وتىز سپورتشى ەلىمىزدىڭ بايراعىن ۇستاپ قالانىڭ باس كوشەلەرىمەن ءجۇرىپ ءوتتى. «الماتى ارەنا» سپورت كەشەنىنە كەلىپ توقتاعان جاستار ءانۇرانىمىزدى شىرقادى.
ايرىقشا اكتسيانى مەگاپوليستىڭ بەلسەندى جاستارى, سپورتشىلار, ەرىكتىلەر مەن وقۋشىلار قولدادى.
ايتا كەتسەك, مۇنداي ۆەلوجارىس ءداستۇر بويىنشا جىل سايىن وتەدى. وسىلايشا ۆەلوشاباندوزدار ازاماتتاردىڭ نازارىن ەلىمىزدىڭ مەملەكەتتىك رامىزدەرىنە اۋداردى.
ۆەلوشەرۋگە الاتاۋ اۋدانى اكىمىنىڭ ورىنباسارى بەكتاس ءسابيتوۆ قاتىستى. ول بۇل ءىس-شارا بىرلىك پەن سالاۋاتتى ءومىر سالتىنىڭ بەلگىسى ىسپەتتى ەكەنىن ايتتى.
«جىل سايىن وتەتىن ۆەلوجارىستى سپورتشىلار مەن الماتى جاستارى قولدايدى. راسىندا, مەملەكەتتىك رامىزدەر ەلىمىزدىڭ جەڭىسى ءارى جەتىستىكتەرىمەن تىعىز بايلانىستى. سوندىقتان ءبىزدىڭ مەملەكەتتىك رامىزدەر الەمدەگى ءىرى سپورتتىق ءىس-شارالاردا ەرەكشە كوزگە تۇسەدى. ءبىزدىڭ وتاندىق چەمپيوندارىمىز وليمپيادالار مەن الەمدىك جارىستاردا ەلىمىزدىڭ تۋىن ماقتانىشپەن جەلبىرەتىپ ءجۇر», دەدى ب. ءسابيتوۆ.
