اۋىل اكىمدەرىن حالىقتىڭ تىكەلەي سايلاۋى – يگى باستاما. كەزىندە اتا-بابالارىمىز دا بيلەر مەن بولىستاردى وزدەرى سايلاعان. حالىق ىشىنەن شىققان تۇلعا حالىقشىل بولادى. زامان تالابىنا ساي اۋىل اكىمدەرىن سايلاۋدىڭ وڭ تاجىريبەسىن قالىپتاستىردىق دەپ ويلايمىن جانە بۇل وزگە ورتا ازيا مەملەكەتتەرىنە دە جاقسى ۇلگى بولاتىنى ءسوزسىز.
تاۋەلسىز قازاقستاننىڭ جاڭا تاريحىندا اۋىل اكىمدەرىن حالىقتىڭ ءوزى سايلاۋى – كونستيتۋتسيامىزدا بەلگىلەنگەن دەموكراتيالىق قاعيدانىڭ ايقىن كورىنىسى. حالىق بۇل ينستيتۋتتىڭ ءالى دە جاقسى جاقتارىن تولىق سەزىنبەگەن شىعار, بىراق بولاشاقتا ءارى قاراي دامۋ بارىسىندا اۋىل تۇرعىندارى وسى ساياسي وقيعانىڭ ءمان-ماڭىزىن قازىرگىدەن دە گورى انىعىراق تۇسىنەدى دەپ ويلايمىن.
جالپى, سايلاۋ جامبىل وبلىسىندا جوعارى دەڭگەيدە ءوتتى دەۋگە بولادى. سەبەبى سايلاۋشىلاردىڭ 90 پايىزىنان استامى سايلاۋعا قاتىستى. سايلاۋعا قاتىسۋ بويىنشا بەلسەندىلىكتى سارىسۋ, مەركى, تالاس جانە قورداي اۋداندارىنىڭ تۇرعىندارى كورسەتتى. باسقا اۋدانداردا دا سايلاۋعا قاتىسۋ دەڭگەيى 84 پەن 92 پايىز ارالىعىندا بولدى. بۇل سايلاۋعا «پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگى وبلىستىق فيليالىنان 194 بايقاۋشى جانە اۋدانداردا سولارمەن تىعىز بايلانىستا جۇمىس ىستەگەن 14 كاپيتان دايارلاندى. ولاردىڭ ءبارى دە سايلاۋ بارىسىنا سايلاۋ ۋچاسكەلەرىندە كۇنى بويى باقىلاۋ جۇرگىزدى. سايلاۋ ۋچاسكەلەرى جابىلعاننان كەيىن دە كوميسسيا مۇشەلەرى سايلاۋشىلاردىڭ داۋىستارىن ساناپ بولعانعا دەيىن سول جەردە بولدى.
ساياسي ناۋقان بارىسىندا وتە بەلسەندى قىزمەت اتقارعان مويىنقۇم اۋدانىنان اسەل سارىباەۆا, تالاس اۋدانىنان سالتانات ماحمۋت, ت.رىسقۇلوۆ اۋدانىنان داريا نارماتوۆا جانە شۋ اۋدانىنان اسەل قاسەنوۆا سياقتى كاپيتانداردىڭ ەسىمدەرىن اتاپ وتكىم كەلەدى. بارلىق بايقاۋشى ءوز جۇمىسىنا جاۋاپكەرشىلىكپەن قاراپ, سايلاۋدىڭ ءادىل وتۋىنە ءوز ۇلەسىن قوستى.
ال ەندى جاڭادان سايلانعان اكىمدەرگە حالىق كوپ ءۇمىت ارتىپ وتىر. سەبەبى اۋىلدىق جەرلەردە, اۋىل شارۋاشىلىعىندا شەشىمىن كۇتكەن ماسەلە كوپ. ارينە, اۋىل ءومىرى بىردەن وزگەرمەيتىن شىعار. بىراق ەگەر سايلانعان اكىمدەر قولىنداعى رەسۋرستاردى ءتيىمدى قولدانا بىلسە, حالىقتىڭ جاعدايى بۇدان دا جاقسارۋى كەرەك.
بۇل سايلاۋ حالىقتىڭ وزدەرىنىڭ بيلىك جۇيەسىنە ناقتى ارالاسا الاتىنىن, جەكە تۇرعىننىڭ ءوز ماسەلەسىن ءوزى شەشە الاتىنىن تۇسىنۋىنە ىقپال ەتەدى. سونىمەن قاتار بۇل ءۇردىس تەك قانا اۋىل اكىمدەرىن سايلاۋمەن توقتاپ قالمايدى. ول بولاشاقتا اۋدان اكىمدەرىن سايلاۋعا ۇلاسادى. مۇنىڭ ءوزى بيلىكتىڭ ورتالىقتان جەرگىلىكتى جەرگە بەرىلۋىن بايقاتادى. بۇل, ارينە, ءوز كەزەگىندە جەرگىلىكتى ماسەلەلەردىڭ ۋاقىتىندا شەشىلۋىنە ءوز سەپتىگىن تيگىزەتىنى انىق.
اسقار قادىرقۇلوۆ,
«پارتيالىق ەمەس بايقاۋ ورتالىعى» رقب وبلىستىق فيليالىنىڭ توراعاسى
جامبىل وبلىسى
