ەندى ەكى جىلدان كەيىن اۋدان جانە قالا دەڭگەيىندەگى اكىمدەردى سايلاۋ ماسەلەسى قويىلىپ وتىر. سوندىقتان دا حالىقپەن كۇندەلىكتى بەتپە-بەت كەزدەسىپ, ماسەلەسىن جەدەل شەشىپ داعدىلانعان, قۇزىرەتى مول اتقارۋشى بيلىك ورگاندارىنىڭ جۇرت الدىنداعى جاۋاپتىلىعى مەن باقىلاۋدا بولۋىن توقتاۋسىز جەتىلدىرە بەرۋگە ءتيىسپىز.
بىلتىرعى Nur Otan پارتياسى وتكىزگەن پرايمەريز – حالىقتىڭ كەز كەلگەن دەموكراتيالىق جاڭالىقتار مەن باستامالارعا دايىن ەكەندىگىن كورسەتتى. ارينە, پرايمەريز اكەلگەن جاعىمدى قۇبىلىستارمەن قاتار, ەلەۋلى كەمشىلىكتەر دە ورىن الدى. مۇنى مەن وعان قاتىسۋشى جانە زەرتتەۋشى عالىم رەتىندە جاقسى بىلەمىن. سول كەزدە «الداعى بولاتىن اكىمدەر سايلاۋى پرايمەريزدىڭ ءوز تالابىنا ساي وتۋىنە زور ىقپال تيگىزەدى» دەپ ايتقان بولاتىنمىن. سەبەبى حالىق سايلاعان اكىم – كەز كەلگەن دەموكراتيالىق پروتسەدۋرانى, سونىڭ ىشىندە پرايمەريزدى دە حالىقتىڭ قالاۋىنا ساي ۇيىمداستىرۋعا ىشتەي مۇددەلى.
سونداي-اق اكىمدەردى سايلاۋ ەلىمىزدە كەنجە دامىپ وتىرعان ازاماتتىق ۇلتتى قالىپتاستىرۋدىڭ باستى كورسەتكىشى رەتىندە كورىنىس تاۋىپ وتىر. رۋلىق-تۋىستىق بايلانىستار سىنالىپ, ونىڭ مەملەكەتتىك سانا قالىپتاستىرۋدا, ازاماتتىق ۇلتقا ۇلاسۋىمىزدا زياندى ەكەندىگى ايتىلدى. ماسەلەن, بىزدە سىبايلاس جەمقورلىققا توزبەۋشىلىك مادەنيەتى وسىدان ون جىل بۇرىن جوق ەدى. حالىقتىڭ بويىندا مۇنداي الەۋمەتتىك يممۋنيتەت قالىپتاسپاعان بولاتىن. ال قازىر جۇرت جەمقورلىقتى, وعان جول بەرۋى مۇمكىن كەز كەلگەن جاعدايدى ايىپتايدى. اۋىل اكىمدەرىن سايلاۋ كەزىندە دە حالىقتىڭ باسىم كوپشىلىگى وسى ۇستانىم توڭىرەگىنە شوعىرلانىپ وتىر.
جالپى, بۇرىندارى كونستيتۋتسيالىق مەحانيزم دۇرىس جۇمىس ىستەۋى ءۇشىن ساياسي پليۋراليزم ماڭىزدى دەپ ويلاۋشى ەدىم, پرايمەريزگە قاتىسقاننان كەيىن بۇل پايىمىما تۇزەتۋ ەنگىزدىم. ءدال قازىر ماڭىزدىسى – ءادىل سايلاۋ وتكىزۋ, حالىقتىڭ تىكەلەي داۋىس بەرۋى جانە سايلانعان تۇلعانى باقىلاي الۋى, ءاربىر قوعام مۇشەسىنىڭ دارا تۇلعا ەكەندىگىنە كۇمانى قالماۋى.
اۋىل اكىمدەرىن سايلاۋ حالىقتىڭ ساياسي مادەنيەتىن ءوسىردى دەپ سەنەمىن. بۇل – ساياسي رەفورما دەپ اتاۋعا تۇرارلىق ايتارلىقتاي وزگەرىس.
قازىبەك داۋتاليەۆ,
زاڭ عىلىمدارىنىڭ كانديداتى
