ايماقتار • 28 شىلدە، 2021

جاردەماقىنى زاڭسىز العاندار

87 رەت كورسەتىلدى

قاراپايىم حالىقتى الەۋمەتتىك تۇرعىدان قولداۋ ماقساتىندا قازىرگى كەزدە مەملەكەت تاراپىنان تاعايىندالعان جاردەماقىنىڭ ءتۇرى كوپ. ونى ءتۇرلى ساناتتاعى ازاماتتار الىپ تا كەلەدى. ماسەلەن، بىلتىر ەلىمىزدە كارانتين بولعان كەزدە، تابىسىنان ايىرىلعاندارعا 42 500 تەڭگەدەن بەرىلگەن ەدى. سول سياقتى كوپبالالى جانە از قامتىلعان وتباسىلارعا دا مەملەكەت تيىسىنشە كومەك كورسەتىلۋدە. الايدا جامبىل وبلىسىندا كوپبالالى اكەلەردىڭ زاڭسىز جاردەماقى الىپ كەلگەنى انىقتالىپ وتىر. وڭىردە كوپبالالى وتباسىلارعا بەرىلەتىن مەملەكەتتىك جاردەماقىنى تاعايىنداۋ بويىنشا مونيتورينگ جۇرگىزىلىپ، ناتيجەسىندە، مەملەكەتكە 14 ملن تەڭگەدەن اسا زالال كەلگەنى بەلگىلى بولدى.

حاميت ەسامان

ەلىمىزدە مۇمكىندىگى شەكتەۋلى جاندارعا تولەنەتىن جاردەماقىنىڭ ورتاشا مولشەرى 48 مىڭ تەڭگەنى قۇرايدى. بۇل رەتتە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى راۆيل تولەباەۆ كوپبالالى وتباسىنا جاردەماقى تاعايىنداۋ كەزىندە وتباسى قۇرامىندا ءتىرى تۋعان، اسىراپ الىنعان، سونداي-اق قامقورلىققا الىنعان بالالار باسقا اتا-اناسىنىڭ وتباسىندا ەسكەرىلمەگەن بولسا، جيىنتىق بالالار ەسكەرىلەتىنىن جەتكىزدى. ءوز كەزەگىندە اتالعان قاعيدانىڭ 9-تارماعىنا سايكەس، ءوتىنىش بەرۋشى بىرگە تۇراتىن بالالاردىڭ كوپبالالى وتباسىنا جاردەماقى تاعايىنداۋ تۋرالى ءوتىنىشىن كورسەتە وتىرىپ، بالالاردىڭ بىرلەسكەن تۇرعىلىقتى مەكەنجايىن راستايدى. سونىمەن قاتار ازاماتتىق كودەكسىنىڭ 16-بابىنا سايكەس، ون ءتورت جاسقا تولماعان بالالاردىڭ زاڭدى وكىلدەرىنىڭ تۇراتىن جەرى ولاردىڭ تۇرعىلىقتى جەرى بولىپ تانىلادى ەكەن.

سونداي-اق ر.تولەباەۆ ەرلى-زايىپتىلار اراسىندا نەكە بۇزىلعان جاعدايدا اتا-اناسىنىڭ بىرەۋىمەن بالالاردىڭ بىرگە تۇرۋى سوت شەشىمىمەن راستالاتىنىن ايتتى. «الايدا بىرنەشە جاردەماقى الاتىن ازامات وتىنىشىندە بالالارى وزىمەن بىرگە تۇرادى دەپ كورسەتكەنىمەن، سوت شەشىمىمەن ولاردىڭ اناسىمەن بىرگە تۇراتىنى بەلگىلى بولعان»، دەيدى ول.

بۇل رەتتە «ازاماتتارعا ارنالعان ۇكىمەتتەن» كوپبالالى وتباسىلارعا بەرىلەتىن جاردەماقىنىڭ اتا-انالار اراسىنان تەك اكەسى تاراپىنان ءوتىنىش بىلدىرگەندەر تۋرالى اقپارات سۇراتىلىپ، ول ءتىزىم بويىنشا قالالىق سوت شەشىمىمەن سايكەستەندىرىلىپ، قارالدى.

«باس تارتىلعان قالعان ىستەر بويىنشا جاردەماقى الۋشىلار ارتىق تولەنگەن سومانى ەرىكتى تۇردە قايتارۋعا مىندەتتەلىپ وتىر. زەرتتەۋ بارىسىندا 27 تولەم الۋشى بويىنشا 14 ملن 337 مىڭ 143 تەڭگە كولەمىندە ارتىق تولەمدى قۇرادى. ارتىق تولەنگەن سومادان 150 مىڭ تەڭگە رەسپۋبليكالىق بيۋدجەتكە قايتارىلدى. كوپبالالى وتباسىلار، ادەتتە، از قامتىلعاندىقتان، اقشالاي قاراجاتتى قايتارۋدى ولار بىرتىندەپ جۇرگىزەدى. سونداي-اق تاعى 38 تولەم الۋشى بويىنشا ءتيىستى جۇمىس جۇرگىزىلۋدە. ال 18 تولەم الۋشى اي سايىن جاردەماقىنى الۋ ءۇشىن، بەرگەن وتىنىمدەرىندە دۇرىس ەمەس اقپارات ەنگىزۋ ارقىلى بىرگە تۇراتىن بالالار سانىن كوبەيتكەن. اتالعان ازاماتتاردىڭ ءىس-ارەكەتىندە الاياقتىق بەلگىلەرىنىڭ بايقالۋىنا بايلانىستى، شەشىم قابىلداۋ ءۇشىن پوليتسيا دەپارتامەنتىنە جولداندى»، دەيدى اتالعان دەپارتامەنتتىڭ باسقارما باسشىسى داۋرەن وماروۆ.

راسىندا، بۇگىندە قوعامدا بالالارىن العا سالىپ، سول ارقىلى كولدەنەڭ پايدا تاپقىسى كەلەتىندەر قاتارى كوبەيۋدە. بىراق زاڭدى بەلدەن باسىپ، وڭاي ولجاعا كەنەلۋدىڭ اقىرى وسىنداي بولىپ وتىر. مامانداردىڭ ايتۋىنشا، جاردەماقىنىڭ زاڭسىز تاعايىندالۋىنا اكەلىپ سوققان باستى فاكتوردىڭ ءبىرى – كورسەتىلەتىن قىزمەت ستاندارتىندا «ازاماتتارعا ارنالعان ۇكىمەت» قىزمەتكەرلەرىنىڭ قۇجات قابىلداۋ كەزىندە سوت شەشىمىن تالاپ ەتۋ قۇقىعىنىڭ بولماۋى ەكەن. ال ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ ەڭبەك، الەۋمەتتىك قورعاۋ جانە كوشى-قون كوميتەتى جامبىل وبلىسى بويىنشا دەپارتامەنتىنىڭ مالىمەتىنە سۇيەنسەك، قازىرگى تاڭدا 124 ادامنىڭ ىشىنەن 59 وتباسى جاردەماقىنى زاڭعا سايكەس الىپ وتىر.

«27 ءىس ءوتىنىش بەرۋشىنىڭ بىرگە تۇراتىنى تۋرالى جالعان مالىمەت ۇسىنۋىنا بايلانىستى باس تارتىلدى. ونىڭ ىشىندە 2 تولەم الۋشى بويىنشا اكەسىمەن بىرگە تۇرمايتىن بالالاردى ەسەپكە الماي، جاردەماقى مولشەرىن ازايتۋ جاعىنا قاراي قايتا ەسەپتەۋ تۋرالى شەشىم قابىلداندى»، دەيدى ەڭبەك، الەۋمەتتىك قورعاۋ جانە كوشى-قون كوميتەتىنىڭ جامبىل وبلىسى بويىنشا دەپارتامەنتى باسشىسىنىڭ مىندەتىن اتقارۋشى رايحان نازاروۆا.

جامبىل وبلىسى