بيۋرو ۇسىنعان مالىمەت بويىنشا, 2021 جىلدىڭ ءىى توقسانىندا ءبىر جۇمىسكەردىڭ ورتاشا ايلىق اتاۋلى جالاقىسى 251 508 تەڭگەنى قۇرادى. اتاۋلى جالاقى يندەكسى 2020 جىلدىڭ ءتيىستى توقسانىنا 118,6%-دى, ناقتى جالاقى يندەكسى 110,4%-دى قۇرادى.
سالالىق قۇرىلىمدا ەڭ جوعارى اتاۋلى جالاقى قارجى جانە ساقتاندىرۋ قىزمەتىندە – 472,5 مىڭ تەڭگە (ورتاشا رەسپۋبليكالىق دەڭگەيدەن 1,9 ەسە جوعارى), تاۋ-كەن ءوندىرۋ ونەركاسىبىندە جانە كارەرلەردى قازۋدا – 461,8 مىڭ تەڭگە (1,8 ەسە), كاسىپتىك, عىلىمي جانە تەحنيكالىق قىزمەت سالاسىندا – 356,7 مىڭ تەڭگە (1,4 ەسە), اقپارات جانە بايلانىس سالاسىندا - 338,6 مىڭ تەڭگە (تيىسىنشە 1,3 ەسە) تىركەلگەن.
ورتاشا ايلىق نومينالدى جالاقىنىڭ تومەن دەڭگەيلەرى اۋىل, ورمان جانە بالىق شارۋاشىلىعى سالالارىندا – 145,6 مىڭ تەڭگە جانە قالدىقتاردى جيناۋ, وڭدەۋ جانە جويۋ, لاستانۋدى جويۋ بويىنشا قىزمەت سالالارىندا – 146,5 مىڭ تەڭگە بايقالدى.
«وڭىرلىك بولىنىستە ەڭ جوعارى ورتاشا ايلىق اتاۋلى جالاقى اتىراۋ وبلىسىندا بەلگىلەندى - 398,5 مىڭ تەڭگە. بۇل ورتاشا رەسپۋبليكالىق كورسەتكىشتەن 1,6 ەسە جوعارى. سولتۇستىك قازاقستان وبلىسىندا ونىڭ كولەمى 189,8 مىڭ تەڭگەنى قۇرادى. بۇل ەل بويىنشا ورتاشا دەڭگەيدەن 24,5%-عا تومەن», دەلىنگەن بيۋرو اقپاراتىندا.
