قاسىم-جومارت توقاەۆ كورەيا رەسپۋبليكاسىنا شاقىرىپ, شىنايى ىقىلاسپەن قارسى العانى ءۇشىن پرەزيدەنت مۋن چجە ينگە ريزاشىلىق ءبىلدىرىپ, بۇل مەملەكەتتىك ساپارعا ەرەكشە ءمان بەرەتىنىن اتاپ ءوتتى.
«ەكى ەلدىڭ اراسى الشاق بولعانىمەن, حالىقتارىمىز – تاعدىرلاس. كورەيا – قازاقستاننىڭ شىعىس ازياداعى ستراتەگيالىق سەرىكتەسىنىڭ ءبىرى. قازىر سان سالالى بايلانىسىمىز قارقىندى دامىپ كەلە جاتىر. ءبىز بۇگىن وسى قارىم-قاتىناستى جاڭا دەڭگەيگە كوتەرۋ ءۇشىن ءوزارا سەنىم مەن قولداۋعا نەگىزدەلگەن كەلىسسوزدەر جۇرگىزدىك. ىقپالداستىقتىڭ تىڭ باعىتتارىن ايقىندادىق», دەدى قازاقستان پرەزيدەنتى.
مەملەكەت باسشىسى وتكەن عاسىرداعى تاريحي وقيعالاردىڭ ەكى حالىقتى جاقىنداتا تۇسكەنىنە توقتالدى.
«ونداعان مىڭ كورەي قازاق جەرىنەن پانا تاپتى. قازاقستان ولاردىڭ ەكىنشى وتانىنا اينالدى. كورەي جۇرتىنىڭ ۇلتتىق باتىرى, گەنەرال حون بوم دو قىزىلوردا قالاسىندا جەرلەنگەنىن جاقسى بىلەسىزدەر.
پرەزيدەنت مۋن چجە ءيننىڭ وتىنىشىمەن ونىڭ سۇيەگى مەنىڭ شەشىمىممەن تۋعان جەرىنە جەتكىزىلدى. بۇل شارا – ءبىزدىڭ ەلدەرىمىزدىڭ اراسىنداعى ءوزارا سەنىمنىڭ جارقىن كورىنىسى. كەزىندە قازاقستانعا جەر اۋدارىلعان كورەيلەردىڭ ۇرپاعى بۇگىندە 100 مىڭنان استى. ولار مەملەكەتتەرىمىزدىڭ دوستىق قاتىناسىن نىعايتا تۇسۋگە زور ۇلەس قوسىپ كەلەدى», دەپ اتاپ ءوتتى قاسىم-جومارت توقاەۆ.
مەملەكەت باسشىسى بريفينگتە وڭىرلىك جانە حالىقارالىق ماسەلەلەر بويىنشا پىكىر الماسىپ, نەگىزگى تۇيتكىلدەردى تالقىلانعاندارىن, سونداي-اق, بىرنەشە ماڭىزدى كەلىسىمگە قول قويىلعانىن ايتتى.
«قازاقستان كورەيامەن سەرىكتەستىكتى جان-جاقتى دامىتۋعا باسا ءمان بەرەدى. ءبىز ءوزارا ءتيىمدى ارىپتەستىكتى جوعارى باعالايمىز.
ىنتىماقتاستىقتى تىڭ قارقىنمەن جالعاستىرۋعا مۇددەلىمىز. بۇگىن قابىلدانعان كەڭەيتىلگەن ستراتەگيالىق سەرىكتەستىك تۋرالى بىرلەسكەن مالىمدەمە – سونىڭ ايقىن دالەلى. بۇل قۇجات قازاق-كورەي ىقپالداستىعىنىڭ اياسىن كەڭەيتىپ, قارىم-قاتىناسىمىزدى جاڭا بەلەسكە كوتەرۋگە سەپتىگىن تيگىزەدى دەپ سەنەمىن. ەكىجاقتى بايلانىستاردىڭ وزەگى – ساۋدا-ەكونوميكالىق ىنتىماقتاستىق.
كورەيا – جوعارى تەحنولوگياسى مەن يننوۆاتسيالىق ونەركاسىبى دامىعان قۋاتتى مەملەكەت. قازاقستان – ەكونوميكالىق ءوسىمى تۇراقتى, ءارى ينۆەستيتسيالىق احۋالى قولايلى ەل. قازىردىڭ وزىندە «تاڭعى شىق ەلى» ازياداعى ساۋدا سەرىكتەستەرىمىزدىڭ ىشىندە ەكىنشى ورىندا تۇر. بۇعان قوسا, كورەيا ەلىمىزدەگى ەڭ ءىرى 10 ينۆەستوردىڭ قاتارىنا كىرەدى», دەدى قازاقستان پرەزيدەنتى.
قاسىم-جومارت توقاەۆ سوڭعى 15 جىلدا كورەيا قازاقستان ەكونوميكاسىنا 6 ميلليارد دوللاردان استام ينۆەستيتسيا سالعانىن, «Samsung», «Hyundai» جانە «Lotte Group» كونتسەرندەرى – ءبىزدىڭ ءىرى ينۆەستورلارىمىز ەكەنىن اتاپ ءوتتى.
«وتكەن جىلدىڭ قورىتىندىسى بويىنشا ەكى ەلدىڭ ساۋدا-ساتتىق كولەمى 5,9 ميلليارد دوللارعا جەتتى. الداعى مەجە – وسى كورسەتكىشتى ايتارلىقتاي ارتتىرۋ. بۇگىن ءبىز پاندەميادان كەيىنگى كەزەڭدە شيكىزاتتىق ەمەس تاۋار اينالىمىن ۇلعايتىپ, ونى ارتاراپتاندىرۋعا كەلىستىك. سونداي-اق, «سامال جەل» باعدارلاماسىن جانداندىرۋعا ۋاعدالاستىق. وسى ارقىلى جاڭا ينۆەستيتسيا مەن جوعارى تەحنولوگيانىڭ ەلىمىزگە كەلۋىنە قولايلى جاعداي جاسايمىز.
ءبىز ءتۇرلى باعىتتاعى اۋقىمدى جوبالاردى بىرلەسە جۇزەگە اسىرۋدىڭ مۇمكىندىكتەرىن قاراستىرامىز. بۇل رەتتە, اۋىر ونەركاسىپ پەن ماشينا جاساۋ, تاۋ-كەن جانە بارلاۋ, بالامالى ەنەرگەتيكا سالالارىنىڭ بولاشاعى زور. قازاقستاندا يننوۆاتسيالىق وندىرىستەرگە دەگەن سۇرانىس جوعارى. اسىرەسە, كوممۋنيكاتسيا, اۋىل شارۋاشىلىعى, مەديتسينا جانە فارماتسەۆتيكا جوبالارىنا باسا ءمان بەرەمىز», دەدى مەملەكەت باسشىسى.
ەكىجاقتى ىقپالداستىققا تىڭ سەرپىن بەرۋ ءۇشىن كورەيا رەسپۋبليكاسىنىڭ پۋسان قالاسىندا قازاقستاننىڭ باس كونسۋلدىعىن اشۋ تۋرالى شەشىم قابىلداندى.
«بۇل – سەرىكتەستىگىمىزدى ستراتەگيالىق رۋحتا دامىتۋدىڭ تاعى ءبىر جولى. كەلەسى جىلى قازاقستان مەن كورەيانىڭ ديپلوماتيالىق قاتىناس ورناتقانىنا 30 جىل تولادى. وسى ورايدا ءبىز مادەني-گۋمانيتارلىق بايلانىستاردى كۇشەيتىپ, ناقتى ءىس-شارالار وتكىزۋ ماڭىزدى ەكەنىن اتاپ وتتىك», دەدى قاسىم-جومارت توقاەۆ.
