«قازاقستان ءوزىنىڭ ۇلتتىق جوبالارى مەن برەندىن دامىتۋى ءتيىس, وسى قۇندىلىقتار ارقىلى قازاق ەلىنىڭ تانىمالدىلىعى ارتادى. بۇل حالىقتىڭ رۋحىن كوتەرىپ, قازاقستاندىق بىرەگەيلىكتى ايقىندايتىن ۇلتتىق داستۇرلەردى جاڭعىرتۋدا ەل تۇرعىندارىن بىرىگۋگە كومەكتەسەدى», دەدى كەڭەستە ە.توعجانوۆ.
پرەمەر-مينيستر ورىنباسارىنىڭ ايتۋىنشا, قازىرگى ۋاقىتتا «رۋحاني جاڭعىرۋ» باعدارلاماسىن ۇلتتىق جاڭعىرۋ كەزەڭىنە كوشىرۋ جونىندەگى جول كارتاسى ىسكە اسىرىلىپ جاتىر. قازاقستاننىڭ تاريحي-مادەني مۇراسى تاريحي ەستەلىكتەرگە باي زياتكەرلىك جانە رۋحى جوعارى قوعامدى قالىپتاستىرۋ مەن دامىتۋدىڭ پارمەندى تەتىگى بولا الادى.
«قازاق كۇرەسىن» جاپپاي دامىتۋ ون جىل بۇرىن «قازاقستان بارىسى» جوباسىن جۇزەگە اسىرۋدان باستالدى. تانىمالدىق دەڭگەيىنىڭ ارتۋى «الەم بارىسى» جانە «ەۋرازيا بارىسى» سەكىلدى حالىقارالىق ءىس-شارالاردا بايقالۋدا. بۇگىن «قازاقستان بارىسى» حالىق ونەرىن جانداندىرۋ جانە ۇلتتىق ويىنداردى ناسيحاتتاۋ بويىنشا وزىندىك سايىس ءتۇرى بولىپ قالىپتاستى. جىل سايىن تۋرنيرگە 9 مىڭنان استام جانكۇيەر, 2 ملن-نان استام كورەرمەن قاتىسادى. بۇل جوبا حالىقتىڭ زور قولداۋىنا يە بولدى», دەپ جازادى ۆەدومستۆو سايتى.
كۇن تارتىبىندەگى ەكىنشى ماسەلە قازاقى قازانات جىلقى تۇقىمىن دامىتۋعا قاتىستى بولدى. اتالعان تۇقىمدى قالپىنا كەلتىرۋ مەن ساقتاۋ بويىنشا جول كارتاسى ازىرلەنگەن.
سونىمەن قاتار, «پاتشالىق جىلقىلار قوراجايى» («تسارسكايا كونيۋشنيا») عيماراتىن تاريحي ەسكەرتكىشتەر مەن مادەنيەتتىڭ مەملەكەتتىك تىزىمىنە قوسۋ تۋرالى ءسوز بولدى. قازانات تۇقىمىنداعى جىلقىلاردى اسىل تۇقىمدىق سىناۋ جۇيەسىن ەنگىزۋ تۋرالى دا ايتىلدى.
