ج. بەكشيننىڭ ايتۋىنشا, الماتىدا ەپيدەميالىق احۋال جانە ينفەكتسيانىڭ تارالۋىنا جول بەرمەۋ كارانتيندىك شارالاردى ساقتاۋعا جانە مەگاپوليس تۇرعىندارىنىڭ ۆاكتسينالانۋ قارقىنىنا تىكەلەي بايلانىستى.
الماتىنىڭ باس سانيتارلىق دارىگەرى دەرت جۇقتىرعاندار سانىنىڭ كۇرت وسۋىنە بايلانىستى ەپيدەميولوگتاردىڭ 18 ماۋسىمنان باستاپ الماتىدا مۋتاتسيالانعان شتامدارعا زەرتتەۋ جۇرگىزە باستاعانىن اتادى.
قالادا بۇرىن ەپيدەميالىق احۋالدىڭ بريتاندىق «الفا» شتامىنا قاتىستى بولسا, ەندى بولجام بويىنشا نۇر-سۇلتان قالاسى مەن رەسەيدەن كەلگەن «دەلتا» شتامىنان ءورشي تۇسكەن.
ج. بەكشيننىڭ ايتۋىنشا, 30 ماۋسىمدا كەزەكتى زەرتتەۋلەردىڭ ناتيجەسى الىنعان.
«46 سىنامانىڭ 36-دا «دەلتا» شتامى, 8-ىندە «الفا» شتامى جانە ەكەۋىندە – اشىلماعان مۋتاتسيا انىقتالدى. الماتىداعى ەپيدەميالىق احۋال كوروناۆيرۋس دەرتىنە شالدىققانداردى زەرتتەۋ بارىسىندا انىقتالعان 78% ۇلگىسىندە COVID-19 جاڭا «دەلتا» شتامىنا بايلانىستى بولۋدا», دەدى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى.
ج. بەكشين قالا تۇرعىندارى مەن قوناقتارىن حالىق كوپ جينالاتىن ورىندارعا بارماۋعا, الەۋمەتتىك قاشىقتىق پەن بەتپەردە رەجيمىن ساقتاۋعا شاقىردى.
كوروناۆيرۋستىڭ جاڭا شتامى تەز تارالاتىنىن ءارى قالا تۇرعىندارىنىڭ دەنساۋلىعى ءۇشىن وتە قاۋىپتى ەكەنىن, سوندىقتان ۆاكتسينالانۋ قاجەتتىگىن ەسكە سالدى.
