پارلامەنت • 01 ماۋسىم، 2021

سەنات پەن شۆەتسيا كورولدىگى پارلامەنتارالىق ماسەلەلەردى تالقىلادى

40 رەت كورسەتىلدى

سەنات توراعاسىنىڭ ورىنباسارى اسقار شاكىروۆ شۆەد ارىپتەسى مارگارەت سەدەرفەلتتى قازاقستانداعى پرەزيدەنتتىك ساياسي رەفورمالار جونىندەگى زاڭداردىڭ ءۇش توپتاماسىمەن، ونىڭ ىشىندە سايلاۋعا، بەيبىت جينالىستارعا، قوعامدىق باقىلاۋعا، قىلمىستىق سوت تورەلىگىن جەتىلدىرۋگە، ۇلتتىق ومبۋدسمەننىڭ مارتەبەسىن نىعايتۋعا جانە وكىلەتتىگىن كەڭەيتۋگە قاتىستى زاڭنامامەن تانىستىردى، دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.

ريكسداگ توراعاسىنىڭ ورىنباسارى ەقىۇ مەن ونىڭ پارلامەنتتىك اسسامبلەياسىندا بەلسەندى مۇشە رەتىندەگى قازاقستاننىڭ وڭ ءرولىن، ونىڭ حالىقارالىق قاتىناستارداعى جوعارى الەۋەتى مەن بەدەلىن اتاپ ءوتتى.

حالىقارالىق كۇن تارتىبىندەگى ماسەلەلەردى تالقىلاۋ بارىسىندا اۋعانستاندا قالىپتاسىپ وتىرعان جاعدايعا جانە ونى رەتتەۋدەگى الەمدىك قوعامداستىقتىڭ رولىنە ەرەكشە نازار اۋدارىلدى. وسىعان بايلانىستى ەلىمىزدىڭ وسى پروتسەسكە قوسقان ۇلەسى اتاپ ءوتىلدى.

تاراپتار قازاقستاننىڭ ورتالىق ازيا وڭىرىندەگى ماڭىزدى ءرولىن اتاپ وتە كەلىپ، سونداي-اق سيرياداعى جاعدايدى رەتتەۋ جونىندەگى استانا پروتسەسى مەن پرەزيدەنت قاسىم-جومارت توقاەۆتىڭ ورتالىق ازيا مەملەكەتتەرى باسشىلارىنىڭ كەزەكتى كونسۋلتاتيۆتىك كەزدەسۋى اياسىندا شەكارالىق قاقتىعىستاردى رەتتەۋ تەتىگىن ازىرلەۋ جونىندەگى باستاماسىن ەسكەرە وتىرىپ، ەلدىڭ بىتىمگەرلىك جونىندەگى وڭ تاجىريبەسىنە توقتالدى.

اڭگىمە بارىسىندا كوروناۆيرۋس پاندەمياسىنا قارسى ءىس-قيمىل ماسەلەلەرى تۋرالى پىكىر الماسىلدى. مارگارەت سەدەرفەلت كوروناۆيرۋسپەن كۇرەسكە وراي قازاقستاندا قابىلدانىپ جاتقان شارالاردى، قازاقستاندىق QazVac ۆاكتسيناسىن ازىرلەۋ مەن دۇنيەجۇزىلىك دەنساۋلىق ساقتاۋ ۇيىمىنىڭ «One Health» باعدارلاماسى اياسىندا ورتالىق ازيا ەلدەرىنىڭ الەۋەتىن ارتتىرۋ جونىندەگى مەملەكەت باسشىسىنىڭ قازاقستاندا پيلوتتىق جوبانى ىسكە اسىرۋ تۋرالى ۇسىنىسىن قۇپتادى.

اڭگىمە كەزىندە قازاقستان مەن شۆەتسيانىڭ زاڭنامالىق ورگاندارى دەڭگەيىندەگى ەكىجاقتى جانە كوپجاقتى سيپاتتاعى ءىس-قيمىلمەن قوسا ەكىجاقتى ىنتىماقتاستىقتى كەڭەيتۋ ماسەلەلەرىن تالقىلاۋعا ەرەكشە ءمان بەرىلدى. جۇزدەسۋشىلەر ەلدەر اراسىنداعى پارلامەنتارالىق، مادەني-گۋمانيتارلىق جانە عىلىمي-ءبىلىم بەرۋ بايلانىستاردى ورىستەتۋدى جاقتادى.

كەزدەسۋگە حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد قاتىسىپ، ءسوز سويلەدى.

سوڭعى جاڭالىقتار

دوللار باعامى قايتا ءوستى

قارجى • بۇگىن، 16:12

ۇقساس جاڭالىقتار