريالدىق ايماقتاردىڭ، سونداي-اق، «استانا» حالىقارالىق قارجى ورتالىعىنىڭ الەۋەتىن پايدالانۋعا شاقىردى.

5

مەملەكەت باسشىسى ءسوزىن قورىتىندىلاي كەلە اتالعان ءىس-شارا ەكى ەل اراسىنداعى ساۋدا-ەكونوميكالىق ءوزارا ءىس-قيمىلدى تەرەڭدەتۋگە جاسالعان ناقتى قادام ەكەنىن ايتتى.

قاسىم-جومارت توقاەۆ كورەيالىق كاسىپكەرلەرمەن ناقتى جۇمىس ىستەۋ ءۇشىن پرەمەر-ءمينيستردىڭ ورىنباسارى رومان سكلياردىڭ جەتەكشىلىگىمەن ارنايى جۇمىس توبىن قۇرۋ تۋرالى شەشىم قابىلداعانىن ايتتى. پرەزيدەنت ءىرى ينۆەستيتسيالىق، ينستيتۋتسيونالدىق، ينراقۇرىلىمدىق جوبالاردى جۇزەگە اسىرۋدى جانە وعان جەكە مونيتورينگ جۇرگىزۋدى ءوز باقىلاۋىنا الاتىنىن اتاپ ءوتتى.

6

دوڭگەلەك ۇستەلدەگى اڭگىمەنى KITA كورەيا حالىقارالىق ساۋدا اسسوتسياتسياسىنىڭ توراعاسى كريستوفەر كۋ جۇرگىزىپ وتىردى. «سامۇرىق-قازىنا» ۇاق» اق توراعاسى، كورەيا رەسپۋبليكاسىنىڭ ساۋدا، يندۋستريا جانە ەنەرگەتيكا ءمينيسترى، سونداي-اق، Samsung Electronincs، Doosan Heavy Industries&Construction، Hyundai Engineering & Construction، Dongil Construction، Lotte Confectionery، BC Card، Seegene Medical Foundation، Korea Health Industry Development Institute (KHIDI)، Dongkwang Trading Corporation ي Kolon World Investment كورەي كومپانيالارىنىڭ باسشىلارى ءسوز سويلەدى.

6

جيىنعا قازاقستان تاراپىنان پرەزيدەنت اكىمشىلىگىنىڭ باسشىلىعى، ۇكىمەت مۇشەلەرى، «استانا» حالىقارالىق قارجى ورتالىعىنىڭ، «قازترانسگاز»، Kazakh Invest، «قازاقتەلەكوم»، Kaspi.kz جانە باسقا دا كومپانيالاردىڭ باسشىلارى قاتىستى.

دوڭگەلەك ۇستەل قورىتىندىسى بويىنشا جالپى سوماسى 1،7 ميلليارد اقش دوللارى بولاتىن 34 كەلىسىمگە قول قويىلدى. ونىڭ 21-ءى كوممەرتسيالىق جانە 13-ءى كوممەرتسيالىق ەمەس قۇجات. كورەي تەحنولوگياسىن تارتۋعا باسىمدىق بەرەتىن بىرلەسكەن ينۆەستيتسيالىق جوبالاردا، جوعارى تيىمدىلىگى مەن ءوندىرىستىڭ ەكولوگيالىق تازالىعىنا باستى ءمان بەرىلگەن.

سوڭعى جاڭالىقتار

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

دوللار ارزاندادى

قارجى • كەشە

ۇقساس جاڭالىقتار