اتالعان جوبا اياسىندا جۋىردا ت.رىسقۇلوۆ اۋدانى لۋگوۆوي اۋىلىنىڭ تۇرعىنى داريا تولەنديەۆاعا باسپانا كىلتى تابىس ەتىلدى. ەرەكشە بالا تاربيەلەپ وتىرعان انا كوپشىلىكتىڭ بۇل ىقىلاسىنا العىسىن جاۋدىرىپ جاتىر.
بۇل تۇرعىن ءۇيدىڭ قۇرىلىسىنا ەرىكتى جاستاردىڭ باستاماسىمەن قۇرىلعان «جان جىلۋى» قايىرىمدىلىق قورىمەن قاتار, جەرگىلىكتى كاسىپكەرلەر, شارۋا قوجالىقتارىنىڭ باسشىلارى جانە قاراپايىم اۋىل تۇرعىندارى دا ۇلەس قوستى. باسپانا كىلتىن اۋداندىق ارداگەرلەر كەڭەسىنىڭ توراعاسى قوجايحان بيجانوۆ يەسىنە تاپسىرىپ, «بىرلىك بار جەردە تىرلىك بار» ەكەنىن اتاپ ءوتتى. سونىمەن قاتار اسارلاتىپ ءۇي سالۋعا اتسالىسقان ەرىكتىلەر مەن بارشا ازاماتتارعا العىس ايتتى. سونداي-اق وسى يگى ىسكە باستاماشى بولعان بارشا ازاماتتى اۋدان اكىمى ەربولات سادىرقۇلوۆ العىس حاتتارمەن ماراپاتتادى.
جاڭا باسپانانىڭ قۇرىلىسى ءۇش ايدا اياقتالىپ, وعان 5 ميلليون تەڭگەگە جۋىق قاراجات جۇمسالعان. قايىرىمدى جانداردىڭ دەمەۋشىلىك كورسەتۋىمەن جانە قول كومەگىن بەرۋىمەن جۇزەگە اسقان بۇل جوبا الداعى ۋاقىتتا ءوز جالعاسىن تابادى.
ايتا كەتەيىك «اسارلاتىپ ءۇي سالۋ» جوباسى بويىنشا اۋداندا وتكەن جىلى 16 ءۇي سالۋ جوسپارلانعان بولسا, بۇگىندە ونىڭ 14-ءى سالىنعان. سونىمەن قاتار جەرگىلىكتى اكىمدىكتىڭ باستاماسىمەن 2 دايىن ءۇي ساتىپ الىنىپ, مۇقتاج وتباسىلارعا تاپسىرىلعان. بيىل تاعى دا 15 ءۇيدىڭ قۇرىلىسى جۇرگىزىلۋدە. اتالعان تۇرعىن ۇيلەردىڭ دە قۇرىلىسى اياقتالىسىمەن مۇقتاج ازاماتتارعا بەرىلەدى.
جامبىل وبلىسى
