بۇل وقيعا باتىس قازاقستان وبلىسىندا ورىن الدى. وندا «كاركۋلا» شارۋا قوجالىعىنىڭ جەتەكشىسى ۆيتالي كاركۋلانىڭ ۇيىنە قاراقشىلىق شابۋىل جاسالدى.
بۇل وقيعا باتىس قازاقستان وبلىسىندا ورىن الدى. وندا «كاركۋلا» شارۋا قوجالىعىنىڭ جەتەكشىسى ۆيتالي كاركۋلانىڭ ۇيىنە قاراقشىلىق شابۋىل جاسالدى.
قاقاعان قاڭتار ءتۇنى ساعات شامامەن 23.30-دا بەتپەردە كيگەن ۇشەۋ كاسىپكەردىڭ ءۇيىنىڭ تەرەزەسىن سىندىرعان. شۋدى ەستىپ, سول مەزەت سىرتقا شىققان كاسىپكەردىڭ جۇبايى, ياعني وبلىستىق ءماسليحاتتىڭ دەپۋتاتى ۆالەنتينا كاركۋلا سوققىعا جىعىلادى. سوسىن ءۇي يەسى ۆيتاليگە شولاق مىلتىقتان ەكى رەت وق اتىلىپ, ءبىر وق ونىڭ تۋرا باسىنا تيەدى. كاسىپكەر وقيعا ورنىندا كوز جۇمعان. قاراقشىلاردىڭ بۇل جەرگە ءىرى كولەمدە اقشا ىزدەپ كەلگەنى ايدان انىق. الايدا, دەگەندەرىنە جەتە المادى. ويتكەنى, بۇل وتباسى قوماقتى قارجىنى ۇيدە ەمەس, بانكتە ساقتايتىن ەدى. بىراق ولار 500 مىڭ رەسەي ءرۋبلىن دە الماي, تۇرمىستىق تەحنيكا, قىمبات ۇيالى تەلەفون, قۇندى اشەكەيلەرگە تيىسپەگەن.
كاسىپكەردىڭ ۇيىنە جاسالعان شابۋىل تازا قاراقشىلىق. ءۇي يەلەرى جاقىن ارادا بىرىككەن اراب امىرلىكتەرىنە دەمالىسقا بارۋعا جينالعان ەكەن. قاسكۇنەمدەر مۇنى ءبىلىپ, مۇندا مول اقشا بار دەپ كەلۋلەرى دە عاجاپ ەمەس. سەبەبى, بولمەلەردىڭ استان-كەستەڭى شىققان, كەيبىر شكافتار اشىق-شاشىق جاتىر. ءۇي يەسىنىڭ جۇبايى ۆالەنتينا كاركۋلا ەسىن جيعاننان كەيىن پوليتسيا مەن «جەدەل جاردەمدى» ءوزى شاقىرادى جانە پوليتسەيلەرگە قىلمىسكەرلەردى تابۋعا كومەكتەسەتىن قۇندى دەرەكتەردى ايتىپ بەرەدى. نەگىزى شابۋىل جاساعاندار ۇشەۋ, ءتورتىنشىسى سىرتتا اۆتوكولىكتە كۇتىپ وتىرعان. تاياۋ ارادا ءىىم-نەن ارنايى تەرگەۋ توبى دا كومەككە كەلمەك. اتالعان قىلمىسقا بايلانىستى قك-ءنىڭ 96-بابى, 2-بولىمىمەن (قاراقشىلىق شابۋىل ناتيجەسىندە قاساقانا كىسى ءولتىرۋ) ءىس قوزعالدى, – دەدى بقو ءىىد باسشىسى, پوليتسيا پولكوۆنيگى ماحامبەت ءابيساتوۆ.
ۆيتالي كاركۋلا زەلەنوۆ اۋدانىندا العاشقىلاردىڭ ءبىرى بولىپ شارۋا قوجالىعىن قۇرعان ازامات ەدى. ەندى 350 ادامعا جۇمىس تاۋىپ بەرىپ وتىرعان ءىرى شارۋاشىلىقتىڭ باسشىسىن ولتىرگەندەر تەز ارادا ۇستالىپ, قاتاڭ جازاعا تارتىلادى دەگەن سەنىمدەمىز.
توقتار عابدىرەش ۇلى,
جۋرناليست,
تەمىر قۇسايىن,
«ەگەمەن قازاقستان».
ورال.
