ەلوردادا كوپسالالى مەديتسينا ورتالىعىنداعى قاتەلىكتىڭ كەسىرىنەن قايعىدا جۇرگەن بالالارى ءوز اكەسىنىڭ ورنىنا باسقا بىرەۋدىڭ دەنەسىن جەرلەي جازدادى. مەديتسينا مەكەمەسىنىڭ قىزمەتكەرلەرى مارقۇمنىڭ ءمايىتىن باسقا بىرەۋمەن شاتاستىرىپ, تارازعا ۇشاقپەن سالىپ جىبەرگەن, دەپ حابارلايدى "كتك" تەلەارناسى.
«اشساق, باسقا ءبىر ادام. ءىنىسى بولعان, سول كوردى. ەكى بالاسى كوردى. مەن كوردىم, ول ەمەس بوپ شىقتى. بەينەسى ءبىراز ۇقسايدى. ال ەندى قالعانى قايدا دەسەك, ولار ايتپايدى. «جوق, وسى» دەيدى. وزىنە اكەلىپ بۇرىنعى سۋرەتىمەن سالىستىردىق, مىنە, مىنا ادام, مىنانداي بولاتىن, انادا مەڭ بار, مىنادا مەڭ جوق دەگەننەن كەيىن مويىنداپ, تارازعا كەتىپ قالدى دەدى», دەپ ءتۇسىندىردى مارقۇمنىڭ تۋىسى كاكەن جانتاي ۇلى.
تاڭەرتەڭ تارازعا كەتىپ قالعان مارقۇمنىڭ دەنەسى ءتۇس اۋا ۇشاقپەن ەلورداعا قايتا جەتكىزىلدى. اكەلگەن بويى بالالارى مەن تۋىستارى اۋەجايدان كولىككە سالىپ جەرلەۋگە الىپ كەتتى. ايتۋلارىنشا, جەتپىس جاستاعى كىسى ەكى اپتا بويى كوروناۆيرۋسپەن اۋىرىپ, اقىرى بەتى بەرى قاراماي و دۇنيەگە اتتانعان. دارىگەرلەردىڭ ايتۋىنشا, ەكى ءمايىت كەشە ينفەكتسيالىق اۋرۋحانادان جەتكىزىلگەن.
كەشە كەشكە ەكى ءمايىتتىڭ ءبىرىنىڭ بالاسى كەلىپ, 63 جاستاعى اكەسىن تانىپ, تارازعا اكەتەتىن بولعان. سول تارتىپپەن بۇگىن تاڭەرتەڭ سول ءمايىت تارازعا جىبەرىلگەن.
الايدا, تارازدا جەرلەنۋى ءتيىس بولعان كىسىنىڭ بالاسى جاعدايدى باسقاشا ءتۇسىندىردى. ايتۋىنشا, كەشە ءوزى كەلىپ اكەسىنىڭ دەنەسى قايسى ەكەنىن كورسەتىپ كەتكەن. وسى بىلىقتىڭ كەسىرىنەن ءوز اكەسىنىڭ دەنەسى تارازعا بۇگىن كەشكە جەتكىزىلەيىن دەپ تۇر. سوندىقتان دارىگەرلەردى سالعىرتتىعى ءۇشىن سوتقا بەرۋگە بەكىنگەن. اق حالاتتىلار كىناسىن مويىنداپ, مارقۇمداردىڭ تۋىستارىنان كەشىرىم سۇرادى. سونداي-اق شاتاسقان ءمايىتتى تارازدان قايتارىپ اكەلۋ شىعىنىن دا ءوز قالتاسىنان تولەگەن.
