پرەزيدەنت • 07 تامىز, 2021

مەملەكەت باسشىسى اقتاۋ ايلاعىندا «كونتەينەرلىك حاب» اشۋدى ۇسىندى

490 رەت
كورسەتىلدى
1 مين
وقۋ ءۇشىن

قاسىم-جومارت توقاەۆ تۇرىكمەنستاندا وتكەن ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىنە قاتىستى. قازاقستان پرەزيدەنتى ورتالىق ازيانى تۇراقتى, ەكونوميكالىق جاعىنان دامىعان, وركەندەگەن وڭىرگە اينالدىرۋعا باعىتتالعان ەكونوميكا, ساۋدا, مادەنيەت سالالارى بويىنشا بىرقاتار باستاما كوتەردى, دەپ حابارلايدى Egemen.kz.

مەملەكەت باسشىسى اقتاۋ ايلاعىندا «كونتەينەرلىك حاب» اشۋدى ۇسىندى

بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook -تەگى پاراقشاسىندا جازدى.

«مەملەكەت باسشىسى ايماقتىڭ كولىك دالىزدەرىنە ينتەگراتسيالانعان تاۋار وتكىزۋدىڭ بىرىڭعاي جەلىسىن جانە اقتاۋ ايلاعىنىڭ بازاسىندا «كونتەينەرلىك حاب» اشۋدى ۇسىندى.

پرەزيدەنت ءوز سوزىندە ورتالىق ازياداعى كولىك كوممۋنيكاتسيالارىن دامىتۋ ەلدەرىمىزدەگى ىشكى جالپى ءونىمدى 15 پايىزعا ارتتىرۋعا مۇمكىندىك بەرەتىنىن اتاپ ءوتتى», دەلىنگەن حابارلامادا. قاسىم-جومارت توقاەۆ ايماقتىڭ نەگىزگى ماسەلەلەرىنىڭ ءبىرى رەتىندە – سۋ رەسۋرستارىمەن قامتاماسىز ەتۋ دەپ ەسەپتەيدى.

ونىڭ ايتۋىنشا, ماسەلەلەردى سۋدى تەڭ دارەجەدە پايدالانۋ, تاراپتاردىڭ مۇددەلەرىن ەسكەرۋ, ءوزارا مىندەتتەردى ىسكە اسىرۋ قاعيداتىنا سۇيەنە وتىرىپ شەشۋ قاجەت.

«سۋ – ورتالىق ازيا ەلدەرىنىڭ اراسىنا سىنا قاعاتىن ەمەس, كەرىسىنشە, بىرىكتىرەتىن رەسۋرس بولۋى كەرەك», دەدى مەملەكەت باسشىسى.

قازاقستان پرەزيدەنتى جۇمىس ساپارى اياسىندا تۇرىكمەنستان باسشىسى گۋربانگۋلى بەردىمۇحامەدوۆپەن كەزدەستى. تاراپتار ەكىجاقتى ستراتەگيالىق ىنتىماقتاستىقتاعى كەڭ اۋقىمدى ماسەلەلەردى تالقىلادى. ساۋدا-ەكونوميكالىق جانە گۋمانيتارلىق ىنتىماقتاستىقتى ودان ءارى تەرەڭدەتۋدىڭ پەرسپەكتيۆالارىن ايقىندادى.

سوڭعى جاڭالىقتار