ۋكراينانىڭ جاسىل جەلەكتى ەلگە اينالامىز دەگەن بۇل نيەتى سۇراق تۋىنداتا باستادى. ويتكەنى ەو-عا مۇشە 27 مەملەكەت الدەقايدا قاراپايىم ماقسات قويعان. ولار 2030 جىلعا قاراي كەمىندە ءۇش ميلليارد جاڭا اعاش وتىرعىزامىز دەپ وتىر.
ساراپشىلار ۋكراينانىڭ بۇل شەشىمى ەلدىڭ قورشاعان ورتاسىن جاقسارتىپ قانا قويماي, بيوالۋانتۇرلىلىك پەن تابيعي ەكوجۇيەگە زياندى اسەر ەتۋى مۇمكىن دەپ قورقادى. ۋكراينا جەرىنىڭ 70 پايىزى اۋىل شارۋاشىلىعى ءۇشىن پايدالانىلادى, بۇل – ەۋروپاداعى ەڭ جوعارى كورسەتكىشتەردىڭ ءبىرى جانە وتكەننەن, ۇجىمدىق اۋىل شارۋاشىلىعى قالدىرعان مۇرا.
«ۋكراينا اۋماعىنىڭ شامامەن 40 پايىزى دالالىق كليماتتىق ايماققا جاتادى, بىراق ەلدىڭ تەك 3 پايىزى عانا تابيعي دالا ەكوجۇيەسىنىڭ باي فلوراسىن ساقتاپ قالعان», دەيدى ۋكراينالىق تابيعاتتى قورعاۋ توبىنىڭ بەلسەندىسى الەكسەي ۆاسيليۋك.
ول دالا كارتالارىن جاساۋعا جانە ونىڭ فلوراسىن جىكتەۋگە كوپ جىلدار جۇمسادى. «ۋكراينا دالاسىندا كەزدەسەتىن وسىمدىكتەر كوپ, ولار ءوز تابيعي ورتاسىنان بولەك جەردە جويىلىپ كەتۋى مۇمكىن», دەيدى ا.ۆاسيليۋك. ۇكىمەت اعاشتى پايدالانىلمايتىن اۋىل شارۋاشىلىعى القاپتارىندا وتىرعىزامىز دەگەن. ساراپشى ۋكراينانىڭ كوپ دالاسى زاڭ بويىنشا توزعان اۋىل شارۋاشىلىعى جەرلەرى بولىپ ەسەپتەلەتىنىن ايتادى. ول ەگەر ۇكىمەت باسقا اۋىل شارۋاشىلىعى جەرلەرىن ساقتاپ قالۋدى جوسپارلاپ وتىرسا, وندا ءبىر ميلليارد اعاش قايدا كەتەدى دەگەن سۇراق تۋىندايتىنىن العا تارتتى. ماماندار ءبىر ميلليارد اعاش قورشاعان ورتاعا قالاي اسەر ەتەتىنى تۇسىنىكسىز دەپ وتىر.
