قوعام • 04 تامىز، 2021

«پارا بەرمەسەڭ، بارا بەر...»

62 رەت كورسەتىلدى

بۇل ماسەلەگە باياعىدا نۇكتە قويىلۋى كەرەك ەدى. گلۋبوكوە اۋدانىنداعى «پريرتىشە 1» جاۋاپ­كەرشىلىگى شەكتەۋلى سەرىكتەستىگىنىڭ باسشىسى ۆيكتور لەونتەۆ كاسىبىن دوڭگەلەتۋدە كەدەرگىلەردىڭ بارىن ايتىپ، ءتيىستى ورىندارعا ءبىر ەمەس، بىرنەشە رەت شاعىمدانعان. الايدا ونىسىنان ەش ناتيجە شىعارا الماعان. قايدا جازسا دا، ماسەلەنىڭ شەشىمى اۋداندىق اكىمدىككە كەلىپ تىرەلگەن.

ەندى مىنە، گلۋبوكوە اۋدانى اكىمىنىڭ ورىنباسارى كاسىپكەردەن پارا الدى دەگەن كۇدىكپەن قۇرىقتالىپ تىندى.   

رەسمي پورتالدارداعى مالىمەتتەرگە كوز جۇگىرت­سەك، سوت كابينەتىندە وسى ءىس بويىنشا باستى سوت تال­قىلاۋىن 12 شىلدەگە تاعايىنداۋ تۋرالى 2021 جىلعى 29 ماۋسىمداعى قاۋلى جاريالانعان. ول جەردە ءىستى توقتاتا تۇرۋعا ەشقانداي نەگىز جوق دەلىنگەن. ياعني كۇدىكتىنى كۇزەتپەن ۇستاۋ تۇرىندەگى بۇلتارتپاۋ شاراسى وزگەرىسسىز قالدىرىلعان.

ال اۋدان اكىمىنىڭ ورىنباسارى 24 ساۋىردە «پري­يرتىشە 1» جشس باسشىسى ۆيكتور لەونتەۆتىڭ ارى­زىنان كەيىن ۇستالعان كورىنەدى. ول لاۋازىمدى تۇل­عالاردىڭ ورىندالعان جۇمىستار اكتىسىنە كەدەرگىسىز قول قويعانى ءۇشىن اقشا قاراجاتىن بوپسالاۋ دەرەگىنە جانە قۇنى 56 ميلليون تەڭگە بولاتىن اۋداندىق ماڭىزى بار اۆتوجولداردى قىسقى جانە جازعى كۇتىپ-ۇستاۋ بويىنشا كورسەتىلەتىن قىزمەتتەرگە تەندەر وتكىزۋ بارىسىندا ونىڭ كاسىپورنى بىلىكتىلىك تالاپتارىنا سايكەس كەلمەۋىن العا تارتا وتىرىپ، زاڭسىز جارامسىز دەپ تانىلعانىنا شاعىمدانعان. ال شىن مانىندە، كاسىپورىن 15 جىلدان اسا ۋاقىت بويى اۋدان جولدارىنا قىزمەت كورسەتىپ كەلگەن ەكەن.  وسىنشاما تاجىريبەسى بار ۇجىمنىڭ «بىلىكتىلىك تالاپتارىنا ساي كەلمەي قالۋىنىڭ» وزىندىك سىرى بار بولىپ شىقتى.

– ءبىزدىڭ كومپانيامىز بۇعان دەيىن مەملەكەت مەن­شىگىندە بولىپ، جول جوندەۋ جۇمىستارىمەن اينا­لىسقان. 2019 جىلى عانا جەكەشەلەندىرىلىپ، تىڭ كۇش­پەن جۇمىسقا كىرىسكەن. الايدا جەكەشەلەندىرۋ شار­تىنىڭ نەگىزىندە كاسىپورىن 5 جىل ىشىندە ءوز بەيىنىن وزگەرتە المايدى. ونىڭ ماقساتى – اۋداندىق ماڭىزى بار جولداردى كۇتىپ ۇستاۋ. ياعني كومپانيا بۇل جۇمىستاردان باسقا جۇمىستاردى ورىنداي المايدى. سويتە تۇرا، بىزگە بۇرىن اتقارىپ كەلگەن جۇمىسىمىزبەن اينالىسۋعا مۇمكىندىك بەرىلمەگەنىنە قالاي رەنجىمەسسىڭ؟! – دەيدى سەرىكتەستىك ديرەكتورى ۆيكتور لەونتەۆ.

ونىڭ ايتۋىنشا، جەرگىلىكتى شەنەۋنىكتەردىڭ قاھارىنا ۇشىراعان كاسىپورىننىڭ 23 جۇمىسكەرى قازىرگى ۋاقىتتى جۇمىسسىز قالعان. اشپاعان ەسىگى، بارماعان جەرى قالماعان سوڭ ۆيكتور لەونتەۆ وبلىستان ادىلدىك تابۋدان كۇدەر ءۇزىپ، ەل پرەزيدەنتىنە جۇگىنۋگە ءماجبۇر بولعان. مەملەكەت باسشىسى كاسىپكەردىڭ شاعىمىن باس پروكۋراتۋراعا تەكسەرۋدى تاپسىرعان. ونىڭ ناتيجەسى بەلگىلى بولا باستاعان سياقتى. پارا الدى دەگەن كۇدىكپەن اۋدان اكىمىنىڭ ورىنباسارى ۇستالعاندىعى – سونىڭ ايعاعى.

ەل پرەزيدەنتى ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسى، مىنە، وسىلاي جۇزەگە اسىپ جاتقاندىعىنا ۆيكتور لەونتەۆ سىندى كاسىپكەرلەر ۇلكەن ءۇمىت ارتىپ وتىر. شىندىعىندا، بۇل تىپتەن مەملەكەت باسشىسىنا جەتكىزبەي-اق، وبلىس دەڭگەيىندە شەشىلەتىن ماسەلە ەدى عوي.

باياعىدا جۇرت: «باستىققا پارا بەرمە، بارا بەر»، دەۋشى ەدى. قازىرگى شەنەۋنىكتەر: «پارا بەرمەسەڭ، بارا بەر...»، دەيتىن بولعانى ما، قالاي؟

قازىر گلۋبوكوەلىقتار تەرگەۋ جۇرگىزىلىپ جات­قان شۋلى ءىستىڭ سوڭى نەمەن اياقتالاتىندىعىن تاعات­سىزدانا كۇتىپ وتىر. ويتكەنى قولدانىستاعى زاڭناما بويىنشا كۇدىككە ىلىنگەن ورىنباسارىنىڭ قىلمىسى سوت ارقىلى دالەلدەنسە، اۋدان اكىمى وتستاۆكاعا كەتۋگە ءتيىس. جۇرت كوڭىلىندە «قارعا قارعانىڭ كوزىن شۇقىمايدى» دەگەن ەمەس پە؟  ادىلدىك ىزدەگەن كاسىپ­كەردىڭ دە ەندىگى جاعدايى قالاي بولار ەكەن؟..»، دەگەن الاڭداۋشىلىق تا بار.

 

شىعىس قازاقستان وبلىسى

 

سوڭعى جاڭالىقتار

ءالتىنساريننىڭ ادامي بولمىسى

رۋحانيات • بۇگىن، 00:01

ۋاقىت جاراتقان ۇلى جىر

ادەبيەت • كەشە

ۇقساس جاڭالىقتار