داۋرەن اباەۆ قاسىم-جومارت توقاەۆ ءۇشىن پرەزيدەنتتىكتىڭ العاشق ەكى جىلى وڭاي بولماعانىن ەسكە سالدى.
«بارىنەن بۇرىن العاشقى ەكى جىل پرەزيدەنت قاسىم-جومارت كەمەل ۇلى ءۇشىن كۇردەلى سىناقتارعا تولى بولدى.
سولاردىڭ ىشىندە ەڭ نەگىزگىسى – كوروناۆيرۋس پاندەمياسى. الەم ەندى عانا جاڭا جاعدايعا بىرتىندەپ بوي ۇيرەتىپ كەلەدى. بىراق ونىڭ ءوزى بارىمىزگە اۋىر كەلىپ جاتىر. ارىستاعى جارالىس, قورداي وقيعاسى, ماقتاارالداعى تاسقىن سياقتى ەلدە بولعان توتەنشە جاعدايلاردى دا ۇمىتپاۋ كەرەك. سوندىقتان بارىنەن بۇرىن پرەزيدەنت وسى ەكى جىلدا داعدارىس مەنەدجەرىنىڭ ءرولىن ءساتتى ورىنداپ شىقتى دەۋگە بولادى. وعان ەڭ ءبىر قيىن كەزدەردە قوعامدى ۇيىستىراتىن كۇردەلى ءارى باتىل شەشىمدەردى ءجيى قابىلداۋعا تۋرا كەلدى», دەدى پرەزيدەنت اكىمشىلىگىنىڭ وكىلى.
ونىڭ ايتۋىنشا, تاۋەلسىز قازاقستان تاريحىنداعى ەكىنشى پرەيزدەنتتىڭ ەڭ ايشىقتى ەرەكشەلىگى «حالىق ۇنىنە قۇلاق اساتىن مەملەكەت» ساياساتىن ۇسىنۋى بولىپ وتىر.
«توقاەۆ پرەزيدەنتتىگىنىڭ تاعى ءبىر ايشىقتى ەرەكشەلىگى – «حالىق ۇنىنە قۇلاق اساتىن مەملەكەت» تۇجىرىمداماسىن ەنگىزۋى.
بۇل – ءدال ۋاقىتىندا قولعا الىنعان جانە وتە قاجەت تۇجىرىم. بۇل جاي عانا پرينتسيپ نەمەسە يدەيا ەمەس, بۇل – ساياسات. وسى ساياساتتى مەملەكەتتىك باسقارۋدىڭ ءتۇرلى دەڭگەيىندە باياۋ ءارى دۇرىس ءتۇسىنۋ بولىپ جاتىر. بىلەسىز بە, «حالىق ۇنىنە قۇلاق اساتىن مەملەكەتتى» قوعامدىق وي-پىكىرگە باعدارلانۋمەن شاتاستىرماۋ ماڭىزدى. ەگەر سولاي بولعاندا قازىر ءبىز ۆاكتسينالاۋ جۇرگىزىپ جاتپاعان بولار ەدىك, كارانتيندىك شەكتەۋلەر ەنگىزبەس ەدىك جانە كوپتەگەن تانىمال ەمەس شەشىمدەر قابىلداماس ەدىك. حالىق ۇنىنە قۇلاق اساتىن مەملەكەت - قوعامنىڭ شىنايى قاجەتتىلىگىن, ازاماتتاردىڭ كوكەيىن ءتۇسىنۋ جانە سونى بارىنشا ءتيىمدى قاناعاتتاندىرۋ. ارينە, حالىقتىڭ سۇراۋى وزگەرىپ وتىرۋى مۇمكىن», دەدى داۋرەن اباەۆ مەملەكەتتىڭ قولىندا سول وزگەرىستەردى بەكىتىپ وتىراتىن ماڭىزدى ءارى سالماقتى قۇرال بولۋى كەرەگىن ايتا كەلە.
سونداي-اق ول ەستيتىن مەملەكەت تۇجىرىمداماسىنا ترانسفورماتسيالانۋ ءۇردىسى ەڭ ءبىرىنشى پرەزيدەنت اكىمشىلىگىنەن باستالىپ جاتقانىن ءمالىم ەتتى.
«مەملەكەتتىڭ قولىندا ەلدىڭ كوكەيىندەگى وزگەرىستەردى بەكىتىپ وتىراتىن ماڭىزدى ءارى سالماقتى قۇرال بولۋى كەرەك. ول – ازاماتتارمەن كوممۋنيكاتسيا, الەۋمەتتانۋ, ساراپشىلىق-تالداۋ جانە باسقا دا قۇرالدار. بيلىك ورگاندارىندا, اسىرەسە پرەزيدەنت اكىمشىلىگىندە وسى كومپونەنتتەردىڭ ءبارى بايىپپەن كۇشەيتىلىپ جاتىر.
ءبىز مەملەكەت باسشىسىنىڭ يدەياسىن ءتۇسىنۋىمىز كەرەك. تەك حالىق ۇنىنە قۇلاق اساتىن مەملەكەت قانا ادىلەتتى مەملەكەتكە اينالا الادى. ال ادىلدىك – قاسىم-جومارت توقاەۆتىڭ سايلاۋالدى باعدارلاماسىنداعى نەگىزگى تاعان», دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
