اقتوبە قالاسىنداعى ءاليا مولداعۇلوۆاعا ارنالعان مەموريالدىق كەشەندە بولاشاق ۇشقىشتار قازاق حالقىنىڭ داڭقتى قىزىنا ارنالعان ەسكە الۋ شاراسىن وتكىزدى. شارا كەڭەس وداعى باتىرىنىڭ قازا تاپقانىنا 70 جىل تولۋىنا ارنالدى.
ميتينگىگە قاتىسۋشىلار ءىس-شارا بارىسىندا حالقىمىزدىڭ داڭقتى قىزىن ءبىر مينۋت ءۇنسىز تۇرىپ ەسكە الدى. قازاقستان قارۋلى كۇشتەرى اۋە قورعانىسى كۇشتەرى اسكەري ينستيتۋتى كۋرسانتتارىنان قۇرالعان قۇرمەت قاراۋىلى اۋەگە ءۇش دۇركىن وق اتتى, باتىر قىزدىڭ ەسكەرتكىشىنە گۇل شوقتارى قويىلدى.
54-ءشى جەكە اتقىشتار بريگاداسىنىڭ مەرگەنى ءاليا مولداعۇلوۆا ۇلى وتان سوعىسى كەزىندە 1944 جىلى پسكوۆ وبلىسىنداعى كازاچيحا دەرەۆنياسىندا قازا تاپتى. 19 جاستاعى ءاليا مولداعۇلوۆاعا كەڭەس وداعىنىڭ باتىرى اتاعى ول قازا تاپقان سوڭ بەرىلدى.
«ەگەمەن-اقپارات».
