سەرىكتەستىك اتالعان تسيفرلى جوبانى جۇزەگە اسىرۋعا 200 ملن تەڭگە قارجى جۇمساپتى. فەرماداعى سيىر ساۋاتىن ورىن ءسۇتتىڭ مولشەرى مەن ساپاسىن اۆتوماتتى تۇردە باقىلاپ وتىراتىن جوعارى تەحنولوگيالىق قۇرىلعىمەن جابدىقتالعان. بۇل باعدارلامانىڭ كومەگىمەن ساۋىن الاڭىنداعى ءار سيىردىڭ كۇيى, دەنە قىزۋى, جۇرەك قاعىسى, جەمشوبى مەن سالماعى, كۇندىك بەرەتىن ءسۇتىنىڭ مولشەرى مەن قۇرامى تۋرالى مالىمەتتەر جيناقتالىپ وتىرادى. فەرما ماماندارىنىڭ ايتۋىنشا, مۇنىڭ ءبارى ءونىم كولەمىن ۇلعايتىپ, تاۋار ساپاسىن ارتتىرۋعا, سونداي-اق ءاربىر مال باسىن كۇيلى ۇستاۋعا كومەكتەسەدى. ءسۇت فەرماسى الداعى ۋاقىتتا جوعارعى تەحنولوگيا مۇمكىندىگىن پايدالانا وتىرىپ, ءونىم ساپاسىن 4%-عا ارتتىرۋدى, مال ازىعىنىڭ 21%-ىن ۇنەمدەپ, وندىرىستەگى ەڭبەك شىعىنىن 24% قىسقارتۋدى كوزدەپ وتىر.
ساۋىن الاڭىنداعى «اقىلدى» قۇرىلعىلاردىڭ قالاي جۇمىس ىستەيتىنىن بىزگە مال شارۋاشىلىعىنىڭ بريگاديرى سۆەتلانا ماتسيلەۆيچ ايتىپ بەردى. مۇندا تۇرعان سيىرلاردىڭ بارىندە اقپارات بەرىپ تۇراتىن اۆتوماتتى سايكەستەندىرۋ جۇيەسى بار ەكەن. وسى ارقىلى ءار سيىردىڭ قانشا ءسۇت بەرگەنى تۋرالى جانە بۇدان وزگە دە قاجەتتى مالىمەتتەر تابىندى باسقارۋدىڭ كومپيۋتەرلىك باعدارلاماسىنا ەنىپ وتىرادى.
– قازىر, ورتاشا ەسەپپەن ءبىر ساۋىن سيىر تاۋلىگىنە 20 ليترگە دەيىن ءسۇت بەرەدى. كۇنىنە 5 توننا ءسۇت وتكىزەمىز. تسيفرلى تەحنولوگيا ارقىلى ءونىم كولەمىن 50 پايىزعا دەيىن ۇلعايتۋعا قول جەتىپ وتىر, – دەيدى كومپيۋتەرلىك باعدارلامامەن جۇمىس ىستەيتىن مامان مارينا الەينيك.
ءسۇت فەرماسىندا نەبارى ەكى-اق ساۋىنشى جۇمىس ىستەيدى. بىراق ولاردى ساۋىنشى دەپ ايتۋدان گورى «اقىلدى» ساۋىن قۇرىلعىسىن باسقاراتىن وپەراتور دەگەن دۇرىس. سۆەتلانا كوۆالەۆا مەن ولگا ۆاسيليۋك كۇندەلىكتى جۇمىس بارىسىندا ءسۇت تولى اۋىر بيدوندى كوتەرىپ بەل مايىستىرمايدى. ساۋىن الاڭىنا بىردەن 32 سيىردى جىبەرىپ, ارقايسى ورنىنا ورنالاسقان سوڭ, سيىردىڭ جەلىنىن جۋىپ, ساۋىن اپاراتىن كيگىزەدى. قالعان جۇمىس اۆتوماتتى تۇردە جۇرەدى. كوپ ۇزاماي ساۋىن اياقتالىپ, انالىق مال عيماراتتىڭ كەلەسى جاعىنداعى ەسىككە بەتتەيدى. ال ونىڭ ورنىنا باسقا سيىرلار كەلىپ كىرەدى. ساۋىن جۇمىسى اياقتالعان سوڭ ەكى كەلىنشەك ارنايى بولمەگە بارىپ, كيىمدەرىن اۋىستىرادى. مۇندا جۋىنىپ, دەمالاتىن ورىن دا بار.
– جۇمىستىڭ 90 پايىزىن گەرمانيادان اكەلىنگەن Dematron ساۋىن قۇرىلعىسى اتقارادى. العاشقى كەزدە كەيبىر سانداردان قاتە جىبەرىپ قوياتىنمىن, قازىر «اقىلدى» قۇرىلعىنى تولىق مەڭگەرىپ الدىم. تەتىكتى باسام دا, اپپاراتتى ىسكە قوسام. سالدەن سوڭ جىڭىشكە تۇتىكشەلەردىڭ ىشىندە ءسۇت جۇگىرە باستايدى. سيىر ساۋىلىپ بولعان سوڭ, اپپارات اۆتوماتتى تۇردە توقتايدى. وعان سيىرلار دا ابدەن ۇيرەنىپ الدى. 15 جىلدان بەرى ساۋىنشى بولىپ جۇمىس ىستەيمىن. بيىل «اقىلدى» ءسۇت فەرماسى اشىلعالى جۇمىسىمىز كوپ جەڭىلدەدى. بۇرىنعىداي اۋىر ىدىس تاسىمايمىز, بۇل جەردىڭ اۋاسى دا تاپ-تازا. قىسى-جازى ءبىر قالىپتى اۋا تەمپەراتۋراسى ساقتالىپ تۇرادى, – دەدى ساۋىن وپەراتورى سۆەتلانا كوۆالەۆا.
ساۋىن الاڭىنىڭ ەدەنىنە قالىڭ رەزەڭكە توسەنىش توسەلگەن. ونى ەكىنشى ءبىر جۇمىسكەر «كەرحەر» جۋعىش اپپاراتىمەن ءالسىن-ءالسىن جۋىپ, تازارتىپ وتىرادى ەكەن. فەرمانىڭ مال قوراسىنىڭ ءوزى ەرەكشە ەڭسەلى: توبەسى بيىك, ىشتەگى اۋانى جەلدەتكىش تازارتىپ تۇرادى. مۇنداعى مالشىلاردىڭ جۇمىسى دا جەڭىل كورىندى. ويتكەنى مالدىڭ جەمشوبىن بەرۋدى اۋىل شارۋاشىلىعىندا پايدالانىلاتىن شەتەلدىڭ شاعىن تەحنيكالارى اتقارادى.
ءسۇت فەرماسىنا اسا قىمبات اۆتوماتتى تازارتۋ جۇيەسى ورناتىلىپتى. بۇدان وزگە مۇندا سيىر سۋاراتىن زاماناۋي سۋات, ازىق ۇستەلدەرى بار. ءسۇت فەرماسىنىڭ ەڭ باستى ارتىقشىلىعى – تسيفرلى تەحنولوگيادا. جاڭا تەحنولوگيا ارقىلى ساۋىندى اۆتوماتتاندىرىپ قانا قويماي, تابىنداعى ءار سيىردىڭ كۇيىنە قاتىستى كورسەتكىشتەردى باقىلايدى. بۇل كورسەتكىشتەر باسقارۋ پۋلتىنە «سەزىمتال» ءارى «اقىلدى» ارنايى قوندىرعىلار ارقىلى ءتۇسىپ وتىرادى. كومپيۋتەردە وتىرعان زووتەحنيك قاي سيىردىڭ ءسۇتتى ەكەنى, قايسىسىنىڭ ءسۇتى ازايا باستاعانى, قاي سيىردىڭ دۇرىس جەم جەمەي جۇرگەنى تۋرالى مالىمەتتەردى ونلاين رەجىمدە الىپ, زەردەلەپ, ءسۇتتى تابىننىڭ ونىمدىلىگىن ارتتىرۋعا قاجەتتى شەشىمدەردى الدىن الا قابىلداپ وتىرادى.
«تويساي» سەرىكتەستىگىنىڭ باسشىسى ۇزاقباي اعايداروۆتىڭ ايتۋىنشا, ءسۇت فەرماسىندا جالپى سانى 1 131 ءىرى قارا بار. ونىڭ 716-سى – ءسۇتتى مال. شارۋاشىلىق بۇگىندە 315 سيىر ساۋىپ وتىر. كۇنىنە 5 مىڭ ليتر ءسۇت وتكىزىلەدى. ءار ليتر ءسۇتتىڭ باعاسىن 150 تەڭگەدەن ەسەپتەسەك, «اقىلدى» فەرما ايىنا 24 ملن تەڭگەگە ءسۇت وتكىزەدى ەكەن.
